ހެންވޭރާއި ހުޅުމާލެ ފެރީޓާމިނަލްގެ ހިދުމަތް އިތުރަށް ފުޅާކުރުމަށް ކުރެވިފައިވާ މަސައްކަތްތަކުން ދަތުރުވެރިންނަށް ބޮޑެތި ފަސޭހަތަކެއްވެގެންދާނެކަމަށް އެމްޓީސީސީން ބުނެފިއެވެ.
އެމްޓީސީސީން އާންމުކޮށްފައިވާގޮތުން ރައީސް ޑރ މުހައްމަދު މުއިއްޒުގެ އެދިވަޑައިގަތުމާއި އެއްގޮތަށް ފެރީގެ ހިދުމަތްދޭ ފަރާތްތަކަށް ހުޅުމާލެ އަދި ހެންވޭރު ޓާމިނަލް ސަރަހައްދުގެ ފަޅު ހުޅުވާލުމާއިއެކު މާލެއާއި އެހެނިހެން ސަރަހައްދުތައް ދެމެދު ދަތުރުކުރައްވާ ފަރާތްތަކަށް ރައްކައުތެރި އަދި ރަނގަޅު އިންތިޒާމުތަކެއް ހަމަޖެހިފައިވާކަމަށެވެ. އެގޮތުން ކުރިއަށްވުރެ ފަސިންޖަރުންނާއި ރައްޓެހ މާހައުލެއް ގާއިމުކުރެވިގެންގޮސްފައިވާއިރު ޒަމާންވީ ދަތިތަކަކަށް ހައްލުތަކެއް ލިބިގެންގޮސްފައިވާކަމަށް ބުނެފައިވެއެވެ.
މީގެ ތެރޭގައި އުޅަނދުތައް ގާތްކޮށް ހިދުމަތް ދިނުމަށްޓަކައި ކަނޑައެޅިފައިވާ ޖާގައެއް ހާއްސަކުރެވިގެންދިއުމާއި ވަސީލަތްތައް ހަރުދަނާވެގެންދިއުން އަދި އަރާފޭބުމުގެ ލުއިފަސޭހަކަން ލިބިގެންދިއުން ހިމެނޭކަމަށް ހިއްސާކޮށްފައިވެއެވެ. އެ ކުންފުނިން ބުނެފައިވާގޮތުން މިހާރުވެސް ބައެއް އުޅަނދުތަކުންވަނީ މި މަސައްކަތްތަކުގައި ބައިވެރިވެފައެވެ. އަދި މި މަސައްކަތްތައް މެދުވެރިކޮށް ދުވާލެއްގެ މައްޗަށް 2000 ވަރަކަށް ފަސިންޖަރުންނަށް ހިދުމަތް ދެވޭނެކަމަށް ބެލެވޭކަމަށްވެސް ހިއްސާކޮށްފައިވެއެވެ.
