އެހެން ގާނޫނުތަކާއި ހިލާފުވުމުން، އެއްގަމު އެއްގަމު ދަތުރުފަތުރުގެ ގާނޫނުގެ ދަށުން ލައިސަންސް ބާތިލް ކުރެވޭ ގޮތަށް އޮތުމުން އެމްޑީޕީގެ ޕާލިމަންޓު ގުރޫޕުގެ ލީޑަރު، ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް ކަންބޮޑުވުން ފާޅު ކުރައްވައިފިއެވެ.
އެއްގަމު ދަތުރުފަތުރުކުރުމުގެ ގާނޫނަށް ހުށައަޅާފައިވާ އިސްލާހަށް ބަހުސްކުރައްވަމުން ނާޒިލް ވިދާޅުވީ، މި އިސްލާހުގައި ލައިންސަންސް ހިފެހެއްޓުމާއި ނުވަތަ ބާތިލުކުރުން ހިމަނާފައިވާ ގޮތާއިމެދު ވަރަށް ބޮޑެތި ކަންބޮޑުވުންތަކެއް އެބަހުރިކަމަށެވެ. އެހެން ގާނޫނަކާއި ހިލާފުވެއްޖެ ހާލަތެއްގައި ލައިސަންސް ހިފެހެއްޓުމާއި ބާތިލްކުރުން އެއީ އޭނާ ގަބޫލުކުރާ ގޮތެއް ނޫންކަމަށް ވިދާޅުވިއެވެ.
އެގޮތުން ގާނޫނުގައި އެހެން އޮވެއްޖެނަމަ، ޓެކްސީ ޑްރައިވަރުން ނިކުމެ ހަޅުތާލު ނޫނީ އެއްވެ އުޅުމުގެ ތެރެއިންވެސް ލައިސަންސް ބާތިލް ކުރެވޭ ހާލަތްތައް ފެންމަތިކުރެވޭނެކަމަށް ވިދާޅުވިއެވެ.
މިއީ އަޅުގަނޑުމެން ވިސްނަން ޖެހޭ ހިސާބު. ގާނޫނުގައި އެބަހުރި މިކަހަލަ އަދި 65 ވަނަ މާއްދާގައިވެސް އަޅުގަނޑަށް ފާހަގަކުރެވޭ. އަޅުގަނޑު ގަބޫލުކުރާ ގޮތުގައި ގާނޫނެއް، ވަރަށް ބައިވަރު މާއްދާތަކެއް އެކުލެވިގެންވާ ގާނޫނެއް، މި ގާޏޫނު ހުށައަޅުއްވައިދެއްވަމުންވެސް އިއްޒަތްތެރި މެންބަރުވެސް ފާހަގަކުރެއްވި.
ނާޒިލް ވިދާޅުވިއެވެ.
ނާޒިލް ވަނީ ޕާކިންގެ މައްސަލައަށްވެސް ވާހަކަދައްކަވާފައެވެ. އެގޮތުން ޕާކުކުރާއިރު، ވަކި ތަނެއް ނުބަލާ ކުރުމުގެ ސަބަބުން ދެން އަންނަ މީހާއަށް އުދަގޫވާކަމަށް ފާހަގަކުރެއްވިއެވެ. އައްޑޫ ސިޓީގައިވެސް މި މައްސަލަ އެބައޮތްކަމަށް ފާހަގަކުރެއްވިއެވެ. ލައިންސަންސް ދޫކުރާއިރަށް، ޓެކްސީ ޑްރައިވަރެއްގެ ގޮތުގައި މަސައްކަތްކުރުމަކީވެސް މައްސަލައެއްކަމަށް ނާޒިލް ފާހަގަކުރެއްވިއެވެ. އެއީ ވަކި ހަމަތަކެއް އުސޫލުތަކެއް ދަސްކޮށްގެންވާނެ ކަންތައްތައްކަމަށް ފާހަގަކުރެއްވިއެވެ.
އެހެންކަމުން ލައިސަންސެއް ދޫކުރާއިރު، ކުރެވޭނެ ކަންތައްތަކާއި ނުކުރެވޭނެ ކަންތައްތައް ހިމަނާފައި ހުންނަން ޖެހޭކަމަށް ފާހަގަކޮށް ނާޒިލް ވިދާޅުވީ، ކޮމިޓީ މަރުހަލާގައި ވާހަކަދައްކާ ހައްލު ގެންނަން ޖެހޭ ކަންތައްތަކެއް މި އިސްލާހުގައި ހިމެނޭކަމަށެވެ.
ނާޒިލް ފާޙަގަކުރެއްވި 66 ވަނަ މާއްދާގައި ވަނީ، އާންމު ދަތުރުފަތުރު ކުރުމުގެ ހިދުމަތް ދިނުމުގެ ލައިސަންސް ލިބިފައިވާ ފަރާތަށް މިނިސްޓްރީއިން ލިޔުމަކުން ނޯޓިސް ދިނުމަށްފަހު، އެ ފަރާތަކަށް ދޫކޮށްފައިވާ ލައިސަންސް ހިފެހެއްޓުމުގެ ނުވަތަ ބާތިލް ކުރުމުގެ އިހުތިޔާރު މިނިސްޓްރީއަށް ލިބިގެންވާކަމަށެވެ. އެގޮތުން ލައިސަންސް ލިބިފައިވާ ފަރާތުން މި ގާނޫނާއި ނުވަތަ އެ ގާނޫނުގެ ދަށުން ހަދާ ގަވާއިދަކާ ނުވަތަ އެ ފަރާތުން އަމަލުކުރަން އެހެން ގާނޫނަކާއި ހިލާފުވުން ހިމެނެއެވެ. އަދި މި ގާނޫނުގެ 63 ވަނަ މާއްދާގެ ދަށޫން ނުވަތަ 64 ވަނަ މާއްދާގެ ދަށުން ލައިސަންސްގައި ކަނޑައަޅާފައިވާ ޝަރުތަކާއި ހިލާފުވުންވެސް ހިމެނެއެވެ.
ކުރެންދޫ ދާއިރާގެ މެންބަރު، މުހައްމަދު ޝާމިން ހަބީބު ހުށަހެޅުއްވި މި ބިލުގެ މައިގަނޑު މަޤްޞަދަކީ މަގުތަކުގެ ސަލާމަތްތެރިކަން އިތުރުކުރުމާއި، ދަތުރުފަތުރުގެ ޤާނޫނާއި ގަވައިދުތައް ބައިނަލްއަޤްވާމީ މިންގަނޑުތަކާ އެއްގޮތްކުރުމެވެ.
މި ބިލުގައި ހިމެނޭ އެންމެ މުހިންމު ބަދަލުތަކުގެ ތެރޭގައި ޑީމެރިޓް ޕޮއިންޓް ސިސްޓަމެއް ތައާރަފުކުރުމާއި، ބޭރު ޤައުމުތަކުގައި ދިވެހިންނަށް އުޅަނދު ދުއްވުމުގެ ހުއްދަ ދިނުމުގެ އުސޫލުތައް ހިމެނެއެވެ.
