ހުއްދަ ނަގާފައިވާ ވިޔަފާރީގެ ނަން ބޭނުންކޮށްގެން ފާޙިޝް ޢަމަލުތައް ހިންގަމުންދާ މަސާޖު ޕާލާތައް ބަންދުކުރުމަށް ފެށި ޚާއްޞަ އޮޕަރޭޝަންގެ ދަށުން، މިއަދާ ހަމައަށް 96 ތަނެއް ބަންދުކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. މި އޮޕަރޭޝަނަކީ މިދިޔަ ޑިސެންބަރު މަހުގެ 9 ވަނަ ދުވަހު ފެށި މަސައްކަތެކެވެ.
ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައި ވިދާޅުވީ، މިފަދަ ތަންތަން ހިނގަމުންދަނީ އެ ތަންތަނުގެ ބޭނުން ހިފާ މީހުން މުޖުތަމަޢުގައި ތިބުމުން ކަމަށާއި، އެއީ ހިތާމައާއެކު ޤަބޫލުކުރަންޖެހޭ ޙަޤީޤަތެއް ކަމަށެވެ. މުޖުތަމަޢުން ފާޙިޝް ކަންތައްތަކާއި މުންކަރާތްތައް މަދުކޮށް، މުޖުތަމަޢުގެ ޙާލަތު ބަދަލުކުރެވޭނީ، ޢާއްމު ރައްޔިތުންނާއި އެންމެހާ ފަރާތްތަކެއްގެ ނިޔަތާއި ޢަމަލު އެފަދަ ކަންކަމުގައި އެއްގޮތްވެގެން ކަމަށްވެސް ރައީސް ފާހަގަކުރެއްވިއެވެ.
މިކަމާ ގުޅޭގޮތުން ކީރިތި ޤުރުއާނުގެ އާޔަތެއް ހިއްސާކުރައްވަމުން ރައީސް ވިދާޅުވީ، ”އަޅުގަނޑުމެންނަކީ ފާޙިޝް ކަންކަމާއި އެންމެހާ މުންކަރާތްތަކަށް ނޫނެކޭ ބުނާ ބަޔަކަށް ވަމާތޯ!“ މިފަދައިންނެވެ. ހުޅުމާލެ ފޭސް 1 ގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، މީގެ ކުރިން މިފަދަ ތަންތަނާ މެދު އެޅޭ ފިޔަވަޅަކީ ހަމައެކަނި އިންޒާރު ދިނުމާއި ވަގުތީ ގޮތުން ބަންދު ބޯޑު ޖެހުން ކަމަށެވެ. ނަމަވެސް މި ސަރުކާރުން އެކުލަވާލި ޚާއްޞަ ޓާސްކްފޯސްގެ ދަށުން މިހާރު އެފަދަ ތަންތަން ދާއިމީކޮށް ބަންދުކޮށް، އެ ވިޔަފާރީގައި އިސްކޮށް އުޅޭ މީހުންނަށް ފިޔަވަޅު އަޅަމުންދާ ކަމަށް އެމަނިކުފާނު ވިދާޅުވިއެވެ.
މި މައްސަލައާ ގުޅޭގޮތުން ހޯމް މިނިސްޓަރު ޢަލީ އިޙްސާން ވިދާޅުވެފައިވަނީ، މާލެ ސަރަހައްދުގައި ހަށިވިއްކާ 111 މަސާޖު ޕާލާ ހިންގަމުންދާ ކަމަށް ފާހަގަކުރެވިފައިވާ ކަމަށެވެ. ސެލޫންތަކާއި މަސާޖު ޕާލާތަކުގެ ނަމުގައި ޣައިރު ޤާނޫނީ ޢަމަލުތައް ހިންގަމުންދާކަން ފާހަގަކުރައްވައި މިނިސްޓަރު ވިދާޅުވީ، ބައެއް ފަރާތްތަކުން ޓޫރިސްޓު ވިސާގައި ބޭރު މީހުން ރާއްޖެ އެތެރެކޮށްގެން ހަށިވިއްކުމުގެ ވިޔަފާރި ކުރަމުންދާ ކަމަށެވެ.
ސަރުކާރުގެ އަމާޒަކީ މުޖުތަމަޢުގައި ފެތުރެމުންދާ މިފަދަ ނުރަނގަޅު އާދަތަކާއި ޤާނޫނާ ޚިލާފު ޢަމަލުތައް ހުއްޓުވައި، ރައްޔިތުންނަށް އަމާން މުޖުތަމަޢެއް ކަށަވަރުކޮށްދިނުމެވެ. މި މަސައްކަތުގައި ހުރިހާ މުއައްސަސާތަކެއް ގުޅިގެން ހަރުދަނާ ފިޔަވަޅުތަކެއް އަޅަމުންދާނެ ކަމަށް ސަރުކާރުން ވަނީ ހާމަކޮށްފައެވެ.
