މޯލްޑިވް ގޭހުން ގޭސް ގަތުމަށް ދުބާއީގެ ކުންފުންޏަކަށް އެޑްވާންސަށް ދެއްކި 3.7 މިލިއަން ރުފިޔާ ގެއްލުނު މައްސަލަ ތަހުގީގުކޮށްދޭން ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް (އެސްއޯއީ) ކޮމިޓީއަށް ހުށަހަޅައިފިއެވެ.
މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީއަށް ޝާކިރު ފޮނުއްވި ސިޓީގައި ވަނީ ނޫސް މައްޖައްލާތަކުގައާއި މީސް މީޑިއާގައި އިތުބާރު ހިފޭފަދަ ލިޔުންތަކެއްގެ މައްޗަށް ބިނާކޮށް މޯލްޑިވްސް ގޭސްއިން އޮކްޓޯބަރު 2024ގައި އޯޑަރު ކޮށްފައިވާ 800،000 ޑޮލަރުގެ ގޭސް ޝިޕްމަންޓްގެ އެޑްވާންސް ފައިސާގެ ގޮތުގައި ދެއްކެވި 246،645 ޑޮލަރާއި ގުޅޭ މައްސަލައަކީ ސަރުކާރުގެ ކުންފުންޏެއްގެ މައްޗަށް ކުރެވޭ ސީރިއަސް ތުހުމަތުކެއް ކަމަށެވެ.
އެހެންކަމުން އެކަމުގެ މައުލޫމާތު ހޯދުމުގެ އިތުރުން އޭގެ ފުރިހަމަ ތަހުގގެއް ރައްޔިތުންގެ މަޖިލީހުގެ އެސްއޯއީ ކޮމިޓީ މެދުވެރިކޮށް ހިންގާދެއްވުމަށް އެދޭ ކަމަށް ޝާކިރު ވަނީ ވިދާޅުވެފައެވެ.
މީގެއިތުރަށް ޝާކިރު ވަނީ ވައިކަރަދޫ ދާއިރާގެ މެންބަރު، ހުސެއިން ޒިޔާދު އާއި ހުޅުމާލެ ދެކުނު ދާއިރާގެ މެންބަރު، އަހުމަދު ޝަމްހީދުއަށް ބިރުދެއްކުން ދޭހަވާ މޭރުމަކުން މޯލްޑިވްސް ގޭސްގެ މެނޭޖިން ޑިރެކްޓަރު، އަބްދުالله މުހައްމަދު ސޯޝަލްމީޑިއާގައި ޕޯސްޓެއް ކުރެއްވި މައްސަލަ ވެސް ބަލައިދިނުމަށް އެދިފައެވެ.
ގޭސް ޝިޕްމަންޓަށް ދެއްކި ފައިސާ ގެއްލުނު މައްސަލަ އެނގިގެން ދިޔައީ މިދިޔަ އަހަރުގެ އޭޕްރީލް މަހު ބޭއްވި ރައްޔިތުންގެ މަޖިލިހުގެ މާލިއްޔަތު ކޮމިޓީގެ ބައްދަލުވުމެއްގައި އެޑްވާންސްގެ ގޮތުގައި ދެއްކި ގިނަ އަދަދެއްގެ ފައިސާ ގެއްލުނު އިރު އެ ފައިސާ ހޯދުމަށް ކުރި މަސައްކަތް ކާމިޔާބު ނުވާ ކަމަށް މަޖިލިހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހުމަދު ނާޒިމް ވިދާޅުވުމުންނެވެ.
މޯލްޑިވް ގޭހަށް ގޭސް ގަތުމަށް ދުބާއީގެ ޖަކްޝާ އެނާޖީއަށް އެޑްވާންސް ފައިސާގެ ގޮތުގައި ޝިޕްމެންޓުގެ 30 ޕަސެންޓުގެ ފައިސާ ކަމަށްވާ 3.7 މިލިއަން ރުފިޔާ ދެއްކީ އޮކްޓޫބަރު 2024ގައެވެ. އޭރު މޯލްޑިވްސް ގޭހުން ބުނީ އެ ފައިސާ ނުލިބޭތީ އެ ކުންފުންޏާ މެދު ގާނޫނީ ފިޔަވަޅު އަޅަން ތައްޔާރުވަމުން އަންނަ ކަމަށެވެ.
