މިއަހަރުގެ މާޗު މަހުގެ ނިޔަލަށް ވައްކަމުގެ 696 މައްސަލައެއް ފުލުހުންގެ މުއައްސަސާއަށް ރިޕޯޓުކުރެވިފައިވާކަމަށް އެ މުއައްސަސާއިން ހާމަކޮށްފިއެވެ. މިއީ އެ މުއްދަތުގައި ރިޕޯޓުކުރެވުނު މައްސަލަތަކުގެ ތެރެއިން ދެވަނައަށް އެންމެ ގިނަ މައްސަލަތައް ރިޕޯޓުކުރެވުނު ބާވަތެވެ.
ފުލުހުންގެ މުއައްސަސާއިން އާންމުކުރި ތަފާސްހިސާބުތަކުން ދައްކާގޮތުގައި، މާޗު މަހު އެންމެ ގިނައިން ރިޕޯޓުކުރެވިފައިވަނީ ޓްރެފިކް އެކްސިޑެންޓުތަކާ ގުޅުންހުރި މައްސަލަތަކެވެ. އެގޮތުން އެ ބާވަތުގެ 784 މައްސަލައެއް ރިޕޯޓުކުރެވިފައިވެއެވެ. އަދި މަސްތުވާތަކެއްޗާ ގުޅުންހުރި 393 މައްސަލައާއި، މުދާ ގެއްލިގެން 242 މައްސަލަވެސް ހުށަހެޅިފައިވެއެވެ.
މީގެއިތުރުން، މުދަލަށް ގެއްލުންދިނުމުގެ 157 މައްސަލައާއި، މާރާމާރީގެ 152 މައްސަލަ ރިޕޯޓުކުރެވިފައިވާއިރު، ހިޔާނާތްތެރިވުމުގެ 115 މައްސަލަވެސް ހުށަހެޅިފައިވާކަމަށް ފުލުހުން ހާމަކޮށްފައިވެއެވެ. އަދި ފޭރުމުގެ 64 މައްސަލައާއި، ޖިންސީ ކުށްތަކުގެ 53 މައްސަލައާއި، ގެވެށި އަނިޔާގެ 53 މައްސަލަވެސް ފުލުހުންނަށް ރިޕޯޓުކުރެވިފައިވެއެވެ.
ފުލުހުންގެ ތަފާސްހިސާބުތަކުން އިތުރަށް ދައްކާގޮތުގައި، ލިޔެކިއުންތައް ނަކަލުކުރުމުގެ 22 މައްސަލައެއްވެސް މި މުއްދަތުގައި ރިޕޯޓުކުރެވިފައިވެއެވެ. މިއީ އެ މުއްދަތުގައި ރިޕޯޓުކުރެވުނު މައްސަލަތަކުގެ ތެރެއިން އެންމެ މަދުން ރިޕޯޓުކުރެވުނު ބާވަތުގެ މައްސަލަތަކެވެ.
