ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ”ދިވެހީންގެ ރާއްޖެ“ ގެ ނަމުގައި ބޭއްވި ބިޔަ ޖަލްސާއަކީ، ފަހުގެ ތާރީޚުގައި ރާއްޖޭގެ ސިޔާސީ މަޝްރަޙުގައި ފެނިގެންދިޔަ އެންމެ ބޮޑު އެއްވުމެވެ. ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ. މުޙައްމަދު މުޢިއްޒުގެ ވިދާޅުވެފައިވާ ގޮތުން، ޖަލްސާގައި 13,000 އަށްވުރެ ގިނަ ރައްޔިތުން ބައިވެރިވިއެވެ.
މިފަދަ ތާއީދެއް ސަރުކާރަށް ލިބިފައިވާކަން ހާމަވުމާއެކު، ސިޔާސީ މަޝްރަޙަށް ވަނީ މުހިންމު ބަދަލެއް އައިސްފައެވެ. މި ބިޔަ ޖަލްޖަލްސާގެ ސަބަބުން، ވާދަވެރި ސިޔާސީ ޕާޓީތަކަށް ކުރިމަތިވެފައިވާ ގޮންޖެހުންތަކާކާއި، ކުރިއަށް އޮތް ދުވަސްތަކުގައި އެ ޕާޓީތަކުން ގެންގުޅެންޖެހޭނެ ސްޓްރެޓެޖީތަކާ މެދު ސުވާލު އުފެދެއެވެ. ޕީއެންސީގެ މި ބާރުގަދަ މަންޒަރުގެ ކުރިމަތީގައި ވާދަވެރިންނަށް ޙަޤީޤަތުގައިވެސް ވާދަކުރެވޭނެ ގޮތެއް އޮތްތޯއެވެ؟
މި ޖަލްސާ ބޭއްވިފައިވަނީ ރައީސް މުޢިއްޒުގެ ވެރިކަމަށް ދެ އަހަރު ފުރުމާ ދިމާކޮށެވެ. އާޓިފިޝަލް ބީޗް ސަރަޙައްދު އެއްކޮށް ފުރި، ބޮޑުތަކުރުފާނު މަގާއި މަޖީދީ މަގުގެ ބައެއް ހިސާބުތައްވެސް އެއްކޮށް ފުރިފައިވާ މަންޒަރުތައް ފެނިގެންދިޔައީ، ޕީއެންސީގެ ސިޔާސީ ނުފޫޒުގެ ފުޅާމިން ހާމަކޮށްދިން ހެކިތަކެވެ
. ރާއްޖޭގެ ސިޔާސީ ތާރީޚުގައި މިހާ ގިނަ އަދަދެއްގެ ބަޔަކު ބައިވެރިވި ޖަލްސާއެއް މީގެ ކުރިން ނުބޭއްވޭކަމަށް ރައީސް މުޢިއްޒު ފާހަގަކުރެއްވިއެވެ. މި ބޮޑު އެއްވުމަކީ ހަމައެކަނި ޕާޓީގެ ބޮޑުމިން ދައްކާލުމަށް ބޭއްވި އެއްވުމެއްގެ ބަދަލުގައި، ސަރުކާރުގެ ސިޔާސަތުތަކަށް ރައްޔިތުންގެ ފަރާތުން ލިބިފައިވާ ފުރިހަމަ ތާއީދު ދައްކުވައިދިން ކާމިޔާބީގެ ޖަލްސާއެކެވެ. މިފަދަ ބޮޑު އެއްވުމަކަށްފަހު، ވާދަވެރި ޕާޓީތަކަށްވެސް މިފަދަ ފުޅާ ތާއީދެއް ހޯދުމަށް މަސައްކަތްކުރުމަށް ވަނީ މަޖުބޫރުވެފައެވެ.
މީގެކުރިން ބޭއްވި ބޮޑެތި ސިޔާސީ އެއްވުންތަކުގައި، ލީޑަރުންގެ ތަޤުރީރުތަކުން ގިނައިން ފެނިފައިވަނީ ވާދަވެރިންނަށް ބަހުގެ ހަމަލާތައް އަމާޒުކުރުމާއި، ސިޔާސީ ފުރައްސާރައެވެ. ނަމަވެސް، ރައީސް މުޢިއްޒުގެ ތަޤުރީރުގައި އެމަނިކުފާނު ވަނީ ސިޔާސީ ވާދަވެރިންނަށް ފާޑުކިޔުމުގެ ބަދަލުގައި، ޤައުމީ ތަރައްޤީއާއި، ސަރުކާރުގެ ދުރު ރާސްތާ އަމާޒުތަކަށް އަލިއަޅުވާލައްވާފައެވެ.
ސިޔާސީ ވާދަވެރިކަމުގެ މާޙައުލަށް ތަހުޒީބީ ރޫޙެއް ގެނައުމަށް ޕީއެންސީން ކުރި މި މަސައްކަތަކީ، ރާއްޖޭގެ ސިޔާސީ މަޝްރަޙަށް އަންނަމުންދާ މުހިންމު ބަދަލެކެވެ. މިކަމުގެ ސަބަބުން، ވާދަވެރިންނަށްވެސް މަޖުބޫރުވާނީ ސިޔާސީ ޚިޠާބުތައް އަމާޒުކުރާ ގޮތް ބަދަލުކޮށް، ޕްލެޓްފޯމްތަކުގައި ވާދަވެރިކަން ދައްކަންޖެހޭނީ ސިޔާސަތުތަކާއި ވިސްނުންތަކުގެ އަލީގައިކަން ދައްކުވައިދެއެވެ.
ޕީއެންސީން މި ދައްކާލި ބާރަކީ، ޚާއްޞަކޮށް އިދިކޮޅު އެމްޑީޕީއަށް ވަރަށް ބޮޑު ގޮންޖެހުމެކެވެ. މިހާ ފުޅާ ތާއީދެއް ޕީއެންސީއަށް ލިބިފައިވާކަން ހާމަވުމާއެކު، އިދިކޮޅު ފަރާތްތަކުން މިހާރު ގެންގުޅޭ ސިޔާސަތުތައް އަލުން މުރާޖަޢާކުރަން ޖެހިފައިވެއެވެ. އެއް ގޮތަކީ، ޕީއެންސީއާ އެއްވަރަށް ބޮޑެތި ޖަލްސާތައް ބޭއްވުމަށް މަސައްކަތްކުރުމެވެ. ނަމަވެސް، މިހާ ބޮޑު އަދަދެއްގެ ބަޔަކު އެއްކުރުމަކީ ފަސޭހަކަމަކަށް ނުވާނެއެވެ.
އަނެއް ގޮތަކީ، ސިޔާސީ ވާދަވެރިކަން ދައްކާލުމަށްޓަކައި، ޖަލްސާތަކުގެ ބަދަލުގައި، ރައްޔިތުންގެ ދިރިއުޅުމަށް ސީދާ އަސަރުކުރާނެ ސިޔާސަތުތަކާއި، ޕީއެންސީގެ ސަރުކާރުގެ މަސައްކަތްތަކަށްވުރެ ހަރުދަނާ ޙައްލުތަކެއް ހުށަހެޅުމެވެ.
އިދިކޮޅު ޕާޓީތަކަށް ވާދަކުރެވޭނެ އެންމެ އެކަށީގެންވާ ގޮތަކީ، ޕީއެންސީގެ ޢަދަދީ ބާރާ ވާދަކުރުމުގެ ބަދަލުގައި، ޕީއެންސީގެ ވިސްނުމާ ވާދަކުރުމެވެ. ރައްޔިތުންގެ މެދުގައި ޕީއެންސީއަށް އޮތް ތާއީދު ފުޅާ ނަމަވެސް، ސިޔާސީ މަޝްރަޙު އަބަދުވެސް ބަދަލުވަމުން އަންނަ އެއްޗެކެވެ.
ވާދަވެރިންނަށް މިހާރު ބޭނުންވަނީ، ރައްޔިތުންގެ އިތުބާރު ހޯދުމަށްޓަކައި، ޤަބޫލުކުރެވޭނެ، އައު އަދި ވަރުގަދަ ސިޔާސީ ޕްރޮގްރާމްތަކެއް ހުށަހެޅުމެވެ. ޚާއްޞަކޮށް، ޕީއެންސީގެ ވެރިކަމުގެ ދެ އަހަރުގެ ތެރޭގައި ހުރި ބައެއް ގޮންޖެހުންތަކާއި، ރައްޔިތުންގެ ޝަކުވާތަކަށް ޙައްލު ހޯދައިދޭނެ ގޮތްތައް ހާމަކުރުމަކީ މުހިންމު ކަމެކެވެ.
އިދިކޮޅު ޕާޓީތަކުން އިސްކަންދޭންޖެހޭނީ ހަމައެކަނި ސަރުކާރުގެ ކަންކަމަށް ފާޑުކިޔުމަށްވުރެ، ޤައުމަށް ކުރިމަތިވެފައިވާ ގޮންޖެހުންތަކަށް އެފަރާތްތަކުން ހުށަހަޅާ ޢަމަލީ ޙައްލުތައް ރައްޔިތުންނާ ހިއްސާކުރުމަށެވެ.
ޕީއެންސީގެ މި ބޮޑު ޖަލްސާއާއެކު، ރާއްޖޭގެ ސިޔާސީ ޕްލެޓްފޯމްތައް ބަދަލުވަމުންދާކަން ފާހަގަކުރެވެއެވެ. ކުރީގެ ސިޔާސީ ޕްލެޓްފޯމްތަކުގައި ބޮޑަށް ފެނިގެންދިޔައީ އަނެއް ޕާޓީއަށް ފާޑުކިޔުމާއި، ވަކި ފަރުދުންނަށް އަމާޒުކުރެވޭ ޚިޠާބުތަކެވެ. ނަމަވެސް، ޕީއެންސީގެ މި ޖަލްސާގައި ފެނިގެންދިޔައީ ޤައުމީ މަޞްލަޙަތަށް އިސްކަންދޭ، ޕޮލިސީ-ކެންޓްރިކް ޚިޠާބުތަކެކެވެ. މިއީ ރާއްޖޭގެ ސިޔާސީ މަޝްރަޙުގައި ފެންނަމުންދާ ހިތްވަރުދެނިވި ބަދަލެކެވެ.
ވާދަވެރި ޕާޓީތަކުންވެސް މިފަދަ ޕްލެޓްފޯމްތަކަށް ބަދަލުވުމަކީ، ރާއްޖޭގެ ޑިމޮކްރެސީ ހަރުދަނާވުމަށް އެޅިގެންދާނެ މުހިންމު ފިޔަވަޅެކެވެ. ރައްޔިތުންވެސް މިހާރު ބޭނުންވަނީ ޕާޓީތަކުގެ ސިޔާސަތުތަކާއި ވިސްނުންތައް އަޅާކިޔައި، އެންމެ ރަނގަޅު ފަރާތަކަށް ވޯޓުދިނުމުގެ ފުރުޞަތެވެ. ޕީއެންސީގެ މި ޖަލްސާއިން ދައްކާލީ، ސިޔާސީ ވާދަވެރިކަން ދައްކަންޖެހޭނީ ހަމައެކަނި ޢަދަދުން ނޫންކަމާއި، ސިޔާސަތުތަކުގެ ފެންވަރުންވެސް ވާދަކުރަންޖެހޭކަމެވެ.
ޕީއެންސީގެ މި ބޮޑު ޖަލްސާއަށްފަހު، ކުރިއަށް އޮތް ސިޔާސީ މަޝްރަޙުގައި ވާދަވެރިންނަށް ވާދަކުރެވޭނީ ކިހިނެއްތޯ ސުވާލު އުފެދެއެވެ. ޙަޤީޤަތުގައި، ސިޔާސީ ވާދަވެރިކަމުގައި ކާމިޔާބުވުމަށް ބޭނުންވަނީ ހަމައެކަނި ބޮޑެތި ޖަލްސާތައް ބޭއްވުމެއް ނޫނެވެ.
ސިޔާސީ ވާދަވެރިކަމުގައި ކުރިއަށްދިއުމަށް އެންމެ މުހިންމީ، ޕާޓީގެ އިންޓަރނަލް ސްޓްރަކްޗަރ ހަރުދަނާކޮށް، ޕާޓީގެ މެންބަރުންގެ މެދުގައި އޮންނަ ގުޅުން ބަދަހިކުރުމެވެ. ޕީއެންސީގެ ފަދަ ބޮޑު ޖަލްސާއެއް ބޭއްވުމަށް ކުރަންޖެހޭ މަސައްކަތަކީ، ޕާޓީގެ އިންތިޒާމްތައް ހަރުދަނާކަމާއެކު ރޭވިފައިވާކަން ދައްކުވައިދޭ ހެއްކެކެވެ.
ޕީއެންސީގެ ”ދިވެހީންގެ ރާއްޖެ“ ޖަލްސާއަކީ، އެ ޕާޓީގެ ސިޔާސީ ބާރާއި، ރައީސް މުޢިއްޒުގެ ވެރިކަމަށް ރައްޔިތުންގެ ފަރާތުން ލިބިފައިވާ ތާއީދު ފުރިހަމައަށް ދައްކުވައިދިން ތާރީޚީ މަންޒަރެކެވެ. މިއީ ސިޔާސީ ވާދަވެރިކަމުގެ މިންގަނޑު މަތިކޮށްލި އެއްވުމެކެވެ. މި ފުޅާ ތާއީދުގެ ކެ ކުރިމަތީގައި، އިދިކޮޅު ޕާޓީތަކަށް ވާދަކުރެވޭނީ ހަމައެކަނި ޢަދަދުގެ ބަދަލުގައި، ސިޔާސަތުތަކުގެ ފެންވަރާއި، ޤައުމަށްޓަކައި ހުށަހަޅާ ވިސްނުންތަކުގެ ފުންމިނުންނެވެ.
