މިދިޔަ މަހު މުހިންމު ހަތަރު ބިލެއްގެ މަސައްކަތް ނިންމައި ރައީސުލްޖުމްހޫރިއްޔާގެ އޮފީހަށް ފޮނުވާފައިވާނެކަމަށް ބަންޑާރަ ނައިބުގެ އޮފީހުން ބުނެފި އެވެ.
ބިލުުތަކުގެ މަސައްކަތުގެ މައުލޫމާތުތައް ހިއްސާކޮށް އޭޖީ އޮފީހުން ބުނީ، އޭގެ ތެރޭގައި ބޯހިޔާވަހިކަމުގެ ބިލާއި، ދިވެހިރާއްޖޭގެ މަދަނީ ވައިގެ ދަތުރުފަތުރާގުޅޭ ބިލާއި، މޯލްޑިވްސް ސިވިލް އޭވިއޭޝަން އޮތޯރިޓީގެ ޤާނޫނަށް އިޞްލާޙު ގެނައުމުގެ ބިލުގެ އިތުރުން ދުންފަތް ކޮންޓްރޯލުކުރުމާބެހޭ ޤާނޫނަށް އިޞްލާޙު ގެނައުމުގެ ބިލު ހިމެނޭ ކަމަށެވެ.
މި ބިލުތަކުގެ ތެރެއިން މަސައްކަތް ނިންމައި ފޮނުވި ދުންފަތް ކޮންޓްރޯލް ކުރުމާއި ބެހޭ ގާނޫނަށް އިސްލާހު ގެނައުމުގެ ބިލު ތަޅުމަށް ފޮނުވައި މިހާރު އޮތީ ކޮމިޓީ މަރުހަލާގައިކަން އެ އޮފީހުން ފާހަގަކުރި އެވެ.
އިތުރު ބިލެއްގެ ގޮތުގައި އޭޖީ އޮފީހުން ފާހާގަކުރީ، 22 އެޕްރީލްގައި ރައީސުލްޖުމްހޫރިއްޔާގެ އޮފީހަށް ފޮނުވި މޯލްޑިވްސް ސިވިލް އޭވިއޭޝަން އޮތޯރިޓީގެ ޤާނޫނަށް އިޞްލާޙު ގެނައުމުގެ ބިލާއި، ދިވެހިރާއްޖޭގެ މަދަނީ ވައިގެ ދަތުރުފަތުރުގެ ބިލުގެ މަސައްކަތެވެ. އޭޖީ އޮފީހުން ބުނީ މީގެތެރެއިން ދިވެހިރާއްޖޭގެ މަދަނީ ވައިގެ ދަތުރުފަތުރުގެ ބިލު މިހާރު އޮތީ އިބްތިދާއީ ބަހުސްގެ މަރުހަލާގައިކަމަށެވެ.
ބަންޑާރަނައިބުގެ އޮފީހުން ސަރުކާރުގެ ލެޖިސްލޭޓިވް އެޖެންޑާ އެކުލަވާލައި އެ އެޖެންޑާގެ ދަށުން ތައްޔާރުކުރަންޖެހޭ ބިލުތައް ޑްރާފްޓްކޮށް އެކުލަވާލުމުގެ މަސައްކަތަކީ ބަންޑާރަނައިބުގެ އޮފީހުގެ ލޯ ރިފޯމް އެންޑް ލެޖިސްލޭޓިވް އެފެއާޒް ޑިވިޜަންގެ މައިގަނޑު އެއް މަސައްކަތްކަން ފާހަގަކުރެވެ އެވެ.
މީގެއިތުރުން އޭޖީ އޮފީހުން ބުނީ ސަރުކާރުން ތައްޔާރުކުރާ ބިލްތަކުގެ ޑްރާފްޓް އެކުލަވާލުމުގެ އިތުރުން، މި ޑިވިޜަނުން ކުރާ މަސައްކަތްތަކުގެ ތެރޭގައި، ޤާނޫނު ހެދިފައިނުވާ ދާއިރާތައް ފާހަގަކުރުމާއި، ޤާނޫނު ހެދިފައިނުވާ ދާއިރާތަކާގުޅޭ ދިރާސާތައް ކަމާބެހޭ އިދާރާތަކާ ގުޅިގެން ކުރުމާއި، އެ އިދާރާތަކުގެ މަޝްވަރާއާއެކުގައި ޤާނޫނުގެ ދެލިކޮޕީ އެކުލަވާލުން ހިމެނޭ ކަމަށެވެ.
މިއާއި އެކު ޒަމާނާ ނުގުޅޭ ނުވަތަ ރާއްޖެއަށް ބޭނުންނުވާ ޤާނޫނުތައް ހުރިނަމަ، އެކަން ފާހަގަކުރުމުގެ މަސައްކަތް ކުރަމުންދާކަމަށް ބުންޏެވެ. އަދި އެ ޤާނޫނުތައް އުވާލުމަށް، ކަމާބެހޭ ސަރުކާރުގެ އިދާރާތަކަށް މަޝްވަރާދިނުމާއި، މިހާރު ޢަމަލުކުރަމުންދާ ޤާނޫނުތަކުގެ ތެރެއިން އިޞްލާޙު ގެންނަންޖެހޭކަމަށް ފެންނަ ޤާނޫނުތަކަށް ގެންނަންޖެހޭ އިޞްލާޙުތައް، ކަމާބެހޭ ސަރުކާރުގެ އިދާރާތަކާގުޅިގެން ދިރާސާ ކުރުމަކީ ލޯ ރިފޯމް އެންޑް ލެޖިސްލޭޓިވް އެފެއާޒް ޑިވިޜަނުން ކުރާ މުހިންމު މަސައްކަތެއްކަމަށް ވަނީ ބުނެފަ އެވެ.
