ބ އަތޮޅު ދަރަވަންދޫ އެއާޕޯޓު ފަސިންޖަރު ޓާމިނަލް ބޮޑުކުރުމަށް ޑިޒައިން ހެދުމާއި ކޮންސަލްޓެންސީ ސާވިސް ފޯރުކޯށްދިނުމަށް ބަޔަކާއި ހަވާލުކޮށްފިއެވެ.
މިކަމަށްޓަކައި، އެއްބަސްވުމުގައި ސޮއިކުރުމުގެ ރަސްމިއްޔާތެއް ކުރިއަށް ގެންދިޔައިރު، އައިލެންޑު އޭވިއޭޝަން ސާވިސްއިން، ދަރަވަންދޫ އެއާޕޯޓުގެ ފަސިންޖަރު ޓާމިނަލު ބޮޑުކުރުމުގެ މަސައްކަތްކުރުމަށްޓަކައި ބޭނުންވާ ޑިޒައިންއާއި ކޮންސަލްޓެންސީ ސާވިސް ފޯރުކޮށްދިނުމަށް ހަވާލުކުރީ، އީޕޯޗް އެސޯސިއޭޓްސް ޕްރައިވެޓް ލިމިޓެޑަށެވެ.
އައިލެންޑު އޭވިއޭޝަނުން ބުނީ، ސޮއިކުރެވުނު އެއްބަސްވުމުގެ ދަށުން، ދަރަވަންދޫ އެއާޕޯޓުގެ މަސައްކަތް އެންމެ ފުރިހަމަ ގޮތުގައި ކުރިއަށް ގެންދެވޭނެހެން، ފަސިންޖަރު ޓާމިނަލު ބޮޑުކުރުމުގެ ޑިޒައިން ހަދާ، އެ މަސައްކަތް އެ ކުންފުނިން ނިންމާނެ ކަމަށެވެ.
މީގެއިތުރުން، އެ އެއާޕޯޓުގެ ކަންކަން ހަރުދަނާކޮށް، އެތަނުން ދޭ ހިދުމަތުގެ ފެންވަރު ރަނގަޅުކުރުމަށްޓަކައި، އީޕޯޗްގެ ފަރާތުން ކޮންސަލްޓީވެސް ލިބިގެންދާނެ ކަމަށް ބުނިއެވެ،
ރާއްޖޭގެ ފަތުރުވެރިކަމުގެ ސިނާއަތް ފުޅާކުރުމަށްޓަކައި، ފަތުރުވެރިކަމުގެ ސިނާއަތުގެ ވަކި ބައެއްގެ ގޮތުގައި އޮތް ލޯކަލް ޓޫރިޒަމް އިތުރަށް ފުޅާކުރުމަށް އެކި މަސައްކަތްތައް ކުރަމުންދާކަން ފާހަގަކުރެވެއެވެ. އެގޮތުން، ބ. އަތޮޅާއި ރާއްޖޭގެ އެހެނިހެން އަތޮޅުތަކުގެ އެއާޕޯޓު ތަރައްގީކުރުމުގެ މަސައްކަތްތަކުގެ ތެރެއިން، މާފަރު އިންޓަނޭޝަނަލް އެއާޕޯޓު އިތުރަށް ތަރައްގީކޮށް، ޓާމިނަލް ބިލްޑިންގ އެކްސްޓެންޝަން ޕްރޮޖެކްޓް ފެށުމަށް ޗައިނާގެ ކުންފުންޏަކާއި ހަވާލުކޮށް އެއްބަސްވުމުގައި ސޮއިކުރުން ހިމެނެއެވެ.
އެ އެއްބަސްވުމުގެ ދަށުން މާފަރު އެއާޕޯޓު ޓާމިނަލް ބޮޑު ކުރުމަށްޓަކައި ދެ އިމާރާތެއް އެޅުމަށް ވަނީ ހަމަޖެހިފަ އެވެ. އަދި ޓާމިނަލް އިމާރާތުގައި ސީއައިޕީ ލައުންޖަކާއި، ފަސިންޖަރުންނަށް ހާއްސަ ލައުންޖެއްގެ އިތުރުން އޮފީސް ޖާގަ އިތުރު ކުރުމަށް ވަނީ ހަމަޖެހިފަ އެވެ. އަދި، މި މަސައްކަތް 10 މަސް ދުވަހުގެ ތެރޭގައި ނިންމާނެކަމަށް މޯލްޑިވިއަން ވަނީ ބުނެފަ އެވެ.
