ހަރަދުތައް ކުޑަކުރުމުގެ ގޮތުން ސަރުކާރުން މިހާތަނަށް ޒިންމާދާރުކަމާއި އެކު އެެޅި އެއްވެސް ފިޔަވަޅެއް ނުވަތަ ރަނގަޅު ގޮތުގައި ތަންފީޒު ކުރެވުނުކަމެއް ނެތްކަމަށް ވައިކަރަދޫ ދާއިރާގެ މެމްބަރު ހުސެއިން ޒިޔާދު ވިދާޅުވެއްޖެ އެވެ.
ޒިޔާދު މިހެން ވިދާޅުވީ ސަންގުޓީވީގެ ޚަބަރަށްފަހު ޕްރޮގްރާމުގައި ވާހަކަ ދައްކަވަމުންނެވެ.
ސަރުކާރުގެ ހަރަދު ކުޑަކުރުމުގެ ސިޔާސަތުގެ ދަށުން އެކި ފިޔަވަޅުތައް އިއުލާނު ކުރިއިރު، ޒިޔާދު ވަނީ އެ މަސައްކަތްތައް ގޮސްފައިވާ ހިސާބާއި މެދު ސުވާލު އުފައްދާފަ އެވެ.
ޒިޔާދު ވިދާޅުވީ، ހަރަދު ކުޑަކުރުމުގެ ނަމުގައި ކުރިން އުވާލި ކުންފުނިތަކުގެ ބަދަލުގައި، އިތުރު އެހެން ދާއިރާތަކާއި ގުޅުން ހުރި ބޭނުމެއް ނެތް ކުންފުނިތައް އުފެއްދުމުން ސަރުކާރުގެ އެއްވެސް ޕްލޭނެއް ނެތްކަން އެނގިގެން ދާކަމަށެވެ. އެގޮތުން ގާޅާ ކުންފުންޏަކާއި ބޭސް ގަންނަ ކުންފުންޏަކާއި އަދި ހައުސިންގ ކޮންސްޓްރަކްޝަން ކުންފުންޏެއް އުފައްދާފައިވާއިރު ސަރުކާރުން ދައްކާ ވާހަކަތައް ހަމަނުޖެހޭކަމަށް ޒިޔާދު ވިދާޅުވި އެވެ.
ޒިޔާދު ވަނީ، ސަރުކާރުގެ މާލީ ސިޔާސަތުތަކަށް ވެސް ވަރަށް ބޮޑަށް ފާޑުވިދާޅުވެފަ އެވެ. ޒިޔާދު ފާހަގަކުރެއްވި ގޮތުގައި، މި ސަރުކާރުގެ ޓްރާންސިޝަން މުއްދަތުގައި ފާސްކުރީ 19 ވަނަ މަޖިލީހުން ހަދާފާއިވާ ބަޖެޓެކެވެ. އެމްޑީޕީން ސަރުކާރަށް ޖެއްސުން ކުރުމަށް ބަޖެޓުގެ ބައިތައް އުނިކުރިކަމަށް ވާހަކަ ދެކެވުނުނަމަވެސް ޒިޔާދު ވިދާޅުވީ ފުށިދިއްގަރަށް ކަނޑައެޅި ބަޖެޓު އުނިކުރި ނަމަވެސް އެ އަދަދު ބަޖެޓުގައި ބެހެއްޓުމަށްފަހު، އެހެން ހިއްކާފައިވާ ސަރަހައްދުތަކުގައި ނަރުދަމާގެ ނިޒާމު ގާއިމުކޮށް، ހިއްކަންޖެހޭ ތަންތަން ހިއްކުމަށް ބަދަލުކުރެވުނު ކަމަށެވެ.
އަންނަ އަހަރަށް ފާސްކުރި ބަޖެޓަށް ފާޑުކިއުން އަމާޒުކޮށް ޒިޔާދު ވިދާޅުވީ، ސަރުކާރުގެ މެމްބަރުން މިއީ އުންމީދީ ބަޖެޓެއްކަމަށް ބުނަމުން ދިޔަ ނަމަވެސް އެއީ ހަގީގަތެއް ނޫންކަމަށެވެ. މިއީ ތަފްސީލެއް ނެތި މިގޮތަށް މަޖިލީހުގައި ފާސްކުރި ފުރަތަމަ ބަޖެޓުކަމަށް ޒިޔާދު ވިދާޅުވި އެވެ.
ޒިޔާދު ވިދާޅުވީ ތަފްސީލެއް ނެތް ބަޖެޓަކުން ވައުދު ފުއްދާނެ ގޮތެއް ނޭނގޭކަމަށާއި، ރައްޔިތުން ތިބެން ޖެހޭނީ ވާނުވާއެއްގެ ތެރޭގައިކަމަށެވެ. ރިޔާސީ އިންތިހާބުގައިވީ ހުރިހާ ވައުދެއް ފޮތެއްގެ ސިފައިގައި އާންމުކުރިއިރު އޭގައި ހުރި ކަންތަކުން މިހާތަނަށް ފުއްދައިދެވިފައި ވަނީ ކިތަށް ވައުދުތޯ ވެސް އޭނާ ސުވާލު އުފެއްދި އެވެ.
ޒިޔާދު ވިދާޅުވި ގޮތުގައި، 2026 ގެ ބަޖެޓަކީ ރާއްޖޭގެ ތާރީހުގައި މިހާތަނަށް ހުށަހެޅުނު އެންމެ ބޮޑު ބަޖެޓެވެ. ނަމަވެސް ސަރުކާރުން މި ބަޖެޓަކީ ކުރީ އަހަރުގެ ބަޖެޓަށްވުރެ ކުޑަ ބަޖެޓެއްކަމަށް ދެއްކުމަށް މަސައްކަތްކުރާކަމަށް ވިދާޅުވި އެވެ.
ޒިޔާދު ވިދާޅުވީ ދަރަނި އުނިކޮށްފިނަމަ ބަޖެޓުގެ ކުޑަވާނެކަމަށް ބުނުމުން ދެވެނީ ގޯސް މައުލޫމާތެއް ކަމަށެވެ. އެއީ ބަޖެޓަކީ އާމްދަނީ އާއި ހަރަދާއި ދަރަނި ހިމެނޭ ތަފްސީލީ ރިޕޯޓެއްކަމުގައި ވާތީކަމަށް ޒިޔާދު ވިދަޅުވި އެވެ.
ޒިޔާދު ވިދާޅުވީ ސަރުކާރަށް ހަރަދު ކުޑަކުރުމަށް އެއްވެސް މަސައްކަތެއް ކުރެވިފައިނުވާކަމަށާއި، ގައުމިއްޔަތު މިނިސްޓްރީއަށް ބޮޑު ބަޖެޓެއް ދީފައިވާއިރުވެސް އެ މިނިސްޓްރީން ރައްޔިތުންނަށް ފައިދާ ހުރި އެއްވެސް މަސައްކަތެއް ކުރިތަން ފެނިފައި ނުވާކަމަމަށެވެ. ޒިޔާދު ވަނީ ސަރުކާރުގެ ވައުދުތަކާއި، އަދި ހުށަހަޅާ ބަޖެޓާއި މެދު ވެސް އިހުލާސްތެރިކަމެއް ނެތްކަމަށް ވިދާޅުވެފަ އެވެ. އަދި ސަރުކާރުގެ އެއްވެސް އިހުލާސްތެރިކަމެއް ނެތްކަމަށާއި، ދޮގު ވައުދުތަކުގެ ސަބަބުން ރައްޔިތުންގެ އިތުބާރު ގެއްލިފައިވާކަމަށް ވިދާޅުވި އެވެ.
