ޓޫރިޒަމް އެންޑް އެންވަޔަރަމަންޓް މިނިސްޓަރ ޠާރިޤް އިބްރާހިމް ”އިންޓަނޭޝަނަލް ޒީރޯ-ކާބަން އައިލެންޑްސް އެންޑް ގްރީން ލޯ-ކާބަން ޑިވެލޮޕްމަންޓް އެކްސްޗޭންޖް ކޮންފަރެންސް“ ބައިވެރިވެވަޑައިގެން ޝަރަފުވެރި ކޮށްދެއްވައިފިއެވެ.
މި ކޮންފަރެންސްގައި، ދެމެހެއްޓެނިވި އަދި ކާބަން މަދު މުޖުތަމައެއް ބިނާކުރުމަށް ޔަންޓައި ސިޓީން ކުރަމުންދާ ނަމޫނާ މަސައްކަތްތަކާ ބެހޭ މުހިންމު މަޢުލޫމާތުތައް ހިއްސާކުރެވުނެވެ. އަދި ދިވެހިރާއްޖެއިން އިއާދަކުރަނިވި ހަކަތައަށް ބަދަލުވުމުގެ ދަތުރުގައި ބޭނުންވާ މުހިންމު ފުރުސަތުތައް ވެސް މި ކޮންފަރެންސްގައި ފާހަގަކުރެވުނެވެ.
މިނިސްޓަރ ޠާރިޤް މި ކޮންފަރެންސްގައި ބައިވެރިވެވަޑައިގަތުމުން، ދިވެހިރާއްޖެއިން ތިމާވެށި ހިމާޔަތްކުރުމަށާއި ކާބަން މަދުކުރުމަށް ދެމުންދާ އަހައްމިއްޔަތުކަން އިތުރަށް ހާމަވެގެންދިޔައެވެ. އަދި މި ދާއިރާއިން ބައިނަލްއަޤްވާމީ ފެންވަރުގައި ދިވެހިރާއްޖެއިން އަދާކުރަމުންދާ ދައުރު އިތުރަށް ފުޅާވެގެންދާނެކަމަށް ބެލެވެއެވެ.
މި ކޮންފަރެންސްގައި ބައިވެރިވެވަޑައިގަތުމުން، ދިވެހިރާއްޖެއަށް ބޭނުންވާ ޓެކްނޮލޮޖީއާއި ތަޖުރިބާ ހޯދުމަށް އިތުރު ފުރުސަތުތަކެއް ހުޅުވިގެންދާނެކަމަށް ސަރުކާރުން އުންމީދުކުރައްވައެވެ. އަދި މިކަމުގެ ސަބަބުން ދިވެހިރާއްޖޭގެ ތިމާވެށި ރައްކާތެރިކުރުމުގެ މަސައްކަތްތަކަށް އިތުރު ކުރިއެރުންތަކެއް ލިބިގެންދާނެކަމަށް ބެލެވެއެވެ.
