ރާއްޖެއަށް ވަގަށް އެތެރެ ކުރަން އުޅެނިކޮށް، މިދިޔަ އޭޕްރިލް މަހު ހިފެހެއްޓި 13 މިލިއަނަށް ވުރެ ގިނަ ސިނގިރޭޓު އެމްޕީއެލް ބަނދަރުން ގެއްލުނު މައްސަލައިގެ ބަންދުގައި ތިބި ބައެއް މީހުން ޝަރީއަތް ނިމެންދެން ބަންދުކޮށްފި އެވެ.
40 ފޫޓުގެ ދެ ކޮންޓެއިނަރެއްގައި ހުރި 1،360 ކޭސް ސިނގިރޭޓު ގެއްލިފައިވާކަމަށް މީޑިއާތަކުގައި ފެންމަތިވީ އޮކްޓޯބަރު މަހުގެ ކުރީކޮޅެވެ. މައްސަލައިގައި ބަޔަކު ހައްޔަރުކޮށް، 12 މީހެއް ފުރުން މަނާކޮށް ވަނީ ޕާސްޕޯޓު ހިފަހައްޓާފަ އެވެ.
މި މައްސަލައިގައި ފުލުހުން ވަނީ މަޝްހޫރު ދެ ވިޔަފަރިވެރިއަކު ހިމެނޭ ގޮތަށް، 09 މީހަކު ހައްޔަރުކޮށްފަ އެވެ. އެއީ މި އަމަލު ރާވައި ފަންޑު ކުރިކަމުގެ ތުހުމަތު ކުރެވޭ އެޕޯލޯ ކުންފުނީގެ ވެރިޔާ މުހައްމަދު ވަހީދު (ދިގަލި) އާއި ލޮޓަސްގެ ވެރިޔާ އަހުމަދު އާރިފް (އާއްޓޭ) އެވެ.
މައްސަލައިގައި ދެން ހައްޔަރު ކުރީ ކަސްޓަމްސްގެ އިސް މުވައްޒަފެއްކަމަށްވާ ޒިވާރު އިސްމާއިލް އެވެ. އަދި މިފްކޯގެ އިންޖިނިއަރިން އެންޑް ޕްރޮޖެކްޓްސް ޑިޕާޓުމެންޓުގެ ޖެނެރަލް މެނޭޖަރުގެ މަގާމުގައި ހުރި މުއާޒު އަލީ އެވެ.
މި މައްސަލައިގައި ޝަރީއަތް ނިމެންދެން ބަންދު ކުރީ، އާއްޓޭއާއި، މުއާޒްގެ އިތުރުން ޒިވާރު އެވެ. އަދި އެންމެ ފަހުން ހައްޔަރު ކުރި އެމްޕީއެލް ތިން މުވައްޒަފުންގެ ތެރޭގައި ހިމެނޭ އަހުމަދު ފިރުޝާން އާއި ތިލަފުއްޓަށް ކޮންޓެއިނަރުގެ ބައިތައް ގެންދިޔަކަމުގެ ތުހުމަތު ކުރެވޭ ދޯނީގެ ކެޕްޓަން އާދަމް ވަހީދު ޝަރީއަތް ނިމެންދެން ވަނީ އަމުރުކޮށްފަ އެވެ.
ޝަރީއަތް ނިމެންދެން ބަންދު ކުރި މީހުންގެ ތެރޭގައި ދެން ހިމެނެނީ، ހަސަން އަބްދުއްރަހްމާނެވެ.
މިދިޔަ ހަފްތާގައި ބަންދުގެ މުއްދަތު ހަމަވާތީ، ކޯޓަށް ހާޒިރު ކުރުމުން ދިގަލި ކޯޓަށް ހާޒިރު ކުރުމުން އޭނާ ވެސް ޝަރީއަތް ނިމެންދެން ބަންދު ކުރީ އެވެ.
މައްސަލައިގައި ޖުމްލަ 9 މީހަކު ހައްޔަރުގައި ތިބިއިރު، އޭގެ ތެރެއިން ޝަރީއަތް ނިމެންދެން 07 މީހަކަށް ވަނީ ބަންދު ޖަހާފަ އެވެ. އަދި ބާކީތިބި މީހުންގެ ބަންދާއި މެދު ގޮތެއް ނިންމުމަށް ދެން ހާޒިރު ކުރާ މަޖިލީހެއްގައި ޝަރީއަތް ނިމެންދެން ބަންދު ކުރާނެކަމަށް ބެލެވެއެވެ.
ވަގަށް އެތެރެ ކުރަން އުޅުނު މި ސިނގިރޭޓު ކޭސްތަކުން ދައުލަތަށް ޑިއުޓީއެއްގެ ގޮތުގައި ލިބެން ޖެހޭ އަދަދު 122 މިލިއަން ރުފިޔާއަށް އަރަ އެވެ. މައްސަލައިގެ ތަހުގީގަށް މާލޭގެ އެކި ސަރަހައްދުތައް ވެސް ބަލައި ފާސްކޮށްފައި ވެއެވެ. އަދި ކ. ތިލަފުށި ބަލައި ފާސްކޮށް، ކޮންޓެއިނަރުގެ ބައިތައް ވަނީ ހޯދާފަ އެވެ.
