ކުޅުދުއްފުށި ސިޓީގެ ފެނުގެ ހިދުމަތް މުޅިން އިޔާދަކުރަނިވި ހަކަތައިން ހިންގުމުގެ މަޝްރޫއުގެ އަމަލީ މަސައްކަތް ފެށުމަށް ޖަޕާނު ކުންފުންޏަކާއެކީ އެމްއޯޔޫއެއްގައި ސޮއިކޮށްފިއެެވެ.
މިއީ ޖަޕާނު ސަރުކާރުގެ އެހީތެރިކަމާއެކު، އެގައުމުގެ ކަނަޑޭވިއާ ކުންފުންޏަކާއި ގުޅިގެން މޯލްޑިވްސް ވޯޓަރ އެންޑް ސުވަރޭޖް ކޮމްޕެނީ އިން ކުރިއަށް ގެންދާ މަޝްރޫއެކެވެ.
މީރުމާގައި ބޭއްވި ރަސްމިއްޔާތެއްގައި އެމްޑަބުލިއުއެސްސީގެ ފަރާތުން އެއްބަސްވުމުގައި ސޮއި ކުރެއްވީ އެ ކުންފުނީގެ މެނޭޖިންގ ޑިރެކްޓަރު އަބްދުލް މަތީނު މުހައްމަދުއެވެ. ކަނަޑޭވިއާ ކުންފުނީގެ ފަރާތުން ސޮއި ކުރެއްވީ ޖެނެރަލް މެނޭޖަރު ތަކޭޝީ އައިބާއެވެ.
މި މަޝްރޫއާއިއެކު، އެންއޭއެސް ބެޓެރީ ޓެކްނޮލޮޖީ ބޭނުންކޮށްގެން ސޯލާ ޕަވާޑް ސީ ވޯޓާ ޑީސެލިނޭޝަން ސިސްޓަމެއް ގާއިމުކުރެވިގެންދާއިރު، މި ނިޒާމަކީ މުޅިން އިޔާދަކުރަނިވި ހަކަތަ ބޭނުންކުރާ ނިޒާމެކެވެ.އެގޮތުން މި މަޝްރޫއުގެ ދަށުން ދުވާލަކު 500 ކިޔުބިކް މީޓަރުގެ ފެން އުފެއްދުމުގެ ގާބިލުކަން ލިބިފައިވާ އާރްއޯ ޕްލާންޓެއް ބެހެއްޓުމާއިއެކު، 500 ކިލޯވޮޓްގެ ސޯލާ ޕީވީ ސިސްޓަމެއް ގާއިމުކުރުމުގެ އިތުރުން 1450 ކިލޯވޮޓްއަވަރގެ ބެޓެރީ ސިސްޓަމެއް ގާއިމުކުރެވިގެންދާނެއެވެ.
މި މަޝްރޫއުގެ ޖުމްލަ ހަރަދަށް ބާލާއިރު، 27 އިންސައްތައަކީ ޖަޕާނުގެ ގްލޯބަލް އެންވަޔަރަންމަންޓް ސެންޓަރ ފައުންޑޭޝަން (ޖީއީސީ)އިން އެހީގެ ގޮތުގައި ހިއްސާކުރާއިރު ކެނެޑޭވިއާއިން 27 އިންސައްތަ ހިއްސާކުރެއެވެ. އަދި އެމްޑަބްލިޔުއެސްސީން 46 އިންސައްތަ ހިއްސާކުރާނެއެވެ.
