އޮޕަރޭޝަން އަލިމަގުގެ ތެރެއިން ސައުތު ޕޮލިސްއިން ކުރިއަށް ގެންދިއަ އޮޕަރޭޝަނުގެ ދަށުން ފުވައްމުލަކުގައި ހާއްސަ 2 ތަޙުޤީގެއް ފަށާފައިވާނެކަމަށް އެސިސްޓެންޓް ކޮމިޝަނަރ އޮފް ޕޮލިސް ސައުތު ޕޮލިސް ކޮމާންޑަރ އަހުމަދު ޝަމީމް ވިދާޅުވެއްޖެއެވެ.
ޝަމީމް މިހެން ވިދާޅުވީ ސަންގުޓީވީއަށް ދެއްވި އިންޓަވިއުއެއްއެވެ.
ޝަމީމް ވިދާޅުވީ، މަސްތުވާތަކެއްޗާ ދެކޮޅަށް ފުލުހުން ދެކޮޅަށް އަޅާފައިވާ ފިޔަވަޅުތައް ތަންފީޒު ކުރުމަށްޓަކައި 2024 ވަނަ އަހަރުން ފެށިގެން ސައުތު ޕޮލިސްއިން ހާއްސަ މަސައްކަތްތަކެއް ފަށާފައިވާ ކަމަށެވެ. އެގޮތުން، ”ވެށި ރައްކާ“ ނަމުގައި ފުވައްމުލަކުގައި މަސްތުވާތަކެއްޗާ ދެކޮޅު އޮޕަރޭޝަނެއް ހިންގާފައިވާކަން ފާހަގަކުރެއްވިއެވެ.
މިހާރު ކުރިއަށްދާ ”އޮޕަރޭޝަން އަލިމަގު“ ގެ ތެރެއިން ފުވައްމުލަކުން މަސްތުވާތަކެތީގެ ދެ ނެޓްވޯކެއްގެ ތަހުގީގު ފަށާފައިވާކަމަށް ޝަމީމް ވިދާޅުވިއެވެ. މި މަހުގެ 11 ވަނަ ދުވަހުން ފެށިގެން ގއ. ވިލިނގިލި އަދި މާލެ ހިމެނޭހެން ހިންގި އޮޕަރޭޝަންތަކުގައި، މަސްތުވާތަކެތީގެ ނެޓްވޯކްތަކުގައި އިސްކޮށް އުޅޭ ހަތަރު މީހަކު ފުލުހުންގެ ބެލުމުގެ ދަށަށް ގެންގޮސްފައިވާކަމަށް ޝަމީމް ވިދާޅުވިއެވެ.
ބަންދުގެ މުއްދަތު ޖެހި މީހުންގެ ތެރެއިން ތިން މީހަކު ޝަރީއަތް ނިމެންދެން ބަންދުކޮށްފައިވާއިރު، ހަތަރުވަނަ މީހާގެ ބަންދަށް 15 ދުވަސް ވަނީ ޖަހާފައެވެ.
މީގެ އިތުރުން، ގއ. އަތޮޅަށް ނިސްބަތްވާ، މަސްތުވާތަކެތީގެ ވިޔަފާރިކުރާކަމަށް ތުހުމަތުކުރެވޭ 19 މީހެއްގެ މައްސަލަ ތަހުގީގު ކުރަމުން ދާކަމަށާއި، އޭގެ ތެރެއިން ހަތަރު މީހަކު މިހާރު ތިބީ ފުލުހުންގެ ބަންދުގައިކަމަށް އޭނާ ވިދާޅުވިއެވެ. މި ތަހުގީގުގެ ތެރެއިން 13 ފަރާތަކާ ގުޅުންހުރި 53 ބޭންކް އެކައުންޓެއް ފްރީޒްކޮށް، އެ އެކައުންޓްތަކުން ހިންގާފައިވާ މުއާމަލާތްތަކަކީ މަސްތުވާތަކެއްޗާ ގުޅުންހުރި މުއާމަލާތްތަކެއްތޯ ބެލުމުގެ މަސައްކަތްތައް ވެސް ދަނީ ކުރަމުންނެވެ.
