ދިވެހި ގައުމީ ދިފާއީ ބާރު (އެމްއެންޑީއެފް)ގެ އެންމެ ފުރަތަމަ އެއާ ސްޓޭޝަން އައްޑޫ ގަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިފްތިތާހުކޮށްދެއްވައިފިއެވެ.
ގަން އެއަރ ސްޓޭޝަން އިފްތިތާހު ކުރުމުގެ ރަސްމިއްޔާތުގައި ރައީސް ވިދާޅުވީ ދިވެހިރާއްޖޭގެ މިނިވަންކަން ޔަގީންކޮށް ކަށަވަރުކޮށް ޖީލުތަކަށް ފޯރުކޮށްދިނުމުގައި މޯލްޑިވްސް ނޭޝަނަލް ޑިފެންސް ފޯސްގެ ހުރިހާ ދާއިރާއަކުން ވެސް ކަންތައްތައް ފުރިހަމަ ކޮށްދީ، ތަރައްގީކޮށްދިނުމަކީ ދިވެހި ކޮންމެ ރައްޔިތެއްގެ ވެސް އުންމީދަކަށް ވާނެ ކަމަށެވެ.
ރިޔާސީ ދައުރުގެ ތެރޭގައި އެންމެ ފުރަތަމަ ރައްޔިތުންނާއި މުހާތަބުކޮށް ދެއްކެވި ވާހަކަފުޅުގައި ދިވެހި މިނިވަންކަމުގެ އަދި ދިވެހި ގައުމުގެ މިނިވަންކަން ހިމާޔަތް ކުރުމުގެ ފަލަ ރަތް ރޮނގެއް މި ސަރުކާރުގެ ސިޔާސަތެއްގެ ގޮތުގައި ކަނޑައަޅައި އެކަން ދަމަހައްޓާނެ ކަން ކަށަވަރުކުރާނެ ކަން އޭރު އިއުލާނު ކުރައްވާފައިވާކަމަށް ރައީސް ވިދާޅުވިއެވެ.
އެމްއެންޑީއެފްގެ ހުރިހާ ދާއިރާއަކުންވެސް އޭރުގެ އޮތް ހާލަތު އޮތީ ރަނގަޅުކުރަން ޖެހިފައިކަމަށް ރައީސް ވިދާޅުވިއެވެ. މިއަދާއި ހަމައަށް އައި އިރު ގިނަ މަސައްކަތްތަކެއް ކުރެވިފައިވާ ކަމަށް ރައީސް ވިދާޅުވިއެވެ. އެއާރކޯ އުފެއްދި، އެއާރކޯއަށް ޒަމާނީ ވަސީލަތްތައް ހޯދައި، އެ ވަސީލަތްތައް ބޭނުން ކުރެވޭނެ މަގު ފަހިކުރުމުގެ މަސައްކަތްވެސް ކުރެވެމުން ދާ ކަމަށް ރައީސް ވިދާޅުވިއެވެ.
”މިއަދު މި ހުޅުވިގެން ދިޔަ އެއަރ ސްޓޭޝަނަކީ މިގޮތުން ވަރަށް މުހިންމު އިންފްރާސްޓްރަކްޗަރގެ މަސައްކަތެއް. މުޅި ރާއްޖެ ވައިގެ މަގުން ބެލެހެއްޓުމުގައި އެއަރކޯއަށް ލިބިގެން ދިޔަ ވަރަށް މުހިންމު ކުރިއެރުމެއް. ރިޔާސީ ބަޔާން އިއްވިއިރުގައި އަޅުގަނޑު ދެންނެވިންް، ރާއްޖޭގެ އުތުރާއި ދެކުނުގައި މިފަދަ މަރުކަޒުތައް ސްޓޭޝަންތައް ހަދާނެ ކަމަށް. އެގޮތުން މިއަދު މިތަން ހުޅުވިގެން މިދިޔައީ“
ރައީސް ވިދާޅުވީ މިއަހަަރު ނިމެންވާއިރަށް އުތުރުގައި، ށ. ފުނަދޫގައި ގާއިމްކުރާ މަރުކަޒުވެސް ބާރު ސްޕީޑުގައި ކުރިއަށް ދާ ކަމަށެވެ. ރައީސް ވިދާޅުވީ އިތުރު ވަސީލަތްތައް ހޯދައިދިނުމަކީ ސަރުކާރުން މިހާރު ފަށާފައިވާ މަޝްރޫއުއެއް ކަމަށެވެ.
އެމްއެންޑީއެފުން ބުނީ 400 މީޓަރުގެ ޓެކްސީވޭއަކާއި 100 މީޓަރުގެ އޭޕްރަންއެއް އޮންނަ މި އެއާ ސްޓޭޝަންގައި ސިފައިންނަށް ތިބެވޭނެ އިންތިޒާމު ހަމަޖެހިފައިވާނެ ކަމަށެވެ. މި އެއާ ސްޓޭޝަން ގާއިމްކުރި ސަރަހައްދަކީ އިސްތިރާޖީގޮތުން މުހިންމު ސަރަހައްދެއް ކަމަށްވެސް އެމްއެންޑީއެފުން ބުންޏެވެ.
