މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަންގެ ބިލު އަނބުރާ ގެންދިއުމުގެ ވިސްނުމެއް ނެތްކަމަށް ބަންޑާރަނައިބު އަހުމަދު އުޝާމް ވިދާޅުވެއްޖެއެވެ. މިކަން އެމަނިކުފާނު ހާމަކުރެއްވީ ރައީސް އޮފީހުގައި ނޫސްވެރިންނާއެކު ބޭއްވި ބައްދަލުވުމެއްގައެވެ.
ބަންޑާރަނައިބު އުޝާމް ވިދާޅުވި ގޮތުގައި، މި ބިލާ ގުޅޭ މަސައްކަތްތަކެއް ކުރީގެ ރައްޔިތުންގެ މަޖިލީހުންވެސް ކޮށްފައިވެއެވެ. ”އޭރު މަޖިލީހުގެ މެންބަރެއްގެ މަގާމުގައި ހުރިއިރު، މިނިވަން މުއައްސަސާތަކާ ބެހޭ ކޮމިޓީގައިވެސް މި މަސައްކަތްތައް ކުރިއަށް ދިޔަ،“ އެމަނިކުފާނު ވިދާޅުވިއެވެ.
އުޝާމް އިތުރަށް ވިދާޅުވި ގޮތުގައި، ކަމާ ގުޅުންހުރި އިދާރާތަކުގެ މަޝްވަރާއަށްފަހު، ބަންޑާރަ ނައިބުގެ އޮފީހުން މިފަދا ބިލެއްގެ މަސައްކަތް ފަށައި، ގިނަ މަސައްކަތްތަކެއް ވަނީ ކުރެވިފައެވެ. މީގެ ކުރިން މި ބިލު ހުށަހެޅުމަށްފަހު އަނބުރާ ގެންދިއުމާއެކު، ބިލާ ގުޅޭ މަޝްވަރާތަކާއި ދިރާސާތަކެއް ބަންޑާރަ ނައިބުގެ އޮފީހުން ހަދަން ފަށާފައިވާކަން އެމަނިކުފާނު ފާހަގަކުރެއްވިއެވެ.
މިހާރު މި ހުށަހަޅާފައި އޮތް ބިލު ހުށަހެޅިފައިވަނީ އެ މަސައްކަތް ނުނިމެނީސްކަން ބަންޑާރަނައިބު ފާހަގަކުރެއްވިއެވެ. ނަމަވެސް، ބިލު އަނބުރާ ގެންދިއުމުގެ ބަދަލުގައި މަސައްކަތް ކުރިއަށް ގެންދާނީ އިތުރަށް ދިރާސާކޮށް، އިސްލާހުކުރުމުގެ މަސައްކަތްތައް ކުރުމަށްކަން އެމަނިކުފާނު ތަކުރާރުކޮށް ވިދާޅުވިއެވެ.
