ފުލުހުންގެ ހިދުމަތް ގާއިމުކުރުމަށްޓަކައި އިމާރާތްތައް ގާއިމުކުރުމަށްޓަކައި ކުރިޔަށް ގެންދާ މަޝްރޫއުތަކުގެ މަސައްކަތް ކުރިޔަށް އޮތް ދެ އަހަރާއި ބައިގެ ތެރޭގައި ނިންމާލެވޭނެކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެ އެވެ.
ފުލުހުންގެ ހިދުމަތް ގާއިމުވެފައި ނެތް ރަށްތަކާއި، އިމާރާތްތައް ނެތް ރަށްތަކުގައި މި ހިދުމަތް ގާއިމު ކުރުމަކީ ސަރުކާރުގެ ރިޔާސީ ވައުދެކެވެ.
ށ. މާކުރަތުގައި އަލަށް ގާއިމު ކުރި ފުލުހުންގެ މަރުކަޒު ހުޅުވުމުގެ ރަސްމިއްޔާތުގައި އިހުސާން ވަނީ، މިއީ މީގެ ކުރިން ފުލުހުންގެ ހިދުމަތް ގާއިމުވެފައި ނެތް ރަށެއްކަން ފާހަގަކުރައްވާފަ އެވެ. އަދި ރަށުގައި މި ހިދުމަތް ގައިމުކުރެވުމަކީ، ލިބޭ އުފަލެއްކަމުގައި ވިދާޅުވިއެވެ.
މިއީ، ރާއްޖޭގެ ތާރީޚުގައި ހިންގާ އެންމެ ފުޅާ ފުލުހުންގެ އިންފްރާސްޓްރަކްޗަރ ޚިދުމަތުގެ ތެރެއިން ހުޅުވިގެންދާ 2ވަނަ ފުލުހުންގެ މަރުކަޒުކަން އިހްސާން ވަނީ ފާހަގަކުރައްވާފައެވެ.
ކުރިއަށްއޮތް 2 އަހަރާއި ބައިގެ ތެރޭގައި މިވަގުތު މަސައްކަތް ހިނގަމުންދާ 140 އަށްވުރެ ގިނަ އިމާރާތްތަކުގެ ޕްރޮޖެކްޓްތައް ނިންމައި ފުލުހުންގެ ޚިދުމަތައް ބޭނުންވާ ގޮތައް ހުޅުވިގެންދާނެކަމަށް އިހްސާން ވިދާޅުވިއެވެ.
ދިވެހި ފުލުހުންގެ އަމިއްލަ މަރުކަޒުތައް ރާއްޖޭގެ އެކި ކަންކޮޅުތަކުގައި ގާއިމްކުރުމަށް ރައީސުލްޖުމްހޫރިއްޔާ ނިންމެވި ނިންމެވުމަކީ ފުލުހުންގެ ޚިދުމަތް އެންމެ ފުޅާ ދާއިރާއެއްގައި ރަނގަޅަށް ފުރިހަމަކޮށް، ރައްޔިތުންނަށް ފޯރުކޮށްދިނުމަށް ވައުދުވިގޮތަށް ނިންމެވި ހިތްވަރުގަދަ ނިންމެވުމެއްކަމަށް އިހްސާން ވިދާޅުވިއެވެ.
ފުލުހުންގެ ޚިދުމަތައް ބޭނުންވާ އުމްރާނީ ތަރައްޤީއަކީ އަގު ބޮޑު އެހެންނަމަވެސް އަގު ނުކުރެވޭފަދަ އިންވެސްޓްމަންޓްތަކެއްކަމަށް އިހްސާން ވިދާޅުވިއެވެ.
ރައީސްގެ ނިންމެވުމަކީ ދިވެހިރާއްޖެއަކީ އަމަންއަމާންކަން ފުރިހަމައަށް ގާއިމްވެފައިވާ އަދި ދިވެހި ކޮންމެ ރައްޔިތަކަށް އަމާންއަމާންކަން ކަށަވަރުކުރެވޭ ގޮތަށް ކުރައްވާ ބުރަ މަސައްކަތެއްކަން އިހްސާން ފާހަގަކުރެއްވިއެވެ.
އިހްސާން ވިދާޅުވީ، ދިވެހިރާއްޖޭގައި ގޭންގް ހަދައިގެން ކުއްކުރުމުގެ މާހައުލު ނައްތާލުމާއި، ގަވައިދާ ޚިލާފައް އުޅެމުންދާ ބިދޭސީންގެ މައްސަލަ އެއްކޮށް ހައްލުކުރުމާއި، ދިވެހިރާއްޖޭގައި ކުޑަކުދިން ކުށުގެ މާހައުލައް ވަންނަމުންމިދާ ދިއުން ހުއްޓުވުމާއި ޑްރަގްގެ މައްސަލަ ހައްލުކުރުމަކީ މި ސަރުކާރުން ވަރަށް ޚާއްސަ އިސްކަމެއް ދީގެން ކުރައްވަމުންގެންދަވާ ކަމެއްކަމަށެވެ.
