ގަވައިދާ ހިލާފަށް މަސައްކަތް ކުރަމުންދާ ބިދޭސީންގެ ތެރެއިން ބައެއް މީހުން، ދަންވަރުގެ ވަގުތުތަކުގައި އާންމު މަސްލަހަތު ގެއްލޭ ފަދަ ކަންކަން ކުރަމުން ގެންދާތީ އެފަދަ މައްސަލަތައް ހައްލުކުރުމުގެ މަސައްކަތް ފެށުމަށް ފުލުހުންނާއި ކަމާ ގުޅޭ އިދާރާތަކަށް ރައީސް ޑރ. މުހައްމަދު މުއިއްޒު މިއަދު އަންގަވައިފި އެވެ.
”އެކްސް“ ގައި ކުރެއްވި ޕޯސްޓެއްގައި ރައީސް ވިދާޅުވީ، ދަންވަރުގެ ވަގުތުތަކުގައި ރަށުތެރޭގެ އާއްމު މަސްލަހަތު ގެއްލޭ ފަދަ ކަންކަން ކުރަމުންދާތީ އާއި އާއްމު އިޖުތިމާއީ މިންގަނޑުތަކާ ހިލާފަށް ބައެއް ބިދޭސީން އުޅެމުންދާކަން ފާހަގަކުރެވިފައިވާކަމަށެވެ. އަދި އެ މައްސަލައިގައި ދަންވަރު 12 އިން ހެނދުނު 6 ޖެހުމާއިހަމައަށް އާންމު ތަންތަނުގަ އާއި މަގުމަތީގައި އުޅޭ ބިދޭސީން ހުއްޓުވައި، ސުވާލު ކުރަން އެދިވަޑައިގެންފައިވާ ކަމަށް ރައީސް ވިދާޅުވި އެވެ.
އާންމު މަސްލަހަތު ގެއްލޭ ގޮތަށް އަމަލުކުރާ މީހުންގެ ފަރާތުން ފާހަގަވާ ކަންކަމާ ގުޅިގެން ގާނޫނީ ގޮތުން ފިޔަވަޅެއް އަޅަންޖެހޭ ނަމަ އެ ފިޔަވަޅެއް އެޅުމަށް ފުލުހުންނާއި ކަމާ ބެހޭ އެހެން އިދާރާތަކަށް އަންގަވާފައިވާނެކަމަށް ރައީސް ވިދާޅުވި އެވެ.
ގަވައިދާ ހިލާފަށް އުޅޭ ބިދޭސީންގެ މައްސަލައިގައި ކުރިޔަށް ގެންދާ އޮޕަރޭޝަންތައް ފުޅާކޮށް، ވިޔަފާރިތަކަށް އާމާޒުކޮށް ފެށި ރެއިޑުތަކުގައި މިހާތަނަށް ބަންދު ކުރި ތަންތަނުގެ އަދަދު 70 އަށް އަރަ އެވެ.
ސަރުކާރުގެ އަމާޒަކީ ރާއްޖޭގައި އުޅޭ ޖުމްލަ ބިދޭސީންގެ އަދަދު ދެނެގަނެ، ތިން އަހަރުގެ ތެރޭގައި މި މައްސަލަ ހައްލުކުރުމެވެ. މިދިޔަ ދޮޅު އަހަރުގެ ތެރޭގައި ގަވައިދާ ހިލާފަށް ރާއްޖޭގައި އުޅެމުން ދިޔަ ގިނަ އަދަދެއްގެ ބިދޭސީން ހިފަހައްޓައި ޑީޕޯޓުކުރެވުނު ކަމަށްވެސް ސަރުކާރުން ހާމަކުރައްވައެވެ. އަދި ބިދޭސީންގެ މައުލޫމާތުތައް އެއްކުރުމަށްޓަކައި ”އޮޕަރޭޝަން ކުރަނގި“ ނަމުގައި ހާއްސަ ޕްރޮގްރާމެއް ފަށައި، ގިނަ ބައެއްގެ ދިހަ އިނގިލީގެ ނިޝާނާއި، ފޮޓޯ ހިމެނޭ ގޮތުން ބަޔޯމެޓްރިކް ޑޭޓާ ވަނީ ނަގާފައެވެ.
ބިދޭސީންގެ މައްސަލަ ހައްލުކުރުމަށް އިތުރު ޕްރޮގްރާމެއް ފަށައި، މިހާރު އަމާޒުކޮށްފައި ވަނީ ގަވައިދާ ހިލާފު ވިޔަފާރިތައް ކުރަމުންދާ މީހުންނަށެވެ. އެގޮތުން، ގާނޫނާއި ގަވައިދާ ހިލާފަށް އެކި ވިޔަފާރިތައް ހިންގައި، އެކަމުގައި އުޅޭ ބިދޭސީންތައް ދެނެގަނެ، ޑީޕޯޓުކުރުމުގެ މަސައްކަތް ދަނީ ކުރިޔަށެވެ.
ދާދިފަހުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ގަވައިދާ ހިލާފަށް ބިދޭސީން މަސައްކަތް ކުރަމުންދާ ސަރަހައްދުތަކާއި، ވިޔަފާރިތައް ދެނެގަތުމަށް ހާއްސަ ގައުމީ ޕްރޮގްރާމެއް ފެށިކަން އިއުލާނުކޮށްފަ އެވެ.
ރާއްޖޭގައި ގާނޫނާ ހިލާފަށް ބިދޭސީން ފުޅާ ދާއިރާއެއްގައި ވިޔަފާރިކުރަމުންދާ ކަމުގެ ޝަކުވާ ބޮޑުވެފައިވާތީ، މިކަމަށް ހައްލެއް ހޯދުމުގެ ގޮތުން އެފަދަ ވިޔަފާރިތައް ފާހަގަވާނަމަ ރިޕޯޓުކުރުމަށް މިނިސްޓްރީން ވަނީ އެދިފަ އެވެ.
މިފަހުން ކުރިޔަށް ގެންދިޔަ އޮޕަރޭޝަންތަކުގެ ތެރޭގައި އެއްވެސް ސާފުތާހިރުކަމެއް ނެތި، ތައްޔާރު ކުރަމުން ދިޔަ ކާބޯތަކެތީގެ ވިޔަފާރިތައް ހުއްޓުވުން ހިމެނެ އެވެ. އަދި ބިދޭސީން ޝާމިލުވެގެން ހިންގަމުން ދިޔަ މަސާޖް ޕާލާ ވިޔަފާރިތަކެއް ވެސް ވަނީ ހުއްޓުވާފަ އެވެ.
އިމިގްރޭޝަނުން ބުނި ގޮތުގައި މިގޮތަށް އަތުލައިގަންނަ ބިދޭސީން ރާއްޖެއިން ޑީޕޯޓުކޮށް، ވަގުތުން ފުރުވާލުމަށް ކުރަން ޖެހޭ މަސައްކަތް ދަނީ ކުރަމުންނެވެ.
