ސޯޝަލް މީޑިއާގައި މިއަދު އާންމުވި ވީޑިއޯގައި ހިމެނޭ ވެހިކަލްތަކުގެ މައުލޫމާތު ގެޒެޓުގައި ޝާިއއުކޮށްފައިވާކަން ފާހަގަކުރެވިއްޖެ އެވެ.
ސޯޝަލް މީޑިއާގައި ފުލުހުންގެ ޓޯ ޔާޑެއްގެ ތެރޭގައި ސައިކަލު ތަކެއް އުކާ މަންޒަރު ފެންނަ ވީޑިއޯއެއް އާއްމުވެފައިވާއިރު އެކަމާއި ގުޅިގެން ތާފާތު ތުހުމަތުތައް ދަނީ ކުރެވެމުންނެވެ. ޓޯ ކޮށްފައި ހުންނަ އުޅަނދަށް ގެއްލުން ދޭ ކަމަށް ބުނެ ދައުރު ކުރަމުންދާ ވީޑިއޯ އަކީ ނައްތާލުމަށް ހަމަޖެހިފައިވާ އުޅަނދުތަކެއް ކަމަށް ވަނީ ބުނެފައެވެ.
ގާނޫނު ބުނާގޮތުންނަމަ އުޅަނދެއް ޓޯ ކުރުމަށްފަހު ނައްތާލުމުގެ ކުރިން އެ އުޅަނދެއްގެ ވެރި މީހާ ހޯދުމަށް، ނަމްބަރު ބޯޑު އާންމުކޮށް ގެޒެޓުގައި 60 ދުވަހުގެ މުއްދަތެއް ދީ އިއުލާނު ކުރަން ޖެހެ އެވެ.
އެއްގަމު ދަތުރުފަތުރުގެ ގާނޫނުގެ ދަށުން ފުލުހުންގެ ބެލުމުގެ ދަށަށް ގެނެވޭ އެއްގަމު އުޅަނދާބެހޭ ގަވާއިދުގައި ވަނީ 6 ވަނަ މާއްދާގެ (ހ) ގައި ވާގޮތުން ފުލުހުންގެ ބެލުމުގެ ދަށަށް ގެނެވޭ އުޅަނދު އަނބުރާ ހަވާލުވުމަށް ދީފައިވާ މުއްދަތުގެ ތެރޭގައި ވެރިފަރާތުން ހަވާލުވެފައިނުވާ އުޅަނދުތަކާ ގުޅޭ މައުލޫމާތު ފަސޭހައިން ފެންނަގޮތަށް ދިވެހި ސަރުކާރުގެ ގެޒެޓުގައްޔާއި ދިވެހި ފުލުހުންގެ ހިދުމަތުގެ ވެބްސައިޓުގައި އާންމުކުރަންވާނެއެވެ.
މި ގަވައިދުގެ (ށ) ގައި ބުނަނީ މި މާއްދާގެ (ހ) ގެ ދަށުން މައުލޫމާތު އާންމުކުރާ ތާރީހުން ފެށިގެން 60 (ފަސްދޮޅަސް) ދުވަހުގެ މުހުލަތެއް، އުޅަނދާ ހަވާލުވުމަށް، އުޅަނދުގެ ވެރިފަރާތަށް ދޭންވާނެއެވެ. ގާނޫނު ބުނާގޮތުންނަމަ ފުލުހުންގެ ހިދުމަތުން އާންމުކުރާ މައުލޫމާތުގައި، އުޅަނދުގެ ރަޖިސްޓްރޭށަން ނަންބަރު؛ އުޅަނދުގެ ބާވަތް؛ އުޅަނދު ހިފެހެއްޓުނު ތަން؛އުޅަނދާ ހަވާލުވާންޖެހޭ އެންމެ ފަހު ތާރީހު އަދި އުޅަނދާ ހަވާލުވުމަށް ދީފައިވާ އެންމެ ފަހު ތާރީހުގައި ވެރި ފަރާތުން އުޅަނދާ ހަވާލުވެފައި ނުވާނަމަ، މި ގަވާއިދުގެ 7 ވަނަ މާއްދާގެ ދަށުން އެފަދަ އުޅަނދަކާމެދު އަމަލުކުރެވޭނެކަން ހިމަނަންޖެހެއެވެ.
ގަވައިދުގައި ބުނެފައިވާ މުއްދަތުގައި ހަވާލުވެފައިނުވާ އުޅަނދާމެދު ފުލުހުން އަމަލު ކުރަން ޖެހޭ ކަންކަމުގެ ތެރޭގައި އާންމުކޮށް ހުޅުވައިލެވޭ ނީލަމެއްގައި އެ އުޅަނދެއް ވިއްކައިލުން؛ ނުވަތަ އެ އުޅަނދެއް ނައްތައިލުން ހިމެނެއެވެ.
