ބައްޕައަކު އަމިއްލަ އަންހެން ދެ ދަރީންނަށް ޖިންސީ ގޯނާކުރި މައްސަލައެއް ފުލުހުން ތަހުގީގު ކުރަން ފަށައިފި އެވެ.
މީޑިއާތަކަށް ފޮނުވި މެސެޖެއްގައި ފުލުހުން ބުނީ އަމިއްލަ ދެ ދަރިންނާއި، ތިމާގެ ކުއްޖަކަށް ޖިންސީ ގޯނާކުރި މައްސަލައެއްގެ ރިޕޯޓެއް ލިބިފައިވާކަމަށެވެ.
މި މައްސަލައިގައި ތުހުމަތު ކުރެވޭ އުމުރުން 42 އަހަރުގެ މީހަކު ފުލުހުން ވަނީ ކޯޓު އަމުރެއްގެ ދަށުން ހައްޔަރުކޮށްފަ އެވެ.
މި މައްސަލައިގައި ބަލަން ޖެހޭކަންކަން، ބަލައި ތަހުގީގު ކުރަމުންދާކަމަށް ފުލުހުން ވަނީ ބުނެފަ އެވެ.
ކުޑަކުދިންގެ މައްސަލަތަކުގައި ކުއްޖާގެ ވަނަވަރު ރައްކާތެރި ކުރުމަށް، އެ ކުއްޖާ ނިސްބަތްވާ އަތޮޅާއި ރަށް އެނގޭނެހެން އެއްވެސް މައުލޫމާތެއް އާންމު ނުކުރެވޭނެ އެވެ.
މިއީ މި ހަފްތާގައި ޖިންސީ ގޯނާގެ މައްސަލައެއް ފެންމަތިވެ ފުލުހުން މީހަކު ހައްޔަރު ކުރި ތިންވަނަ މައްސަލައެވެ.
މި ހަފްތާގައި ފުލުހުން ވަނީ ނުކުޅެދުންތެރިކަން ހުރި މީހަކަށް ޖިންސީ ގޯނާ ކުރި އުމުރުން 57 އަހަރުގެ މީހެއް ވެސް ހައްޔަރުކޮށްފަ އެވެ. އޭނާގެ ބަންދާއި މެދު ގޮތެއް ނިންމުމަށް ކޯޓަށް ހާޒިރު ކުރުމުން ޝަރީއަތް ނިމެންދެން ވަނީ ބަންދުކޮށްފަ އެވެ. މި މައްސަލައިގައި މީހަކު ހައްޔަރު ކުރީ އިއްޔެ ނަމަވެސް، ފުލުހުން ފޮނުވި މެސެޖުގައިވާ ގޮތުން އެ މައްސަލަ ފުލުހަށް ރިޕޯޓުކޮށްފައި ވަނީ މިދިޔަ އޭޕްރިލް މަހުގެ 14 ގަ އެވެ. ނޫސްވެރިން ވަނީ މައްސަލައިގައި ތުހުމަތު ކުރެވޭ މީހާ ހައްޔަރު ކުރުމަށް ފަސް މަސް ދުވަސް ނެގި ސަބަބާއި ގުޅޭގޮތުން ސުވާލުކޮށްފަ އެވެ.
މި ހަފްތާގައި ދެން ފުލުހުން ހައްޔަރުކޮށްފައި ވަނީ 18 އަހަރުން ދަށުގެ އަންހެން ކުއްޖަކަށް ޖިންސީ ގޯނާ ކުރި މައްސަލައެކެވެ. މި މައްސަލަ ފުލުހުންނާއި، ޖެންޑާރ މިނިސްޓްރީ ގުޅިގެން ދަނީ ތަހުގީގު ކުރަމުންނެވެ.
