ރައްޔިތުން ބޭނުންވީ ގޮތަށް ވަކި ކައުންސިލެއްގެ ގޮތުގައި ހިންގުން ތަންފީޒު ކުރަން ފެށުމާއި އެކު ރައްޔިތުން އެދޭ ގޮތަށް ގާތުން ހިދުމަތްތައް ދެވިގެންދާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އައްޑޫގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ރައީސް މުއިއްޒު މިއަދު އެންމެ ފުރަތަމަ ވަޑައިގަތީ ހުޅުދޫ، މީދޫއަށެވެ.
މ ޖަލްސާގައި ރައީސް ވިދާޅުވީ ރައްޔިތުންނަށް ވައުދެއްވެފައިވާނަމަ އެމަނިކުފާނު އަބަދުވެސް އިސްކަން ދެއްވާފައި ވަނީ އެ ކަންކަން ފުރިހަމަކޮށްދެއްވުމަށް ކަމަށެވެ. އަދި ރައްޔިތުންނަށް ހިދުމަތް ކުރައްވަނީ އިހުލާސްތެރިކަމާއި، އަމާނާތްތެރިކަމާއިއެކުގައިކަމަށް ވިދާޅުވި އެވެ.
ރައްޔިތުންނަށް ވެފައިވާ ވައުދުތައް ފުއްދުމަށް ކުރެވޭ މަސައްކަތްތަކާއި ގުޅޭގޮތުން ރައީސް ވިދާޅުވީ،
އިދާރީ ގޮތުން ލިބެމުން ދިޔަ ގޮންޖެހުމާއި، ބާކީކުރުން އަދި ނިކަމެތިކަމަށް ހައްލެއް ގެނައުމަށް ހުޅުދޫ، މީދޫގެ ރައްޔިތުންގެ ފަރާތުން އަބަދުވެސް ހުށަހަޅަމުން ދިޔަކަމަށް ރައީސް ވިދާޅުވި އެވެ. އެހެންވެ ރައްޔިތުންނަށް ދިން ޔަގީންކަމަކީ، އެ މައްސަލައަށް ދާއިމީ ހައްލެއް ގެނައުންކަމުގައި ފާހަގަކޮށް ރައީސް ވިދާޅުވީ އާންމު ރައްޔިތުންގެ ހިޔާލު ނެގުމުގެ ވޯޓާއި ގުޅޭ ގާނޫނެއް ގެނެވި، އޭގެ ދަށުން ނެގި ވޯޓުން ރައްޔިތުން ދިނީ ވަރަށް ސާފު ޖަވާބެއް ކަމަށެވެ.
މިއީ ފެށުމެއް، މިއީ ތަރައްގީގެ ފެށުން.. މި ދެ ރަށުގެ ރައްޔިތުން މިދިޔަ ގިނަ އަހަރު ދުވަހުގެ ތެރޭގައި އުންމީދު ކުރަމުން އައި، ނުވެ ގޮސްފައިވާ ހާސިލު ނުވެވާ ތަރައްގީ ހާސިލުކޮށްދިނުމުގައި އިރާދަކުރެއްވިއްޔާ ފެށުންގެ ގޮތުގައި އަޅުގަނޑަށް ސިފަކުރެވޭ.. އެއީ އެންމެ މުހިންމު އެއްކަމަކީ، އަސާސީ، މުނިސިޕަލް ހިދުމަތްތަކާއި، ރައްޔިތުންގެ ގާތުން ރައްޔިތުން ބޭނުންވާ ގޮތަށް ދެވޭނެ ގޮތަށް ފަހިވެގެން ދިއުން.. އެއީ ކޮންމެ ދުވަަހަކުމެ، ރަށްރަށުގެ ރައްޔިތުން ބޭނުންވާ ކަންކަން.. ރައްޔިތުން އެދޭ ގޮތަށް އެކަން ފަހިވެގެން އޮތުން.. އެކަން ހާސިލުވެގެން ދިއުމަށް ހުރިހާކަމެއް މިވަނީ ހަމަޖެހި ނިމިފަ.. އެހެންވީމަ ކުރިޔަށް އޮތް ލޯކަލް ކައުންސިލް އިންތިހާބުގައި އައްޑޫ ހުޅުދޫ، ރައްޔިތުން ރަށު ކައުންސިލް އިންތިހާބު ކުރާނެ.. އޭރުން އެ އޮތީ ރައްޔިތުންނާއި ގާތުން ހިދުމަތް ކުރުމުގެ ޒަމާން ފެށިފައި..
ވަކި ކައުންސިލްތަކެއްގެ ގޮތުގައި ހިންގުމަށް ހުޅުދޫ، މީދޫގެ ރައްޔިތުން ނިންމާފައި ވާތީ ކުރިޔަށް އޮތް ލޯކަލް ކައުންސިލް އިންތިހާބުގައި މެމްބަރުން އިންތިހާބުވެގެން ދާނީ އެގޮތުގެ މަތީންކަމަށް ރައީސް ވިދާޅުވި އެވެ.
ރައީސް ވިދާޅުވީ ރައްޔިތުން އެންމެ ބޭނުންވާނީ އަސާސީ ކަންކަން، މުނިސިޕަލް ހިދުމަތްތައް ހިމެނޭ ގޮތަށް ރައްޔިތުންނާއީ ވީހާވެސް ގާތުން ފުރިހަމަވެގެން ދިއުން ކަމަށެވެ. އަދި ސަރުކާރުން ބޭނުންވާ ގޮތަކީ ވެސް، ރައްތިތުން އެދޭ ގޮތަށް ކަންކަން ފަހިވެގެން ދިއުންކަމަށް ރައީސް ވިދާޅުވި އެވެ.
