އައްޑޫސިޓީ ހުޅުދޫގައި ސިޓީ ހޮޓަލެއް ޤާއިމު ކުރުމަށް ބޭނުންވާ އިންވެސްޓަރުން ހޯދުމަށް އައްޑޫ ސިޓީ ކައުންސިލްގެ އިދާރާއިން އިއުލާނުކޮށްފިއެވެ.
ސިޓީ ކައުންސިލުން ކުރި އިއުލާނެއްގައި ބުނެފައިވަނީ މި މަޝްރޫއަކީ އައްޑޫގައި ވަޒީފާގެ އިތުރު ފުރުސަތުތައް ފަހިކޮށް، ޚާއްސަކޮށް ޒުވާނުންގެ މެދުގައި ވަޒީފާއެއް ނެތް މީހުންގެ ނިސްބަތް މަދު ކުރުމާއި، އިޤްތިސާދީ ގޮތުން ކުރިއެރުމަށްޓަކައި ކުރިއަށްގެންދާ ޚާއްސަ މަޝްރޫއެއް ކަމަށެވެ.
ވަކިން ޚާއްސަކޮށް، މި މަޝްރޫއާއެކު އައްޑޫސިޓީގެ ލޯކަލް ޓޫރިޒަމް އިތުރަށް ފުޅާކޮށް އެ ދާއިރާގެ އިންވެސްޓަރުން ހޯދުމަށްވެސް ފުރުސަތު ފަހިވެގެންދާނެކަމަށް އުއްމީދު ކުރާކަމަށް ކައުންސިލުން ވަނީ ފާހަގަކޮށްފައެވެ.
އެހެންކަމުން ކައުންސިލުން ވަނީ ހުޅުދޫގައި ޓޫރިސްޓް ގެސްޓުހައުސް އަދި ސިޓީ ހޮޓާ ތަރައްޤީ ކުރުމަށް ޝައުޤުވެރިވާ އިންވެސްޓަރުންނަށް ފުރުސަތުވެސް ހުޅުވާލާފައެވެ. އެގޮތުން ރާއްޖެއާއި ރާއްޖެއިން ބޭރުގެ އިންވެސްޓަރުންނަށްވެސް ޝައުޤުވެރިކަން ފާޅުކުރުމުގެ ފުރުސަތު އޮތްކަން ކައުންސިލުން ވަނީ ފާހަގަކޮށްފައެވެ.
ސިޓީ ކައުންސިލުން މައުލޫމާތު ދޭ ގޮތުގައި ޓޫރިޒަމާ ބެހޭ ޤާނޫނުގެ ދަށުން ގެސްޓްހައުސް އަދި ސިޓީ ހޮޓާ ތަރައްޤީކުރުމަށް ބިން ދޫކުރާނީ 50 އަހަރުގެ މުއްދަތަކަށެވެ. އެހެންކަމުން ޝައުޤުވެރިވާ ފަރާތްތަކުން ޖުލައި މަހުގެ 13 ވަނަ ދުވަހުގެ ކުރިން ބިޑާ ގުޅޭ ލިއެކިއުންތައް ހުށަހެޅުމަށް ވަނީ އެދިފައެވެ.
ސިޓީ ކައުންސިލުން ހުޅުވާލާފައިވާ މި ސަރަހައްދުތަކަކީ އެއަރޕޯޓުން އަންނަ ބޭރުގެ ފަތުރުވެރިންނަށާއި ސިޓީގެ ޚިދުމަތްތަކާ ގާތުން ބޭނުންވާ ފަތުރުވެރިންނަށް ފަސޭހަ ތަނަކަށް ވެގެންދާނެއެވެ.
