އަންނަ ހޮނިހިރު ދުވަހު ސަރުކާރުގެ މައި ޕާޓީ ޕީއެންސީން ބާއްވާ ކައުންސިލް އިންތިހާބުގެ ޕްރައިމެރީއަކީ އެއް ޕާޓީއަކުން އެންމެ ގިނަ އަދަދެއްގެ ކެންޑިޑޭޓުން ޓިކެޓަށް ވާދަކުރާނެ އިންތިހާބުކަމަށް ޕާޓީގެ ޕާލިމަންޓްރީ ގުރޫޕުގެ ލީޑަރު އިބްރާހިމް ފަލާހު ވިދާޅުވެއްޖެ އެވެ.
އިންތިހާބުގެ ތައްޔާރީތަކާއި ގުޅޭ މައުލޫމާތުތައް ދިނުމަށް ބޭއްވި ނޫސްވެރިންގެ ބައްދަލުވުމުގައި ފަލާހު ވިދާޅުވީ ޕީއެންސީގެ ޕްރައިމެރީ ބާއްވާނީ މި މަހުގެ 27 ވާ ހޮނިހިރު ދުވަހު ކަމަށެވެ. ފަލާހު ވިދާޅުވީ ނޮވެމްބަރު މަހުގެ ތެރޭގައި އިންތިހާބުގައި ވާދަކުރުމަށް ޝައުގުވެރިވާ ފަރާތްތަކުން ފޯމު ހުށަހެޅުމަށް ހުޅުވާލުމުން ވަރަށް ބޮޑު ތަރުހީބެއް ލިބުނު ކަމަށެވެ.
ފަލާހު ވިދާޅުވި ގޮތުގައި މިއީ ލާމަރުކަޒީ ނިޒާމު ރާއްޖެއަށް ތައާރަފު ކުރެވި އިންތިހާބު ބާއްވަން ފެށިފަހުން ލޯކަލް ކައުންސިލް އިންތިހާބުގެ ހުރިހާ އިންތިހާބަކަށް ބަލާއިރު ވެސް ޕްރައިމެރީއަކަށް ވާދަކުރުމަށް އެންމެ ގިނަ އަދަދެއްގެ ފޯމުތައް ލިބުނު ފަހަރެވެ.
އާންމު ގޮތެއްގައި ސިޔާސީ ޕާޓީތަކުން އެތެރޭގެ އިންތިހާބުތަކުގެ ވަގުތު އިތުރު ކުރިނަމަވެސް، ޕީއެންސީގެ އިއުލާނާއި އެކު ވަރަށް ގިނަ އަދަދެއްގެ ފޯމު ދެ ހަފްތާގެ ތެރޭގައި ލިބިގެން ދިއުމަކީ ޕާޓީއާއި މެދު ރައްޔިތުން ކުރާ އިތުބާރާއި ސަރުކާރަށް އޮތް ތާއީދުކަމަށް ފަލާހު ވިދާޅުވި އެވެ.
މިފަހަރު ޕީއެންސީގެ ފަރާތުން ލޯކަލް ކައުންސިލް އިންތިޚާބުގައި ވާދަ ކުރާ ނިސްބަތް 97 އިންސައްތައަށް އަރާ
ކެންޑިޑޭޓުންގެ ޖުމްލަ އަދަދު މިހާތަނަށް ޕާޓީން ހާމަކޮށްފައި ނުވަނީ، ފޯމުތައް ޕްރޮސެސްކޮށް ޝަރުތުހަމަވޭތޯ ބެލުމުގެ މަސައްކަތް ކުރިޔަށް ދާތީކަމަށް ފަލާހު ވިދާޅުވި އެވެ. އަދި ވީހާވެސް އަވަހަށް އެ މަސައްކަތްތައް ނިންމައި ތަފްސީލު އާންމު ކުރާނެކަމަށް ފަލާހު ވިދާޅުވި އެވެ.
ޕީއެންސީގެ ޕްރައިމެރީ ބޭއްވުމަށް ހަމަޖެހިފައި ވަނީ އަންނަ ހޮނިހިރު ދުވަހުގެ ހެނދުނު 09:00 އިން 04:00 އާއި ހަމައަށެވެ.
