ސްޕެޝަލް އިކޮނޮމިކް ޒޯން (އެސްއީޒެޑް)ގެ ގާނޫނަށް އިސްލާހު ގެނައުމުގެ ބިލު ރައްޔިތުންގެ މަޖިލީހުން ފާސްކޮށްފިއެވެ.
މި ބިލު ފާސްކުރުމަށް ނެގި ވޯޓުގައި ބިލާ އެއްކޮޅަށް 46 މެންބަރުން ވޯޓު ދެއްވިއިރު، ބިލާ ދެކޮޅަށް ވޯޓު ދެއްވީ އެންމެ 3 މެންބަރުންނެވެ. ރައްޔިތުންގެ މަޖިލީހުގައި މި ބިލު ދިރާސާކުރުމުގެ މަސައްކަތް ކުރިއަށް ގެންދިޔައީ އިއްޔަރުގެ މުޅި މަޖިލީސް ކޮމިޓީގައެވެ.
ކޮމިޓީ މަރުހަލާގައި ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހުމަދު ނަސީމް ހުށައެޅުއްވި ހުށައެޅުމަކާ ގުޅިގެން ކޮމިޓީގައި ކޮންމެސް ވަރަކަށް ދެބަސްވުންތަކެއް ވަނީ ހިނގާފައެވެ. މީކާއީލް ހުށައެޅުއްވީ، ބިލާއިމެދު ޓޫރިޒަމް ދާއިރާގެ ސްޓޭކްހޯލްޑަރުންގެ ހިޔާލާއި މަޝްވަރާ ހޯދައި، އެ މަޝްވަރާތަކާއެކު ބިލުގެ މަސައްކަތް އަންނަ އަހަރުގެ ފެބްރުއަރީ މަހު ނިންމުމަށެވެ. ނަމަވެސް، ޕީއެންސީގެ ޕާލިމަންޓް ގުރޫޕުގެ ލީޑަރު އިބްރާހީމް ފަލާހު ވަނީ މިއީ ބިލު ފާސްކުރުން ލަސްކުރުމަށް ހުށައެޅި ހުށައެޅުމެއްކަމަށް ވިދާޅުވެފައެވެ.
އެސްއީޒެޑް ގާނޫނަށް ގެނެވުނު އެންމެ މުހިންމު ބަދަލަކީ އެސްއީޒެޑްގެ ގޮތުގައި އުފެއްދޭނެ ސަރަހައްދުތަކުގެ ބާވަތްތަކަށް ގެނެވުނު ބަދަލެވެ. އެސްއީޒެޑްގެ ގާނޫނުގެ 20 ވަނަ މާއްދާ މިހާރު އޮންނަ ގޮތުން އިގުތިސާދީ ހާއްސަ ސަރަހައްދެއްގެ ގޮތުގައި ގާއިމް ކުރެވޭނީ ހަމައެކަނި ސިނާއީ ސަރަހައްދުތަކެވެ. ނަމަވެސް ފާސްކުރެވުނު އިސްލާހުގެ ދަށުން އެ މާއްދާއަށް ނަންބަރެއް އިތުރުކޮށް، ”ސަސްޓެއިނަބަލް ޓައުންޝިޕް“ގެ ނަމުގައި އާ ކެޓަގަރީއެއް އިތުރުކުރެވޭނެއެވެ.
