ޗޮކްލެޓް ސިރަޕްޕުޅިތަކެއްގައި ބަންދުކޮށްގެން ރާއްޖެއަށް ކަނޑުމަގުން އެތެރެ ކުރަން އުޅުނު ގިނަ އަދަދެއްގެ މަސްތުވާތަކެތީގެ މައްސަލައިގައި މީހަކު ހައްޔަރުކޮށްފި އެވެ.
މި މައްސަލައިގައި މީހަކު ހައްޔަރު ކުރިނަމަވެސް، އިތުރު އެއްވެސް މައުލޫމާތެއް ފުލުހުން ހިއްސާއެއް ނުކުރި އެވެ. ހަމައެކަނި ބުނީ މައްސަލައާއި ގުޅުން ހުރި އިތުރު މައުލޫމާތުތައް ފަހުން ހިއްސާ ކުރާނެކަމަށެވެ.
ޗޮކްލެޓް ސިރަޕްޕުޅިތަކެއްގައި ބަންދުކޮށްގެން ރާއްޖެއަށް ކަނޑުމަގުން އެތެރެ ކުރަން އުޅުނު ގިނަ އަދަދެއްގެ މަސްތުވާތަކެތި ފުލުހުން އަތުލައިގަތީ މިދިޔަ ބުދަ ދުވަހުގެ ރޭގެ ވަގުތެއްގަ އެވެ. ކަސްޓަމްސްއިން ފޮށިތައް ބަލައި ފާސްކުރީ ޝައްކު ކުރެވޭ ކަންތަކެއް ހުރުމުންނެވެ. އަދި މައްސަލައިގައި އެ އިދާރާއިން ދިން މައުލޫމާތުގައި ބުނީ އެތަކެތި ސްކޭންކޮށް، ޓެސްޓު ކުރި ފުރަތަމަ މަރުހަލާފައި ހަޝިޝް އޮއިލްއަށް ޕޮޒިޓިވްވެފައިވާކަމަށެވެ. ހަޝިޝް އޮއިލްއަކީ، ކެނެބިސްގެ ބާވަތެކެވެ.
ބަރުދަނުގައި 40 ކިލޯ ހުރި މިތަކެތީގެ މަގުމަތީ އަގު 30 މިލިއަން ރުފިޔާއަށް އަރާނެކަމަށް ކަސްޓަމްސްއިން ވަނީ ލަފާކޮށްފަ އެވެ. ރާއްޖެއަށް އެތެރެ ކުރަން އުޅުނު މަސްތުވާތަކެތި ފޮރުވާފައި ހުރީ، ޗޮކްލެޓް ސިރަޕްގެ 10 ފޮށިގަނޑުގައި ބަންދުކޮށް ފޮރުވައިގެންނެވެ. ކަސްޓަމްސްއިން ބުނި ގޮތުގައި ކޮންމެ ފުޅިއެއްގައި ވެސް 1.10 އަދި 1.14 މިލިމީޓަރާއި ދެމެދުގެ މިންވަރަކަށް ހަޝިޝް އޮއިލް ހުއްޓެވެ.
މަސްތުވާތަކެތީގެ މައްސަލަތަކާއި ގުޅޭގޮތުން މައުލޫމާތު ދިނުމަށް ދާދިފަހުން ފުލުހުން ބޭއްވި ނޫސްވެރިންގެ ބައްދަލުވުމެއްގައި ވަނީ، ދިވެހިންތައް ބޭރުގެ ގައުމުތަކުގައި ގާއިމުވެތިބެގެން ރާއްޖެއަށް އޮޅުވާލައިގެން މަސްތުވާތަކެތި އެތެރެ ކުރުމަށް މަސައްކަތް ކުރާކަން ހާމަކޮށްފަ އެވެ. އެއާރ ކާގޯ ނުވަތަ ސީ ކާގޯ މެދުވެރިކޮށް މަސްތުވާތަކެތި އެތެރެ ކުރަނީ ބަދިގެ ސާމާނުތައް ނުވަތަ ރާއްޖެއަށް އެތެރެ ކުރާ ކާބޯތަކެތީގެ ބާވަތެއްގައި ފޮރުވައިގެންނެވެ.
މިގޮތަށް ފާހަގަކުރެވޭ ބައެއް ގައުމުތައް ހުރިއިރު، މި މައްސަލަތައް ބަލައި ތަހުގީގުކޮށް ރެޑް ނޯޓިސް ނެރެގެން ނަމަވެސް އެ މީހުން ރާއްޖެ ގެންނާނެކަމަށް ފުލުހުން ވަނީ ބުނެފަ އެވެ.
މަސްތުވާތަކެއްޗާއި ބެހޭ ގާނޫނަށް މިފަހުން ގެނައި އިސްލާހާއި އެކު، 350 ގްރާމަށްވުރެ އިތުރު އަދަދެއްގެ ކެނެބިސްއާއި، 250 ގްރާމަށްވުރެ އިތުރު އަދަދެއްގެ ޑައިފޯމިން އަދި އެ ނޫން ބާވަތެއްގެ މަސްތުވާތަކެތި ނަމަ 100 ގްރާމަށްވުރެ އިތުރުނަމަ މަރުގެ އަދަބު ދެވޭނެ އެވެ.
މަސްތުވާތަކެތި އެތެރެކުރާ މީހަކަށް މަރުގެ އަދަބު ދެވޭނީ، ސުޕްރީމް ކޯޓުގެ މައްސަލަ ބަލާ ފަނޑިޔާރުންގެ ބެންޗުގެ އިއްތިފާގުން ކުށް ސާބިތުވާކަމަށް ހުކުމް ކުރުމުންނެވެ. އިއްތިފާގުން މަރުގެ ހުކުމް އިއްވާނަމަ، އެ ހާލަތުގައި އެ މީހަކު އުމުރަށް ޖަލަށްލުމާއެކު 100،000 ރުފިޔާއާއި، 10،000،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ އެވެ.
