ޤާނޫނުލްއުޤޫބާތަށް އިސްލާޙު ހުށަހެޅުމުގެ ބިލަށް އާންމުންގެ ހިޔާލު ހޯދުމަށް ހުޅުވާލައިފިއެވެ.
ރައްޔިތުންގެ މަޖިލީހުގެ އިދާރާއިން ކުރި އިއުލާނެއްގައި ބުނީ، މަޖިލީހުގެ ޖުޑީޝަރީ ކޮމިޓީން ދިރާސާކުރަމުންދާ މި ބިލާ ގުޅޭގޮތުން އާންމުންގެ ހިޔާލު ހުށަހެޅުމަށް މިހާރު ހުޅުވާލެވިފައިވާ ކަމަށެވެ. އެގޮޮތުން ނޮވެމްބަރު 21 ވާ ބުރާސްފަތި ދުވަހުގެ މެންދުރު 12:00 ގެ ކުރިން ހިޔާލު ފޮނުމުގެ ފުރުސަތު ވަނީ ހުޅުވާލެވިފައެވެ.
މަޖިލީހުން މައުލޫމާތު ދޭ ގޮތުގައި އީމެއިލްގެ ޒަރިއްޔާއިން ނުވަތަ މަޖިލިސް އިދާރާއަށް ލިއުމުން ހުށަހަޅައިގެންވެސް ހިޔާލު ފޮނުވިދާނެއެވެ.
މި ބިލަކީ ސަރުކާރުގެ ފަރާތުން މާފުށީ ދާއިރާގެ މެމްބަރު ހުސައިން ރިޟާ އާދަމް ހުށަހަޅުއްވާފައިވާ ބިލެކެވެ. މި ބިލުގައި ނުޙައްޤުން މުއްސަނދިކަން ހޯދައި ލިބިގަތުމުގެ ކުށް އިތުރަށް ތަފްސީލުކޮށްދީފައިވެއެވެ. އެގޮތުން ކުށް ކަނޑައެޅޭ ޙާލަތްތައް ތަފްސީލުކޮށްދީފައިވެއެވެ.
