މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ”މާސްޓަ ފުޑްސް“ ބްރޭންޑުގެ ކްރީމީ ޗިކަން އެންޑް މަޝްރޫމް ކުކިން ސޯސް ރާއްޖެ އެތެރެ ކުރުމާއި ވިއްކުން މަނާކޮށްފިއެވެ.
އެމްއެފްޑީއޭއިން މިފަދައިން ނިންމާފައިވަނީ ”މާރްސް އޮސްޓްރޭލިއާ ޕވޓ ލޓޑ“ އިން އުފައްދާފައިވާ މި ސޯސްގައި ބިސް ހިމެނޭއިރު، އުފެއްދުމުގެ ލޭބަލްގައި އެލާޖެންގެ މައުލޫމާތު ހިމަނާފައިނުވާތީއެވެ. މި މައްސަލައާ ގުޅިގެން އުފެއްދި ކުންފުނިން ވަނީ މި އުފެއްދުން ބާޒާރުން ނެގުމަށް އަންގާފައެވެ.
މި އުފެއްދުން ރާއްޖެއަށް އެތެރެވެފައިވާކަން ދުނިޔޭގެ ސިއްޙަތު ޖަމިއްޔާގެ އިންޓަނޭޝަނަލް ފުޑް ސޭފްޓީ އޮތޯރިޓީސް ނެޓްވޯކް (INFOSAN) މެދުވެރިކޮށް އެމްއެފްޑީއޭއަށް އެންގިފައިވާކަން ފާހަގަކުރެވެއެވެ.
އެލާޖެންގެ މައުލޫމާތު ހިމަނާފައިނުވުމަކީ މި އުފެއްދުން ބޭނުންކުރާ ފަރާތްތަކުގެ ސިއްޙަތަށް ނުރައްކަލެއް ދިމާވެދާނެ ފަދަ ކަމެއް ކަމަށް އެމްއެފްޑީއޭއިން ވަނީ ފާހަގަކޮށްފައެވެ. އެހެންކަމުން، ރައްކާތެރިކަމުގެ ފިޔަވަޅެއްގެ ގޮތުން މި އުފެއްދުން ރާއްޖެ އެތެރެ ކުރުމާއި ވިއްކުން ވަނީ މަނާކޮށްފައެވެ.
އެމްއެފްޑީއޭއިން ވަނީ މި އުފެއްދުން ގަނެފައިވާ ފަރާތްތަކުން އެ އުފެއްދުން ބޭނުން ނުކުރުމަށާއި، ވިޔަފާރިތަކުން މި އުފެއްދުން ވިއްކުން ހުއްޓާލުމަށް އިރުޝާދު ދީފައެވެ.
