އެމްޑީޕީއިން މަސައްކަތްކުރަނީ ރައްޔިތުންނަށް ކަމެއް ކޮށްދިނުމުގެ ނިޔަތުގައެއް ނޫން، ސަރުކާރަށް ޖެއްސުން ކުރަންކަމަށް
ސަންގު ޓީވީގެ ”ހަބަރަށްފަހު“ ޕްރޮގްރާމްގައި ޕެންޝަން ގާނޫނަށް ސަރުކާރުގެ ފަރާތުން ހުށަހަޅާފައިވާ އިސްލާހާއި ގުޅޭ ގޮތުން އައިފާން ވިދާޅުވީ އެމްޑީޕީން މަޖިލީހުގައި މަސައްކަތް ކުރަނީ ކޮންމެހެން ރައްޔިތުންނަށް ކަންކަން ކޮށްދިނުމުގެ ނިޔަތުގައި ނޫންކަމަށެވެ.
މިއީ އިދިކޮޅުގައި ތިބެ ކޮންމެ ވެސް މަސައްކަތެއް ކުރާކަން ރައްޔިތުންނަށް ދެއްކުމަށްޓަކައި ކުރާ މަސައްކަތްތަކެއްކަމަށް އައިފާން ވިދާޅުވިއެވެ. އެމްޑީޕީއިން މަޖިލީހަށް ހުށައަޅާ ބިލުތަކަށް ޕީއެންސީން ތާއީދުކޮށްފާނެކަމަށް އެބޭފުޅުން ގަބޫލުނުކުރާކަމަށް ފާހަގަކޮށް އައިފާން ވިދާޅުވީ، އެއީ މީގެ ކުރީގައި މައިނޯރިޓީއަށް ޖާގަ ދިން މަޖިލީހެއް ނެތުމުންކަމަށެވެ. ރައްޔިތުންގެ ފައިދާއަށް، ސިޔާސީ ފިކުރުން އެއްކިބާވެ މަޖިލީހުގައި ނިންމުންތައް ނިންމާފައިނުވާކަމަށް އައިފާން ވިދާޅުވިއެވެ.
އެހެންވީމަ އެބޭފުޅުންގެ ވިސްނުމުގައި ނުހުންނާނެއެއް ނޫންތޯ، އަޅުގަނޑުމެން މިކަން މިގޮތަށް ކޮށްފާނެ ކަމަކަށް. އެހެންމަ، އެއީ ހަގީގަތަކީ.
އައިފާން ވިދާޅުވިއެވެ.
އެމްޑީޕީއާއިއެކު މަސައްކަތްކޮށް، ރައްޔިތުންނަށް ފައިދާ ވާނެ މަގުން މަސައްކަތް ކުރުމަށް ޕީއެންސީއިން ކަންކަން ބައްޓަން ކުރުމުން އަމާޒުވަނީ ފާޑުކިޔުންތަކާއި، ދޮގު ތުހުމަތުތައްކަމަށް އައިފާން ވިދާޅުވިއެވެ. އަދި ފާހަގަކުރެއްވީ ރައްޔިތުންގެ ކަންބޮޑުވުން ހުރި ކަންތައްތަކުގައި ސަރުކާރުން އިޖާބަދޭ މަންޒަރު ފެންނަކަމަށާއި، މީގެ ކުރީގައި އެއްވެސް ވެރިއަކަށް ކުރަން ނުކުރުނު އެތައްކަމެއްވެސް ރައީސުލްޖުމްހުރިއްޔާ ޑރ މުހައްމަދު މުއިއްޒު ކުރައްވަމުން ގެންދަވާކަމަށް އައިފާން ވިދާޅުވިއެވެ.
މިއާއި ހިލާފަށް ރައީސް މުއިއްޒު ވަނީ ކުރިއަށް އަންނަ ތިބި ވެރިންނަށްވެސް ރައްޔިތުންގެ ކަންކަން ކުރުމަށް މަޖުބޫރުވާފަދަ ހައި ސްޓޭންޑަޑްތަކެއް ސެޓް ކުރައްވާފައިކަމަށް ފާހަގަކޮށް އައިފާން ވިދާޅުވީ، އެގޮތުން ދެން އަންނަ ވެރިންނަށް ރައްޔިތުންނާއި ގާތަށް ގޮސް ބައްދަލުކުރުމަށް މަޖުބޫރުވާނެކަމަށެވެ. މިއީ މީގެ ކުރީގައި ރައްޔިތުންނަށް ލިބުނު ފުރުސަތުތަކެއް ނޫންކަމަށް އައިފާން ފާޙަގަކުރެއްވިއެވެ. އެމްޑީޕީއަކީ އިހުލާސްތެރިކަމާއިއެކު މަސައްކަތްކުރުމުގެ ވިސްނުން ހުރި ބައެއް ނޫންކަމަށާއި، އެމްޑީޕީއިން ބޭނުންވަނީ ސަރުކާރަށް ޖެއްސުންކުރަންކަމަށް ވިދާޅުވިއެވެ.
