ތަރައްޤީވެފައިވާ ޤައުމުތަކުގެ ލިސްޓުގައި ރާއްޖެ ހިމެނުމަށްޓަކައި އަމިއްލަ ވިޔަފާރިތައް ކުރިއަރާ ދިއުން މުހިންމުކަމަށް އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވެއްޖެއެވެ.
މިނިސްޓަރު ސަޢީދު މިހެން ވިދާޅުވީ މެލޭޝިއާގެ ބޮޑު ވަޒީރު އަންވަރު އިބްރާހިމްގެ ދައުވަތަކަށް ރައީސް ޑރ. މުހައްމަދު މުއިއްޒު ސަރުކާރުގެ އިސްވެރިންނާއެކު އެ ގައުމަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ބޭއްވުނު ދިވެހިރާއްޖެ-މެލޭޝީޔާ ބިޒްނަސް ފޯރަމްގައެވެ.
ޤައުމުގެ ތަރައްޤީއާއި ކުރިއަރާ ދިއުމުގައި، ދިވެހިރާއްޖެ މިހާރު ވަނީ އުއްމީދީ ހާލަތެއްގައިކަމަށް ސަޢީދު ވިދާޅުވިއެވެ.
މިނިސްޓަރު އިތުރަށް ފާހަގަކުރެއްވި ގޮތުގައި، 2040 ވަނަ އަހަރުގެ ކުރިން ތަރައްޤީވެފައިވާ ޤައުމުތަކުގެ ތެރޭގައި ދިވެހިރާއްޖެ ހިމެނުމަށްޓަކައި، ރައީސް މުޢިއްޒުގެ ދުރުވިސްނުންފުޅާއެކު، ޚާއްޞަ މަގުޗާޓެއްގެ ދަށުން މަސައްކަތްތަކެއް ދަނީ ކުރެވެމުންނެވެ. މީގެއިތުރުން، މި ލަނޑުދަނޑިއަށް ވާޞިލުވުމުގައި އަމިއްލަ ވިޔަފާރިތައް ކުރިއަރާ ދިއުން ވަރަށް މުހިއްމުކަމަށްވެސް ފާހަގަކުރެއްވިއެވެ.
ދިވެހިރާއްޖޭގައި އުފެދިފައިވާ ވިޔަފާރީގެ އާ ފުރުޞަތުތަކުގެ ބޭނުން ހިފައި، ދިވެހިރާއްޖެއަކީ މިހާރަށް ވުރެ ވަރުގަދަ، ވިޔާފާރިތަކަށް ފަހި އަދި މުސްތަޤުބަލަށް ތައްޔާރުވެފައިވާ ޤައުމަކަށް ހެދުމަށް ގެންގުޅޭ ތަސައްވުރުގައި ބައިވެރިވުމަށް، މެލޭޝިއާގެ ވިޔަފާރިތަކަށް ރައީސް ވަނީ މި ދަތުރުގެ ތެރެއިން ދައުވަތުވެސް ދެއްވާފައެވެ.
