ޖުޑިޝަލް ސާވިސް ކޮމިޝަން (ޖޭއެސްސީ) އިން ކްރިމިނަލް ކޯޓަށް ފަނޑިޔާރުކަމުގެ މަގާމަށް ކުރިމަތިލުމުގެ ފުރުސަތު ހުޅުވައިލައިފިއެވެ.
މި މަގާމަށް ޝަރުތު ހަމަވާ ފަރާތްތަކަށް އެޕްލިކޭޝަން ހުށަހެޅުމުގެ ސުންގަޑިއެއް ވެސް ވަނީ ކަނޑައަޅާފައެވެ.
ޖޭއެސްސީން ހާމަކުރިގޮތުގައި، ކްރިމިނަލް ކޯޓުގެ ފަނޑިޔާރުކަމަށް ކުރިމަތިލެވޭނީ، އިސްލާމީ ޝަރީއާ ނުވަތަ ގާނޫނާއި އިސްލާމީ ޝަރީއާގެ ރޮނގުން ފުރަތަމަ ޑިގްރީ ހާސިލުކޮށްފައިވާ ފަރާތްތަކަށެވެ. މީގެ އިތުރުން، ފަނޑިޔާރުކަމުގައި ނުވަތަ ވަކީލެއްގެ ހައިސިއްޔަތުން މަދުވެގެން 3 އަހަރު ދުވަހުގެ ތަޖުރިބާ ލިބިފައިވުން ވެސް ޝަރުތު ހަމަވާން ޖެހެއެވެ.
ފަނޑިޔާރުންގެ މުސާރައާއި އިނާޔަތްތައް
ކްރިމިނަލް ކޯޓުގެ ފަނޑިޔާރުންނަށް ލިބިވަޑައިގަންނަވާ މުސާރައާއި އިނާޔަތްތަކުގެ ތަފްސީލު ވެސް ޖޭއެސްސީން ވަނީ ހާމަކޮށްފައެވެ. މި މަގާމުގެ އަސާސީ މުސާރައަކީ 37،000 ރުފިޔާ އެވެ. އަދި، ލިވިން އެލަވެންސްގެ ގޮތުގައި 18،000 ރުފިޔާއާއި، ރިސްކް އެލެވަންސްގެ ގޮތުގައި 3،300 ރުފިޔާ ލިބިވަޑައިގަންނަވާނެއެވެ.
މީގެއިތުރުން، ރައްޔިތުންގެ މަޖިލީހުން ކަނޑައަޅާފައިވާ ގޮތުގެ މަތިން މެޑިކަލް އިންޝުއަރެންސްއާއި ފޯން އެލަވެންސް ވެސް ފަނޑިޔާރުންނަށް ލިބިވަޑައިގަންނަވާނެ ކަމަށް ޖޭއެސްސީގެ އިއުލާނުގައި ބަޔާންކޮށްފައިވެއެވެ.
އެޕްލިކޭޝަން ހުށަހެޅުމުގެ ސުންގަޑި
ކްރިމިނަލް ކޯޓުގެ ފަނޑިޔާރުކަމަށް ޝައުގުވެރިވާ ފަރާތްތަކުން އެޕްލިކޭޝަން ހުށަހެޅުމުގެ ސުންގަޑިއަކީ 2025 ޑިސެމްބަރު 23 ވަނަ ދުވަހުގެ، 12:00 ގެ ކުރިންނެވެ. އެޕްލިކޭޝަން ހުށަހެޅުމަށް ޖޭއެސްސީގެ ފަހިރެސް ޕޯޓަލް، https://apply.jsc.gov.mv/ މެދުވެރިކޮށް އެޕްލައިކުރެވޭނެ ކަމަށް ޖޭއެސްސީން ވަނީ ހާމަކޮށްފައެވެ.
