ރާއްޖޭގެ ޕޯޓުގެ ކެޕޭސިޓީ އިތުރުކޮށް، ޒަމާނީ ފެންވަރަށް ތަރައްގީ ކުރުމުގެ މަސައްކަތްތައް ކުރަން ޖެހޭކަމަށް ޒަމާންތަކެއް ވަންދެން ދައްކަމުން އައި ނަމަވެސް ލިބުނު ކުރިއެރުމެއް ނެތްކަމަށާއި، ރައީސް ޑރ. މުހައްމަދު މުއިއްޒުގެ މިވެރިކަމުގައި ވައުދުވެފައިވާ ގޮތަށް ޕޯޓު ތަރައްގީކުރުމުގެ މަސައްކަތް ކުރިޔަށް ގެންދާނެކަމަށް އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެ އެވެ.
މިނިސްޓަރ މިހެން ވިދާޅުވީ މޯލްޑިވްސް ޕޯޓްސް ލިމިޓަޑް (އެމްޕީއެލް) ގެ ޕޯޓް ޓްރެއިނިންގ ސެންޓަރ (ޕީޓީސީ) ގެ ދިރާސީ އަހަރުގެ ނިމުން ފާހަގަކުރުމުގެ ގޮތުން ބޭއްވި ރަސްމިއްޔާތުގަ އެވެ.
ރޭގެ ރަސްމިއްޔާތު ޝަރަފުވެރިކޮށްދެއްވައި ވާހަކަ ދައްކަވަމުން ސައީދު ވިދާޅުވީ ރައީސް ޑރ. މުހައްމަދު މުއިއްޒު އެމަނިކުފާނުގެ ހުރިހާ މަސައްކަތެއް ވެސް ރާވާފައި ވަނީ ހުރިހާ ވައުދެއް ވެސް ފުއްދުމުގެ އަޒުމުގައި ކަމަށެވެ. އެހެންކަމުން ޕޯޓަށް ދިމާވެފައިވާ ގޮންޖެހުންތަކަށް ހައްލެއް އަންނާނެކަމަށް ގަބޫލު ކުރައްވާކަމަށް ސައީދު ވިދާޅުވި އެވެ.
ބަނދަރުގެ ހިދުމަތްތައް ރަނގަޅުކުރުމަށް ބޭނުންވާ އިންސާނީ ވަސީލަތްތައް ތަރައްގީކުރުމުގެ މުހިންމުކަމަށް އަލިއަޅުވައިލައްވައި، ސައީދު ވަނީ ޕޯޓު މެނޭޖްމަންޓް ދާއިރާއަށް ހާއްސަކޮށްގެން އެމްޕީއެލް ކުރިޔަށް ގެންދާ ތަމްރީނުތަކަށް ތައުރީފު ކުރައްވާފަ އެވެ. އެގޮތުން މި ޕްރޮގްރާމްތަކުގައި ޒުވާން އިންޓާންސްއާއި ތަޖުރިބާކާރު ބޭފުޅުން ވެސް ބައިވެރިވެ، ބައިނަލްއަގްވާމީ އެންމެ ފަހުގެ މައުލޫމާތުތަކާއި ޓްރެންޑްތައް ދަސްކުރަމުންދާކަން ސައީދު ފާހަގަކުރެއްވި އެވެ.
މީގެ ތެރޭގައި ސަލާމަތީ ކަންކަމާއި، އޮޕަރޭޝަންތައް ހިންގުމާއި، ދުވަހުން ދުވަހަށް ކުރާ މަސައްކަތްތައް ހިމެނޭއިރު ސައީދު ވިދާޅުވި ގޮތުގައި މި ތަމްރީނުތަކުގެ އެންމެ ބޮޑު އަމާޒަކީ ރާއްޖޭގެ އިގްތިސާދީ ދުވެލި ހަރުދަނާކޮށް، ބާރުކުރުމަށް ޕޯޓުން ދެވޭނެ ސަޕޯޓު ޕްރޮފެޝަނަލް ފެންވަރެއްގައި ދިނުމެވެ.
ރާއްޖޭގެ ޕޯޓުގެ ކެޕޭސިޓީއާއި ގުޅޭގޮތުން މިނިސްޓަރ ވިދާޅުވީ، 2000 ވަނަ އަހަރު ރާއްޖޭގެ ފަތުރުވެރިކަމަށް 25 އަހަރު ފުރުނުއިރު، ޕޯޓުން ހެންޑަލްކުރި ކޮންޓެއިނަރުގެ އަދަދު ހުރީ 30,000 ކަމަށެވެ. އޭރު ރާއްޖެއަށް އައި ފަތުރުވެރިންގެ އަދަދު 5 ލައްކައަށް ވެސް ނާރާކަމަށާއި، ނަމަވެސް މިހާރު ފަތުރުވެރިންގެ އަދަދު 2.2 މިލިއަނަށް އަރާފައިވާއިރު ރާއްޖޭގެ އެކި ރިސޯޓުތަކުގައި ގާތްގަނޑަކަށް 70,000 އަށް ވުރެ ގިނަ އެނދު ރަޖިސްޓަރީކުރެވިފައިވާކަން ފާހަގަކުރެއްވިއެވެ. މިފަދަ ބޮޑު ކުރިއެރުމެއް ފަތުރުވެރިކަމުގެ ދާއިރާއިން އައިސްފައިވާއިރު، އެމްޕީއެލްގެ ފެސިލިޓީތަކުން މިހާރު ހެންޑަލް ކުރަނީ ގާތްގަނޑަކަށް 130,000 ޓީއީޔޫގެ ކޮންޓެއިނަރުކަމަށް މިނިސްޓަރ ވިދާޅުވިއެވެ.
އެހެންވީމާ ޕޯޓު އިތުރަށް ކެޕޭސިޓީ އިތުރުވާންޖެހޭކަމާ، ޕޯޓް އިތުރަށް މޮޑަނައިޒް ވާންޖެހޭކަމާ، މިހުރިހާ ކަމެއް މި ވަރަށް ގިނަ ފަރާތުން ވަރަށް ގިނަ ދުވަސްވަރު ދައްކާ ވާހަކައެއް މީ.. މި މައްސަލައެއްކަން އެނގޭ. މިކަމަށް ހައްލު ނުހޯދެނީ. އެހެންވީމާ މި ސަރުކާރުން މިދެންނެވި ގޮތަށް ރައީސް ޑރ. މުއިއްޒުގެ އެބަ އޮތް ޕޯޓް ޑިވެލޮޕް ކުރުމުގެ މެނިފެސްޓޯ ޕްލެޖް… އެހެންވީމަ އިރާދަކުރެއްވިއްޔާ އެކަން ކުރާނެ… އަޅުގަނޑަށް އެކަން ޔަގީންވޭ މިހާރު އަޅުގަނޑުމެންގެ މި ދެންނެވި މެނިފެސްޓޯގައި ހިމެނޭ މަސައްކަތްތައް ތަންފީޒުކުރުމުން މިއަންނަނީ… އެ މަގުން ޕްރޮގްރެސް ވާވަރަށް ކަންކަން ކުރަން ރާވާފައިވާ ތާރީހުތަކާ، އަދި އެކަމަށް ފައިސާ ހޯދާނެގޮތާ މިހުރިހާ ކަމެއް މިދަނީ އެގޮތަށް ތަރުތީބުވަމުން…
ސައީދު ވިދާޅުވި ގޮތުގައި، ފަތުރުވެރިކަމަކީ ރާއްޖޭގެ އިގްތިސާދުގެ މައި ތަނބު ކަމަށާއި، ދިވެހި އިގްތިސާދުގެ ބޮޑު ބައެއް ހިނގަމުން ދަނީ ފަތުރުވެރިކަމުގެ ވަށައިގެން ކަމަށެވެ.
މިނިސްޓަރ ވިދާޅުވީ، ޕޯޓުގެ ކެޕޭސިޓީ އިތުރުކޮށް، ޕޯޓު އިތުރަށް މޮޑަނައިޒް ކުރަންޖެހޭކަމީ ވަރަށް ގިނަ ފަރާތްތަކުން ގިނަ ދުވަސްތަކެއް ވަންދެން ދައްކަމުން އަންނަ ވާހަކައެއް ކަމަށާއި، މިކަމަށް ހައްލެއް ނުހޯދި ގިނަ ދުވަސްތަކެއްވެފައިވާ ކަމަށެވެ. ނަމަވެސް ރައީސް މުއިއްޒުގެ މެނިފެސްޓޯގައި ޕޯޓު ތަރައްގީކުރުމުގެ ވައުދު ހިމެނޭއިރު އެ މަސައްކަތް އެގޮތަށް ކުރާނެކަމަށް ވިދާޅުވި އެވެ.
މިނިސްޓަރ ވިދާޅުވީ، މިނިސްޓްރީން މިހާރު ވެސް ބަނދަރުތައް ތަރައްގީކުރުމުގެ އެތައް މަސައްކަތެއް ކުރަމުންދާ ކަމަށާއި، ވަކި ތާރީހެއް ނުދެއްވި ނަމަވެސް ވަރަށް އަވަހަށް ބަނދަރު ތަރައްގީކުރުމުގެ އެކި ކުރިއެރުންތައް ފެނިގެންދާނެ ކަމަށެވެ.
