ދެމެހެއްޓެނިވި ގޮތެއްގައި ދިވެހި ރައްޔިތުންނަށް ސާފު ބޯފެން ފޯރުކޮށްދިނުމަކީ ސަރުކާރުގެ އެންމެ މުހިއްމު އެއް އަމާޒުކަމަށް ރައީސުލްޖުމްހޫރިއްޔާ ޑރ މުޙައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ދުނިޔޭގެ ފެނުގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ.
ރައީސް ވިދާޅުވީ، ދުވަހުގެ ތަހުނިޔާ ހުރިހާ ދިވެހިންނާއި އަދި ރާއްޖޭގެ ބައިނަލްއަޤުވާމީ ބައިވެރިންނަށްވެސް ފޮނުއްވަވާކަމަށެވެ.
މިއަހަރުގެ ޝިއާރަށް އަލިއަޅުވާލައްވާ ރައީސް ވިދާޅުވީ، މޫސުމަށް އަންނަ ބަދަލުތަކާއި ފެނުގެ ވަސީލަތްތަކާއި އިންސާނުންނާ އޮންނަ ގުޅުން މިއަހަރުގެ ޝިއާރުން ދައްކުވައިދޭ ކަމަށެވެ. ރާއްޖެއަކީ ތިމާވެށީގެ މިފަދަ ނާޒުކު މައްސަލަތަކުގައި އަބަދުވެސް ބަސްބުނާނެ ޤައުމެއްކަން ރައީސް ފާހަގަ ކުރެއްވިއެވެ.
ރައީސް ވިދާޅުވީ، ދެމެހެއްޓެނިވި ގޮތެއްގައި ދިވެހި ރައްޔިތުންނަށް ސާފު ބޯފެން ފޯރުކޮށްދިނުމަކީ ސަރުކާރުގެ އެންމެ މުހިއްމު އެއް އަމާޒު ކަމަށެވެ.
ރައީސް ވަނީ މިފަދަ ކަންކަމުގައި ހުރިހާ ފަރާތްތަކުންވެސް އެއްބާރުލުން ދިނުމަށް އެދިވަޑައިގެންފައެވެ.
ހައުސިންގ މިނިސްޓްރީ އާއި ސްޓެލްކޯ އަދި އެމްޑަބްލިޔުއެސްސީ ގުޅިގެން އެކި ރަށްރަށުގެ ފެނުގެ ނިޒާމު ޤާއިމުކޮށް ފުރިހަމަކުރުމުގެ މަސައްކަތްތަކެއްވެސް ކުރިއަށްދެއެވެ.
