އެމްޑީޕީގެ ޗެއާޕާސަންގެ އިންތިހާބުގައި ވާދަކުރައްވަން ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް އިއުލާނު ކުރައްވައިފި އެވެ.
ޕާޓީގެ އެތޭރޭގައި އޮތް ހިޔާލުތަފާތުވުންތަކުގެ ސަބަބުން، އެމްޑީޕީއަށް ވަގުތީ ޗެއާޕާސަންއެއް ހަމަޖެއްސުމަށް އޮތް ގައުމީ މަޖިލިސް ވެސް ހޫނުވެ ރޭ ވަނީ ބައްދަލުވުން ނިންމާލާފަ އެވެ.
އެމްޑީޕީގެ ޗެއާޕާސަންކަމުގައި ގާތްގަނޑަކަށް ހަތަރު އަހަރު ހުންނެވުމަށް ފަހު، އެ މަގާމުން ފައްޔާޒް އިސްމާއިލް ވަނީ މި ހަފްތާގައި އިސްތިއުފާ ދެއްވާފަ އެވެ. ފައްޔާޒް މަގާމުން އިސްތިއުފާ ދެއްވީ އަންނަ އަހަރު ބާއްވާ ޕާޓީގެ ރިޔާސީ ޕްރައިމެރީގައި ވާދަކުރެއްވުމަށެވެ.
ޗެއާޕަސަނަކު އިންތިހާބު ކުރުމާއި ގުޅޭގޮތުން ޕާޓީން އަދި މިހާތަނަށް އިއުލާނުކޮށްފައި ނުވެއެވެ. އެހެން ނަމަވެސް އެ މާގަމަށް ވާދަކުރައްވާނެކަމަށް މީކާއިލް މިރޭ ވަނީ އިއުލާނު ކުރައްވާފަ އެވެ. އަދި މީކާއިލް ޗެއާޕާސަންކަމަށް ވާދަކުރައްވަނީ ޕާޓީގެ ތެރެއިން ޒުވާނުންނަށް ފުރުސަތު ލިބެން ޖެހޭކަމަށް ބުނެ ބައެއް ފަރާތްތަކުން މީކާއިލް އެ މަގާމަށް ގެނައުމަށް ގޮވާލާފައި ވަނިކޮށެވެ.
މީކާއިލް ވިދަޅުވީ އެމްޑީޕީގެ ލީޑާޝިޕްއިން އާ ޖީލަކަށް ހޯދުމުގެ މި މުހިންމު މަސައްކަތުގައި އެ ޕާޓީގެ އާންމު މެމްބަރުންގެ އެއްބާރުލުމާއި ތާއީދަށް އެދޭކަމަށެވެ.
