މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ އިސްވެރިން ފުވައްމުލަކު ސިޓީއަށް ކުރެއްވި ދަތުރުފުޅެއްގައި، ފުވައްމުލަކު ސިޓީ ކައުންސިލާއި ބައްދަލުކުރައްވައި ތަރައްޤީގެ މަޝްރޫޢުތަކާއި ބެހޭގޮތުން މަޝްވަރާތައް ކުރިއަށް ގެންދަވައިފިއެވެ.
މި ދަތުރުފުޅުގައި ބައިވެރިވެވަޑައިގެންނެވި ބޭފުޅުންގެ ތެރޭގައި މިނިސްޓަރ އޮފް ސްޓޭޓް އިބްރާހީމް ނަޡީމް، ޑެޕިއުޓީ މިނިސްޓަރ މުޙައްމަދު ޢިމްރާން ޙަސަން، ޑެޕިއުޓީ މިނިސްޓަރ ޙަސަން ވިސާލް އަދި މިނިސްޓްރީގެ ސީނިއަރ އޮފިޝަލުން ހިމެނެއެވެ. މިނިސްޓްރީގެ އިސްވެރިން ފުވައްމުލަކު ސިޓީ ކައުންސިލާއެކު ބޭއްވި ބައްދަލުވުމުގައި، ސިޓީގައި ކުރިއަށްދާ އެކިއެކި ތަރައްޤީގެ މަޝްރޫޢުތަކާ ބެހޭގޮތުން ފުޅާ ދާއިރާއެއްގައި މަޝްވަރާކުރެވުނެވެ.
މީގެ އިތުރުން، ފުވައްމުލަކު ސިޓީގައި ހިންގަމުންދާ ބިން ހިއްކުމާއި ގޮނޑުދޮށް ޙިމާޔަތްކުރުމުގެ މަޝްރޫޢުތައް ކުރިއަށްދާ ސަރަހައްދުތަކަށް ޒިޔާރަތްކުރައްވައި، މަސައްކަތްތައް ކުރިއަށްދާގޮތް ބައްލަވާލެއްވިއެވެ. މި ދަތުރުފުޅުގައި، ފުވައްމުލަކު ސިޓީގެ މަގުހެދުމުގެ މަޝްރޫޢު ކުރިއަށްގެންދިއުމަށް ހަވާލުކޮށްފައިވާ ކޮންޓްރެކްޓަރ ކަމުގައިވާ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) ގެ ޓީމާވެސް މިނިސްޓްރީގެ އިސްވެރިން ބައްދަލުކުރެއްވިއެވެ.
މި ބައްދަލުވުމުގައި މަގުހެދުމުގެ މަޝްރޫޢުގެ މަސައްކަތް ކުރިއަށްދާ ގޮތާއި ދިމާވެފައިވާ ގޮންޖެހުންތަކާ ބެހޭގޮތުން މަޝްވަރާކުރެވުނެވެ. މި ދަތުރުފުޅަކީ ފުވައްމުލަކު ސިޓީގެ ތަރައްޤީގެ މަޝްރޫޢުތައް އަވަސްކުރުމަށާއި، ކުރިމަތިވެފައިވާ ދަތިތައް ޙައްލުކުރުމަށް އެޅޭނެ ފިޔަވަޅުތައް ދެނެގަތުމަށް މުހިންމު ދަތުރުފުޅެއް ކަމުގައި ފާހަގަކުރެވެއެވެ.
