އިންޑިއާގެ ކަޝްމީރުގައި ސަރަހައްދުގައި ހުރި ފަތުރުވެރިންގެ މަރުކަޒަކަށް ބަޔަކު ހަތިޔާރު ހިފައިގެން ވަދެ، އެތަނުގައި ތިބި ފަތުރުވެރިންނަށް ދިން ހަމަލާ ރައީސުލްޖުމްހުރިއްޔާ ޑރ މުހައްމަދު މުއިއްޒު ކުށްވެރިކުރައްވައިފިއެވެ.
މި ހަމަލާ ރައީސް ކުށްވެރިކުރެއްވީ އެކްސްގައި ހިއްސާކުރެއްވި ޕޯސްޓެއްގައެވެ.
ރައީސް ވިދާޅުވީ، އެ ޚަބަރު އަޑުއެއްސެވީ ނުހަނު ހިތާމައާއެކު ކަމަށާއި، ޙަމަލާގެ ސަބަބުން މައުސޫމު އެތައް ބަޔަކަށް ގެއްލުންވެފައިވާކަމަށެވެ.
މި ހަމަލާ ދީފައިވަނީ ޕަހަލްގާމް ސަރަހައްދުގައެވެ. މި ސަރަހައްދު އޮންނަނީ ސްރީނަގަރު ސިޓީއިން ގާތްގަނޑަކަށް 90 ކިލޯމީޓަރު ދުރުގައެވެ. މިއީ ފަތުރުވެރިންނަށް ހާއްސަ މަންޒިލެކެވެ.
މި ހަމަލާގައި ގާތަގަނޑަކަށް 26 މީހުން މަރުވެފައިވާ އިރު، އަނިޔާވި ބައެއް މީހުންނަށް ހޮސްޕިޓަލުގައި ދަނީ ފަރުވާދެމުންނެވެ.
