އިންޑިއާގެ ސަރުކާރުން ރައީސް ޑރ މުހައްމަދު މުއިއްޒު އަދި އަނބިކަނބަލުން މެޑަމް ސާޖިދާ މުހައްމަދަށް ރަސްމީގޮތުން މަރުހަބާ ދަންނަވައިފިއެވެ.
ރައީސް ޑރ މުއިއްޒު އިންޑިއާ އަށް ކުރައްވާ ފުރަތަމަ ރަސްމީ ދަތުރުފުޅާއި ގުޅޭގޮތުން ރައީސް އޮފީހުން ނެރުނު ބަޔާނެއްގައިވާގޮތުން، ރައީސް މުއިއްޒު އަދި މެޑަމް ސާޖިދާ ވަނީ އިންޑިއާގެ ރިޔާސީ ގަނޑުވަރަށް ޒިޔާރަތްކުރައްވާފައެވެ. އަދި މި ޒިޔާރަތުގައި އެ ގައުމުގެ ސަރުކާރުން ރައީސް އަދި ސާޖިދާއަށް މަރުހަބާ ދެންނެވިކަމަށާއި ރާޝްތްރަޕަތީ ބަވަންގައި ކުރިއަށް ގެންދިޔަ މި ރަސްމިއްޔާތު އޮތީ ހެނދުނުގެ ވަގުތުތަކުގައިކަމަށެވެ.
ރައީސްގެ ދެކަނބަލުނަށް މަރުހަބާ ވިދާޅުވީ، އިންޑިއާގެ ރައީސް ދްރޫޕަދީ މުރުމޫއާއި ބޮޑުވަޒީރު ނަރޭންދްރަ މޯދީއެވެ. އަދި އިންޑިއާގެ ސަރުކާރުންވަނީ ރައީސް އެ ގައުމުގެ ރިޔާސީ ގަނޑުވަރަށް ވަޑައިގަތުމުގެ މުނާސަބާ ފާހަގަކުރުމުގެ ގޮތުން 21 ބަޑީގެ ސަލާމެއް އަރުވާފައިކަމަށެވެ. ރައީސްވަނީ މި ރަސްމިއްޔާތުގައި އެމަނިކުފާނުގެ ޝަރަފުގައި އޮތް ޝަރަފުގެ ގާޑް އިންސްޕެކްޓު ކޮށްދެއްވާފައެވެ. މި ރަސްމިއްޔާތަށްފަހު ރައީސްގެ ދެ ކަނބަލުންވަނީ އިންޑިއާގެ މަޝްހޫރު ސޯޝަލިސްޓު މަހާތުމާ ގާންދީގެ މަގުބަރާ، ރާޖްގަޓަށް ޒިޔާރަތްކުރައްވާފައެވެ.
