ބޯކޮށް ވާރޭ ވެހި ފެންބޮޑުވެދާނެކަމަށް ލަފާކޮށް ރައްކާތެރިކަމުގެ ފިޔަވަޅުތައް އަޅައިފިއެވެ.
މިކަމާއި ގުޅޭ މައުލޫމާތު ހިއްސާކުރަމުން ނޭޝަނަލް ޑިޒާސްޓާ މެނޭޖްމަންޓު އޮތޯރިޓީ (އެންޑީއެމްއޭ) ބުނީ ބޯކޮށް ވާރޭ ވެހި ފެންބޮޑުވެދާނެކަމަށް ލަފާކޮށް، ރެއިން ފެށިގެން އާންމުކޮށް ފެންވަދެ ގެއްލުވާކަމަށް ފާހަގަ ކުރެވޭ 56 އަށް ވުރެ ގިނަ ގެތަކުގައި ވެލި ބަސްތާ ޖަހާފައިވާކަމަށެވެ. މި މަސައްކަތް ކުރީ މާލޭ ސިޓީ ކައުންސިލުންނެވެ.
މިއަދުވެސް އިތުރު ތަންތަނުގައި ވެލިބަސްތާ ޖެހުމުގެ މަސައްކަތް ދަނީ ކުރިއަށްކަމަށް މައުލޫމާތު ދިނެވެ.
ކުރިއަށް އޮތީ ރާއްޖޭގެ ބޮޑު ސަރަހައްދަކަށް ބޯކޮށް ވިއްސާރަކުރުމާއެކު ކަނޑު ގަދަވެ، އުދައިގެ އަސަރުވެސް ކުރާނެ ދުވަސްވަރެއްކަމަށް މޫސުމާ ބެހޭ ގައުމީ އިދާރާ (މެޓް) އިން ވަނީ ލަފާކޮށްފައެވެ.
މެޓްއިން މިއަދު ބުނީ، ރާއްޖޭގެ އިރުން ހުޅަނގުދެކުނު ބޭ އޮފް ބެންގާލްގައި ކޮޅިގަނޑެއް އުފެދި، އެ ކޮޅިގަނޑު ހުޅަނގަށް ޖެހި ރާއްޖޭގެ ސަރަހައްދުގައި ބޯ ވިއްސާރަ ވިލާ އުފެދުމުގެ ފުރުސަތު ބޮޑުވާނެ ކަމަށް ލަފާ ކުރެވޭކަމަށެވެ.
