ވަތަނީ ހިދުމަތުގެ އަސާސީ ތަމްރީނު ފުރިހަމަކުރުމަށްފަހު ފަންނީ ތަމްރީނު ފުރިހަމަކުރަން ބޭނުންވާ 66 ޒުވާނަކު މިއަދު އެ ތަމްރީނު ފެށުމަށް ބ. ކިހާދޫގައި ހުންނަ އެމްއެންޑީއެފްގެ ތަމްރީނު މަރުކަޒަށް ދިއުމަށް ފުރައިފިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެކްސްގައި ކުރެއްވި ޕޯސްްޓެއްގައި ވިދާޅުވީ ވަތަނީ ޙިދުމަތަކީ އަމިއްލަ ނަފުސަށް އިތުބާރުކުރާ، ޢަޤީދާ ވަރުގަދަ، ރޫޙާނީ އަދި ޖިސްމާނީ ގޮތުން ދުޅަހެޔޮ، ޤައުމިއްޔަތަށް ލޯބިކުރާ، ޒިންމާދާރު، ރައްޔިތެއް ބިނާކުރުމަށް މިސަރުކާރުން ފަށާފައިވާ ދިވެހި ވަޠަނީ ޚިދުމަތުގެ އިނީޝަލް ތަމްރީނު ޕްރޮގްރާމެއްކަމަށެވެ.
ރައީސް ވިދާޅުވީ، އަމިއްލަ ނަފުސަށް އިތުބާރުކުރާ، ޢަޤީދާ ވަރުގަދަ، ރޫޙާނީ އަދި ޖިސްމާނީ ގޮތުން ދުޅަހެޔޮ، ޤައުމިއްޔަތަށް ލޯބިކުރާ، ޒިންމާދާރު، ރައްޔިތެއް ބިނާކުރުމަށް ސަރުކާރުން ފަށާފައިވާ ދިވެހި ވަޠަނީ ޚިދުމަތުގެ އިނީޝަލް ތަމްރީނު ފުރިހަމަ ކުރި ޒުވާނުންގެ ތެރެއިން، ދިވެހި ވަޠަނީ ޚިދުމަތުގެ ފަންނީ ތަމްރީނުގައި ބައިވެރިވުމަށް ކުރިމަތިލި ބައިވެރިން ބ. ކިހާދޫގައި ޤާއިމު ކޮށްފައިވާ އެމްއެންޑީއެފްގެ ތަމްރީނު މަރުކަޒަށް މިއަދު ފުރާފައިވާ ކަމަށެވެ.
ރައީސްގެ މެސެގުގައި ވަނީ ދިވެހިރާއްޖޭގެ 35 ރަށަކަށް ނިސްބަތްވާ، 16 އަހަރާއި 19 އަހަރާއި ދެމެދުގެ 66 ޒުވާނުން ބައިވެރިވާ މި ތަމްރީނުގައި ތަފާތު ފަންނީ ދާއިރާތަކުން ތަމްރީނު ފުރިހަމަކުރުމުގެ ފުރުޞަތުލިބިގެންދާނެކަމަށް ވިދާޅުވެފައެވެ.
މިސަރުކާރުގެ އެންމެ ބޮޑު އަމާޒަކީ ދިވެހި ޒުވާނުންގެ މެދުގައި ގައުމިއްޔަތުގެ ރޫހާއި ފަހުރު ދިރުވައި އާލާކޮށް، އިސްލާމްދީނަށް ލޯބިކުރާ ރައްޔިތެއް ބިނާކުރުން ކަމުގައި މީގެ ކުރިން ރައީސް ވިދާޅުވެފައިވާކަން ފާހަގަކުރެވެއެވެ. ދިވެހިރާއްޖެއަށް ކުރިމަތިވާ ބޮޑެތި ނުރައްކާތަކާއި ކާރިސާތަކުގައި ޤައުމީ ހިދުމަތަށް ސާބިތުކަމާއެކު ކުރިމަތިލާނެ ރައްޔިތެއް ބިނާކޮށް ތަރައްގީ ކުރުން ވެސް ވަތަނީ ހިދުމަތުގެ މުހިންމު މަގުސަދުތަކުގެ ތެރޭގައި ހިމެނޭ ކަމަށް ރައީސް ވިދާޅުވެފައިވެއެވެ.
ވަތަނީ ހިދުމަތުގެ ޕްރޮގުރާމަކީ ސްކޫލު މަރުހަލާ ނިންމުމަށްފަހު މަތީ ތައުލީމާއި މަސައްކަަތުގެ ފުރުސަތު ނުލިބި ތިބި ޒުވާނުންނަށް މަސައްކަތްތެރިކަން ދަސްކޮށްދީ، ރަނގަޅު އަހުލާގުގެ މައްޗަށް ހާނުވައި، ދީނީ އަގީދާ ވަރުގަދަ ހުނަރުވެރި ހީވާގި ބައެއްގެ ގޮތުގައި މުޖުތަމައަށް ނެރުމަށް ހިންގާ ޕްރޮގުރާމެކެވެ.
