ކާޑެއްދޫ އެއާޕޯޓަށް ކުރިމަތިވެފައިވާ ހުވަނީގެ މައްސަލަ ހައްލުކުރުމަށް މިނިސްޓްރީ އޮފް އެގްރިކަލްޗަރ އެންޑް އެނިމަލް ވެލްފެއާއިން ފަންނީ އެހީތެރިކަން ފޯރުކޮށްދީފިއެވެ. މި މައްސަލަ އެ މިނިސްޓްރީގެ ސަމާލުކަމަށް އައީ ސޯޝަލް މީޑިއާގެ ޒަރިއްޔާއިންނެވެ.
މިނިސްޓްރީން މައުލޫމާތު ދީފައިވާ ގޮތުގައި، މި މައްސަލަ ސަމާލުކަމަށް އައުމާއެކު، އެ ވުޒާރާގެ ކަމާގުޅުންހުރި އިދާރާއިން ވަނީ އެއާޕޯޓާ ގުޅައި، މީގެކުރިން އަމަލުކޮށްފައިވާ ގޮތުގެ މައުލޫމާތު ސާފުކޮށްފައެވެ. އަދި އިތުރަށް ކުރެވިދާނެ ކަންކަމާ ގުޅޭ މައުލޫމާތު ދިނުމާއެކު، ހުވަނި ކޮންޓްރޯލްކުރުމާ ބެހޭ ފަންނީ މައުލޫމާތު ހިމެނޭ ކަރުދާހެއް މެއިލްގެ ޒަރިއްޔާއިން ވަނީ ފޮނުވާފައެވެ.
އެހެންނަމަވެސް، މިނިސްޓްރީން ފާހަގަކޮށްފައިވާ ގޮތުގައި، ހުވަނި ގިނަވެ، އެ މައްސަލަ ހައްލުކުރުމަށް އެހީއަށް އެދި ކާޑެއްދޫ އެއާޕޯޓުން ސިޓީއެއް ނުވަތަ މެއިލްއެއްވެސް އެ ވުޒާރާއަށް ލިބިފައެއް ނުވެއެވެ.
މިނިސްޓްރީން ވަނީ މީހުން އާބާދުވެ އުޅޭ ރަށްތަކުގައި ހުވަނި ކޮންޓްރޯލްކުރުމަކީ އެ ރަށެއްގެ ކައުންސިލުގެ ޒިންމާއެއްކަން ފާހަގަކޮށްފައެވެ. އަދި ސިނާއީ މަސައްކަތްތައް ކުރާ ރަށްތަކުގައިވެސް ހުވަނި ކޮންޓްރޯލުކުރުމަކީ އެ ރަށެއް މެނޭޖްކުރުމުގެ ޒިންމާ އޮތް ފަރާތްތަކުން ދުރާލާ ތައްޔާރުވާންޖެހޭ ކަމެއްކަމަށް ބުނެފައިވެއެވެ.
މިނިސްޓްރީން އިތުރަށް ބުނެފައިވަނީ، މިފަދަ މައްސަލަތަކުގައި ބޭނުންވާ ފަންނީ އެހީތެރިކަން އެ ވުޒާރާއިން ފޯރުކޮށްދޭނެ ކަމަށެވެ.
