މާލޭގެ ގެއެއްގެ ތެރޭގައި މަރުވެފައި އޮތް މީހަކު ފެނިއްޖެއެވެ.
ދިވެހި ފުލުހުންގެ ޚިދުމަތުން ބުނީ، ގުލާބީ މަގުގައި ހުރި ގެއެއްގެ ތެރޭގައި ޚަބަރު ހުސްވެފައި އޮތް މީހަކު ފެނުނުކަމުގެ ރިޕޯޓު ލިބިގެން ފުލުހުން ޙަރަކާތްތެރިވެފައިވާ ކަމަށެވެ.
އެމީހާ އައިޖީއެމްއެޗަށް ގެންދިޔައިރުވެސް ނިޔާވެފައިވާކަމަށް ހޮސްޕިޓަލުން ވަނީ ފުލުހުންނަށް މައުލޫމާތު ދީފައެވެ. އެގޮތުން ނިޔާވެފައި އޮއްވައި ފެނިފައިވަނީ މއ ހުދުއަކިރި އުމުރުން 53 އަހަރުގެ އަބްދުﷲ ޙައްސާންއެވެ.
ފުލުހުން ބުނީ، އޭނާގެ ހަށިގަނޑުގެ ބޭރުފުށުން އެއްވެސް އަނިޔާއެއް ފެންނަން ނެތްކަމަށް ހޮސްޕިޓަލުން ފުލުހުންނަށް މައުލޫމާތު ދީފައިވާ ކަމަށެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
