މަގާމުގެ ނާޖާއިޒް ފައިދާ ނެގިކަމުގެ ކުށުގެ ތުހުމަތުކޮށް އިމިގްރޭޝަން ކޮންޓްރޯލަރުގެ ވަކިކުރި މުހައްމަދު ޝަމްއާން ވަހީދު ޝަރީއަތް ނިމެންދެން ބަންދުކޮށްފައިވާއިރު، އޭނާ ބަންދުކުރީ ރަނގަޅަށްކަމަށް ދިވެހިރާއްޖޭގެ ހައިކޯޓުންވެސް ދަމަހައްޓައިފިއެވެ.
ބަންދުގެ މައްސަލައާއި ގުޅުވައި ޝަމްއާންގެ ފަރާތުން ދެ މައްސަލައެއް ހުށަހަޅާފައިވާއިރު، އޭގެ ތެރެއިން އެއް މައްސަލައަކީ އޭނާ 15 ދުވަހަށް ބަންދު ކުރުމަށް އަމުރުކުރި މައްސަލައެވެ. ދެވަނަ މައްސަލައަކީ ޝަރީއަތް ނިމެންދެން ކުރި އަމުރާގުޅޭ މައްސަލައެވެ.
މި މައްސަލަތަކާ އަޑުއެހުންތައް މީގެ ކުރިން ހައިކޯޓުގައި ކުރިއަށް ގެންގޮސްފައިވާއިރު، އަންގާރަ ދުވަހުގެ އަޑުއެހުމުގައި އޮތީ ގޮތް ނިންމުމެވެ. އެގޮތުން މީގެ ކުރިން ބޭއްވި އަޑުއެހުންތަކުގައި ޝަމްއާންގެ ވަކީލު ވިދާޅުވީ، އޭނާ ޝަރީއަތް ނިމެންދެން ބަންދު ކުރުމަށް ނިންމާފައިވަނީ ހަމައެކަނި ހެކިންނަށް ނުފޫޒު ފޯރުވާނެކަމަށް ބަލައިގެން ކަމަށެވެ. އެހެންނަމަވެސް، އޭނާ ބަންދުކުރިއިރު، ހެކިންނަށް ނުފޫޒުފޯރުވާނެކަމަށް ބެލެވޭ އެއްވެސް ހެއްކެއްވެސް ނެތްކަމަށް އޭނާގެ ވަކީލު ވިދާޅުވިއެވެ.
