މާފުށީ ޖަލުގައި ގައިދީއަކު ނިޔާވި ގޮތް ބެލުމުގެ މަސައްކަތް ނޭޝަނަލް އިންޓެގްރީޓީ ކޮމިޝަނުން ބަލަން ފަށައިފިއެވެ.
އެ ކޮމިޝަނުން މިކަމާއި ގުޅޭ ގޮތުން މައުލޫމާތު ދެމުން ބުނީ މޯލްޑިވްސް ކަރެކްޝަނަލް ސާވިސްގެ ބެލުމުގެ ދަށުގައި ހުރި ގައިދީއަކަށް 28 އޭޕްރީލް ވަނަ ދުވަހު އެމަޖެންސީ ހާލަތެއް މެދުވެރިވުމުގެ ސަބަބުން އައިޖީއެމްއެޗް ހޮސްޕިޓަލަށް ގެންގޮސް ފަރުވާދެނިކޮށް ޖޫން 4 ވަނަ ދުވަހުގެ ރޭ 23:45 ހާއިރު ނިޔާވެފައިވާކަމުގެ މައުލޫމާތު ލިބުމާއި ގުޅިގެން އެކަން ހިނގާދިޔަ ގޮތް ދެނެގަތުމަށް ކޮމިޝަނުގެ ކުއްލި ހާލަތުގައި އިޖާބަދޭ ޓީމުން ހަރާކާތްތެރި ވަމުން ދާ ކަމަށެވެ.
އޭނާއަކީ މަސްތުވާތަކެތީ މައްސަލައެއްގައި 25 އަހަރު ދުވަހުގެ ޖަލު ޙުކުމް ތަންފީޛުކުރަމުން ދިޔަ މީހެއްކަންވެސް ކަރެކްޝަންސްއިން ވަނީ ކަށަވަރު ކޮށްދީފައެވެ. އެގޮތުން ކަރެކްޝަންސްއިން މައުލޫމާތު ދޭ ގޮތުގައި އޭނާއަކީ މިދިޔަ އޭޕްރިލް މަހު އެމަޖަންސީ ޙާލަތުގައި މާލޭ ގެނެސް އައިޖީއެމްއެޗްގައި އެޑްމިޓްކޮށް، ފަރުވާ ދޭން ފެށި މީހެކެވެ. އޭނާ ނިޔާވެފައި ވަނީ 5 ޖޫން 2025 ގެ މެންދަމު އައިޖީއެމްއެޗްގައި ފަރުވާ ދެމުންދަނިކޮށް ހިތް ހުއްޓިގެންނެވެ.
މޫސާ ޙަސަން ނިޔާވުމާ ގުޅިގެން ކަރެކްޝަންސްއިން ވަނީ ވަގުތުން އެކަން މޯލްޑިވްސް ޕޮލިސް ސަރވިސްއަށާއި އޭނާގެ ޢާއިލާއަށާއި އިންސްޕެކްޓަރ އޮފް ކަރެކްޝަނަލް ސަރވިސްއަށާއި ހިއުމަން ރައިޓްސް ކޮމިޝަން އޮފް ދަ މޯލްޑިވްސްއަށާއި ނެޝަނަލް އިންޓެގްރިޓީ ކޮމިޝަން އަށް އަންގާފައެވެ.
