ޗުއްޓީ ހޭދަކުރަން ރާއްޖެއަށް 60 ފަހަރު ޒިޔާރަތްކުރި އިނގިރޭސިވިލާތުގެ ދެމަފިރިން ނިޔާވުމުގައި އެހެން މީހެއްގެ ބައިވެރިވުމެއް އޮތް ކަމަށް ފުލުހުންގެ ތަހުގީގަށް ފާހަގަކުރެވިފައި ނުވާ ކަމަށް ދިވެހި ފުލުހުންގެ ހިދުމަތުން ހާމަކޮށްފިއެވެ.
މިކަމާއި ގުޅިގެން ފުލުހުން މައުލޫމާތު ދެމުން ބުނެފައިވަނީ، އއ. އަތޮޅުގައި ހިންގާ ރިސޯޓެއްގައި ޗުއްޓީ ހޭދަ ކުރަމުން ދެންދިޔަ އިނގިރޭސިވިލާތުގެ ފަތުރުވެރިއެއްކަމަށްވާ، މރސ. އެލައިނީ ރިޗްމޮންޑް (70އ)، 2025 ޑިސެމްބަރ 19 ވަނަ ދުވަހުގެ ހެނދުނުގެ ވަގުތެއްގައި އޭނާގެ ފިރިމީހާއާ އެކު އެރިސޯޓްގެ ފަރުކައިރިއަށް ޑައިވިން އަށް ގޮސް އުޅެނިކޮށް، ގެއްލިގެން ހޯދަމުން ދަނިކޮށް، އެ ސަރަހައްދުގައި މޫދުގައި ނިޔާވެފައި އޮއްވާ ފެނިފައިވާ ކަމަށެވެ.
މީގެއިތުރުން، އއ. އަތޮޅުގައި ހިންގާ ރިސޯރޓެއްގައި ޗުއްޓީ ހޭދަ ކުރަމުން ގެންދިޔަ އިނގިރޭސިވިލާތުގެ ފަތުރުވެރިއެއް ކަމަށްވާ މރ. މެލްކޮމް ޖޯން ރިޗްމޮންޑް (71އ)، 2025 ޑިސެމްބަރ 21 ވަނަ ދުވަހު އެނބުރި ގައުމަށް ދިއުމަށްޓަކައި އެއަރޕޯރޓަށް ފުރަން ގޮސް ހުއްޓައި ސިއްހީ ހާލަތު ދަށްވުމާ ގުޅިގެން އެއަރޕޯރޓް ކްލިނިކްގައި ފަރުވާ ދިނުމަށްފަހު އިތުރު ފަރުވާ އަށް އޭ.ޑީ.ކޭ ހޮސްޕިޓަލަށް ގެންދެވި ފަރުވާ ދެމުން ދަނިކޮށް 2025 ޑިސެމްބަރ 24 ވަނަ ދުވަހު މެންދުރުގެ ވަގުތެއްގައި ވަނީ ނިޔާވެފައިވާ ކަމަށް ފުލުހުން ބުނިއެވެ.
މި ދެ މީހުން ނިޔާވުމުގައި އެހެން މީހެއްގެ ބައިވެރިވުމެއް އޮތްކަމަށް ނުވަތަ ކުށުގެ ތުހުމަތެއް ކުރެވޭ ފަދަ ކަމެއް މިހާތަނަށް ތަހުގީގަށް ފާހަގަކުރެވިފައިވާ ނުވާ ކަމަށް ފުލުހުން ބުނިއެވެ.
ބޭރުގެ ނޫހަކުން ރިޕޯޓުކޮށްފައިވާގޮތުން ނަމަ، ނިޔާވި ދެ މަފިރިން، އެއްލައިދޫ ރިސޯޓަށް 60 ފަހަރު ޒިޔާރަތްކޮށްފައިވެއެވެ. އަދި، 2025 އަހަރުގައިވެސް ތިން ފަހަރު ރާއްޖެއަށް ޒިޔާރަތްކޮށްފައިވާކަމަށް ބޭރުގެ ނޫހަކުން ރިޕޯޓުކޮށްފައިވެއެވެ.
