ކުރިއަށް އޮތް ލޯކަލް ކައުންސިލްތަކާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ އިންތިހާބުގައި ސަރުކާރު ހިންގާ ޕީއެންސީގެ ޓިކެޓުގައި ވާދަކުރާނެ ކެންޑިޑޭޓުން ހޮވުމަށް ބާއްވާ ޕްރައިމަރީގެ ވޯޓުލުން މިއަދު ފަށައިފިއެވެ. މި ވޯޓުލުން ފަށާފައިވަނީ މިއަދު ހެނދުނު 9:00 ގައެވެ.
ޕީއެންސީން ބުނި ގޮތުގައި މިއަދު ހަވީރު 4:00 އާ ހަމައަށް ކުރިއަށްދާ މި ޕްރައިމަރީގައި ޖުމްލަ 308 ކެންޑިޑޭޓުން ވާދަކުރެއެވެ. މީގެ ތެރޭގައި ކައުންސިލްތަކަށް ވާދަކުރާ 183 ކެންޑިޑޭޓުންނާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ވާދަކުރާ 121 ކެންޑިޑޭޓުން ހިމެނެއެވެ. އިންތިހާބު ކުރިއަށްދާ މަރުކަޒުތަކުގެ މައުލޫމާތު އެ ޕާޓީގެ ވެބްސައިޓުން މިހާރު ލިބެން ހުންނާނެއެވެ.
މި އިންތިހާބުގެ އިންތިޒާމުތަކާ ގުޅޭގޮތުން ޕީއެންސީގެ އިންތިހާބީ މެނޭޖަރު އަދި އިނގުރައިދޫ ދާއިރާގެ މެމްބަރު އިބްރާހިމް ފަލާހު ވިދާޅުވީ، ހުރިހާ ދާއިރާއަކަށް ވެސް އެ ޕާޓީގެ ކެންޑިޑޭޓުން ވާދަކުރާނެ ކަމަށެވެ. އަދި ޕާޓީން ނިންމާފައިވަނީ ވޯޓުލުން އެ މީހަކު ނިސްބަތްވާ ރަށެއްގައި ބޭއްވުމަށް ކަމަށްވެސް އޭނާ ފާހަގަކުރެއްވިއެވެ.
ޕްރައިމަރީއާ ދިމާކޮށް ޕީއެންސީގެ މެންބަރުންގެ އަދަދު ވަނީ ވަރަށް ބޮޑަށް އިތުރުވެފައެވެ. ފަލާހު ވިދާޅުވި ގޮތުގައި އެ ޕާޓީގެ މެންބަރުންގެ އަދަދު މިހާރު ވަނީ 70،000 އިން މައްޗަށް އަރާފައެވެ. އެހެންކަމުން މިއަދުގެ ޕްރައިމަރީގައި ވަރަށް ގިނަ ބަޔަކު ވޯޓުލާނެ ކަމަށް ލަފާކުރެވެއެވެ.
އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބާއި އަންހެނުންގެ ކޮމިޓީތަކުގެ އިންތިހާބުގައި ކޮންމެ ދާއިރާއަކުން 681 މީހުން އިންތިހާބު ކުރާނެއެވެ. މިއީ ދެ އިންތިހާބުން ޖުމްލަ 1،362 މަގާމެވެ.
