މިދިޔަ ހަފުތާގައި އެކަނި މާލެއާއި ބުރިޖުގައި 67 އެކްސިޑެންޓު ހިނގައިފިއެވެ.
ފުލުހުން އާންމުކުރި ތަފާސް ހިސާބުތަކުން ދައްކާ ގޮތުގައި، މިދިޔަ ހަފުތާގެ ހިސާބުތަކުން އެނގޭ ގޮތުގައި ޖުމުލަ 67 އެކްސިޑެންޓު ހިނގިއިރު، އޭގެ ތެރެއިން 56 އެކްސިޑެންޓު ހިނގީ މާލޭގައެވެ.
އެންމެ ގިނަ އެކްސިޑެންޓު ހިނގާފައި ވަނީ އަންގާރަ ދުވަހުކަމަށްވާއިރު، އެ ދުވަހު 13 އެކްސިޑެންޓެއްގެ މައްސަލަ ފުލުހުންނަށް ރިޕޯޓުކޮށްފައެވެ. އަދި ބުދަ ދުވަހު ވެސް 12 އެކްސިޑެންޓު ވަނީ ރިޕޯޓުކޮށްފަ އެވެ.
މީގެތެރެއިން އެއް އެކްސިޑެންޓެއްގައި، ސީރިއަސް އަނިޔާތަކެއް ވަނީ ލިބިފަ އެވެ. ބާކީ 66 އެކްސިޑެންޓުގައިވެސް ސީރިއަސް އަނިޔާއެއް މީހަކަށް ލިބިފައިނުވާ ކަމަށް ތަފާސްހިސާބުތަކުގައިވެއެވެ. އެކަމަކު، އެ 67 އެކްސިޑެންޓުގައި ޖުމުލަ 87 އުޅަނދަކަށް ގެއްލުންވެފައިވެއެވެ.
ސައިކަލަކާއި ސައިކަލެއް ޖެހިގެން 19 އެކްސިޑެންޓު ހިނގާފައިވާއިރު، ސައިކަލަކާއި ކާރެއް ޖެހިގެން ވެސް 19 އެކްސިޑެންޓެއް ވަނީ ހިނގާފަ އެވެ. ކާރަކާއި ކާރެއް ޖެހިގެން ވެސް ހަ އެކްސިޑެންޓު ހިނގާފައިވެއެވެ.
އެންމެ ގިނަ އެކްސިޑެންޓު ހިނގީ ދުވާލު ގަޑީގައެވެ. އެ ގޮތުން، ދުވާލު 46 އެކްސިޑެންޓު ހިނގިއިރު، ރޭގަނޑު ހިނގީ 21 އެކްސިޑެންޓެވެ.
