ރައްޔިތުންގެ މަޖިލިސް މެމްބަރުން މަޖިިލީހުގައި ތަމްސީލުކުރާ ސިޔާސީ ޕާޓީ ބަދަލު ކުރުމުން އެ މެމްބަރުންގެ ގޮނޑި ގެއްލޭގޮތަށް ޤާނޫނުއަސާސީއަށް ގެނައި އިސްލާޙު މަޖިލީހުން ފާސްކޮށްފިއެވެ.
ބުދަ ދުވަހުގެ ޖަލްސާގައި މި އިސްލާޙު ފާސްކޮށްފައިިވާއިރު، މިއީ ޤާނޫނުއަސާސީގެ 73 ވަނަ މާއްދާގެ (ރ) ގެ ފަހަތަށް (ބ) ގެ ދަށުން އިތުރު މާއްދާތަކެއް އިތުރުކޮށް ހުށަހަޅާފައިވާ އިިސްލާޙެކެވެ.
މި އިސްލާޙު ހުށަހެޅުއްވީ މަޖިލީހުގެ ހޮޅުދޫ ދާއިރާގެ މެމްބަރު މުޙައްމަދު ޝާހިދުއެވެ. ބިލުގެ އިބްތިިދާއީ ބަހުސް ބުދަ ދުވަހުގެ ހެނދުނު ދަންފަޅީގައި މަޖިލީހުގެ ތަޅުމުގައި ކުރިއަށް ގެންގޮސްފައިވާއިރު، އެއަށްފަހު މުޅި މަޖިލީހުގެ ކޮމިޓީއެއްގެ ގޮތުގައި މަސައްކަތް ފަށައި މެމްބަރުން ވަނީ ކޮމިޓީީގެ މަސައްކަތްތައް ކުރިއަށް ގެންގޮސްފައެވެ.
އެއަށްފަހު ކޮމިޓީ ރިިޕޯޓަށް ތަޅުމުގައި ވޯޓަށް އަހައި މަޖިލީހުން މިހާރު ވަނީ މި އިސްލާޙުތައް ފާސްކޮށްފައެވެ. އެގޮތުން ޤާނޫނުއަސާސީއަށް އިސްލާޙު ގެނައުމަށް ފެންނަކަމަށް 78 މެމްބަރަކު ވޯޓު ދެއްވާފައިވާއިރު، ނުފެންނަކަމަށް 13 މެމްބަރަކު ވޯޓު ދެއްވިއެވެ.
މި އިސްލާޙުގައި ހިމެނޭ ކަންކަމުގެ ތެރެއިން މެމްބަރުންގެ މެދުގައި އެންމެ ބޮޑު ބަހުސެއް އުފެދިފައިވަނީ ޤާނޫނުއަސާސީގެ 73 ވަނަ މާއްދާ (ރައްޔިތުންގެ މަޖިލީހުގެ މެމްބަރުންގެ ޝަރުތުތަކާ ގުޅޭ) މާއްދާގެ (ރ) ގެ ފަހަތަށް އިތުރުކޮށްފައިވާ ނުކުތާތަކާ ގުޅިގެންނެވެ. އެގޮތުން ރައްޔިތުންގެ މަޖިލީހުގެ މެމްބަރުކަމުން ވަކިވާނެ ޙާލަތްތަކެއް ޤާނޫނުއަސާސީގައި ހިމެނުމަށް ވަނީ ހުށަހަޅާފައެވެ.
އޭގެ ތެރޭގައި ހިމެނެނީ އިންތިޚާބުވާ ސިޔާސީ ޕާޓީން އަމިއްލަައަށް ވަކިވުން ނުވަތަ ޕާޓީން އެ މެމްބަރަކު ޤާނޫނުގައި ބުނާ ހަމަތަކުގެ މަތިން ވަކި ކުރުމާއި، އެ މެމްބަރަކު ތަމްސީލުކުރާ ސިޔާސީ ޕާޓީ ނޫން އެހެން ޕާޓީއަކަށް ބަދަލުވުމެވެ. އެ ޙާލަތްތަކުގައި އެމީހަކު ރައްޔިތުންގެ މަޖިލީހުގެ މެމްބަރުކަމުން ވަކިވާނެކަމަށް ވަނީ ބަޔާންކޮށްފައެވެ.
އޭގެ އިތުރުން، އަމިއްލަގޮތުން ރައްޔިިތުންގެ މަޖިލީހަށް ވާދަކޮށްގެން އިންތިޚާބުވުމަށްފަހު އޭނާ ސިޔާސީ ޕާޓީއަކަށް ގުޅިވަޑައިގެންނެވި ނަމަވެސް، މެމްބަރުކަމުން ވަކިވާނެކަމަށް ބަޔާންކޮށްފައިވެއެވެ.
މިހާރު އަމަލުކުރަމުންދާ އެންޓި ޑިފެކްޝަން ޤާނޫނުގައިވެސް މެމްބަރުކަމުގެ ގޮޮނޑި ގެއްލޭނެ ޙާލަތްތައް ބަޔާންކޮށްފައިވެއެވެ. އެ ޤާނޫނަކީ 19 ވަނަ މަޖިލީހުގައި އެމްޑީޕީން އިސްނަގައިގެން ފާސްކުރި ޤާނޫނެކެވެ.
