މި ޖެނުއަރީ މަހުގެ 04 ވަނަ ދުވަހު ރ. ކިނޮޅަހާ ދިމާ ބޭރު ކަނޑުމަތިން މަރުވެފައި އޮއްވާ ފެނުނު މީހާގެ ހަށިގަނޑުގެ ޑީއެންއޭ ތަހުލީލުތަކުން އެއީ ފިރިހެނެއްގެ ހަށިގަނޑުކަން ވަނީ ކަށަވަރުވެފައިވާކަމަށް ފުލުހުން ބުނެފިއެވެ.
މީގެ ކުރިން ފުލުހުން ވިދާޅުވިގޮތުގައި މަރުވެފައި އޮއްވާ ފެނުނު މީހާގެ ހަށިގަނޑު އޮތް ހާލަތުގެ ސަބަބުން، އެއީ ކޮން އުމުރެއްގެ ނުވަތަ ކޮން ގައުމެއްގެ މީހެއްކަން ދެނެގަތުމަށް ވަނީ ދަތިތަކެއް ކުރިމަތިވެފައެވެ.
ކިނޮޅަސް ކައިރިން ފެނުނީ ދިވެއްސެއް ނުވަތަ ބިދޭސީއެއްގެ ހަށިގަނޑު ކަމެއްވެސް ފުލުހުން އޭރު ސާފުކޮށްދީފައެއްނުވެއެވެ. ރ. ކިނޮޅަހު ބޭރުން ފެނުނު ހަށިގަނޑާއި ކ. ކަނޑޫމާތިލަ ކައިރިން 21 ޑިސެމްބަރު 2025 ވަނަ ދުވަހު ފެނުނު ހަށިގަނޑުގެ ޑީއެންއޭގެ ނަތީޖާއަށް ބަލާއިރު، އެއީ 2025 ޑިސެމްބަރު 17 ވަނަ ދުވަހުން ފެށިގެން ގެއްލިގެން ހޯދަމުންދާ ރަޝިއާގެ ފަތުރުވެރިޔާގެ ހަށިގަނޑު ނޫންކަން ވެސް ޔަގީންކުރެވިފައިވާކަމަށް ފުލުހުން މަޤުލޫމާތު ދެއްވައެވެ.
މި މައްސަލައާ ގުޅިގެން އިތުރަށް ބަލަންޖެހޭ ކަންކަން ފުލުހުން އަންނަނީ ބަލަމުންނެވެ.
