ބަޖެޓަށް މަޖިލީހުން ބަދަލް ގެނައުމާއި ރައީސް ނަޝީދު ދެކޮޅު!

އަންނަ އަހަރުގެ ބަޖެޓަށް މަޖިލީހުން ގެނައި ބަދަލުތަކާއި މެދު ރައްޔިތުންގެ މަޖިލީހުގެ ރައީސް ރައީސް ނަޝީދު ކަންބޮޑުވުން ފާޅުކުރައްވައިފިއެވެ.

ރައީސް ނަޝީދު ވިދާޅުވީ ސަރުކާރުގެ މެޖޯރިޓީ އޮތް މަޖިލީހަކުން ސަރުކާރުން ހުށަހަޅާފައިވާ ބަޖެޓުގެ ޖުމްލަ އަދަދަށް ބަދަލު އައިސްގެން ނުވާނެކަމަށެވެ. އަދި ބަޖެޓު ކޮމިޓީން ބަދަލު ގެނެސްފައި ވަނީ ހަމައެކަނި ހަރަދަށް ކަމަށާއި، އަންދާޒީ އާމްދަނީ އިތުރުވާނެ ކަމެއް ހިމަނާފަި ނެތް ކަމަށް ރައީސް ނަޝީދު ވިދާޅުވިއެވެ.

އަންނަ އަހަރަށް ލިބޭނެ ކަމަށް ލަފާ ކޮށްފައިވާ އާމްދަނީގެ ގޮތުގައި ސަރުކާރުން ތައާރަފު ކުރަން ނިންމާފައިވާ އާމްދަނީން ނަގާ ޓެކްސް ތަންފީޒު ކުރެވޭނެ ތާރީހު ނޭނގޭ ކަމަށް ބުނެ އެކަމާއި މެދުވެސް ރައީސް ނަޝީދު ކަންބޮޑުވުން ފާޅުކުރެއްވިއެވެ.

އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހެޅު 37.5 ބިލިއަން ރުފިޔާގެ ބަޖެޓަށް އިތުރު 366 މިލިއަން ރުފިޔާ އިތުރުކޮށް، ބަޖެޓު ދިރާސާކުރާ ކޮމިޓީއިން ވަނީ ފާސްކޮށްފައެވެ. ބަޖެޓަށް އިތުރު ކުރި 366 މިލިއަން ރުފިޔާގެ ތެރޭގައި ޕަބްލިކް ސެކްޓާ އިންވެސްޓްމަންޓް ޕްރޮގްރާމް (ޕީއެސްއައިޕީ) ގައި ހިމެނިފައިވާ އުމްރާނީ ތަރައްގީގެ މަޝްރޫއުތައް ބޮޑު އިންސައްތައެއް ހިއްސާކުރެއެވެ. މީގެ އިތުރުން ބައެއް އޮފީސްތަކުގެ ބަޖެޓަށް ވެސް ފައިސާ އިތުރުކޮށްދީފައިވެއެވެ.

ބަޖެޓް ދިރާސާ ކުރާ ކޮމިޓީއިން ބަޖެޓަށް 366 މިލިއަން ރުފިޔާ އިތުރު ކުރި ނަމަވެސް އެ ގޮތަށް ފާސްވާނީ މަޖިލީހުގެ ތަޅުމުން އެ ގޮތަށް ފާސްކުރުމުންނެވެ.

މިހާރު ބަޖެޓް ހިމެނޭ ގޮތަށް ބަލާއިރު، ޖުމްލަ ބަޖެޓްގެ އަދަދަކީ 37.8 ބިލިއަން ރުފިޔާއެވެ. ދައުލަތަށް ލިބޭނެ ކަމަށް ލަފާކުރާ އާމްދަނީ 29.9 ބިލިއަން ރުފިޔާ އަށް އަރާއިރު، ޑެފިސިޓް 5.9 ބިލިއަން ރުފިޔާއަށް އަރައެވެ.

ރައީސް ސާލިހުގެ ސަރުކާރުން ހުށަހެޅީ ފުރަތަމަ ބެޖެޓާއި ބެހޭ ގޮތުން ފިނޭންސް މިނިސްޓަރ އަމީރު ވިދާޅުވި ގޮތުގައި އަންނަ  އަހަރު ދައުލަތަށް ލިބޭ އާމްދަނީ ބަހާލައިފައި ވަނީ މައިގަނޑު ފަސް ދާއިރާއަކަށެވެ. އޭގެ ތެރެއިން އެންމެ ބޮޑު އަދަދެއް ލިބެނީ ޓެކްސްގެ ގޮތުގަ އެވެ. އެއީ އާމްދަނީގެ 48 ޕަސެންޓް ނުވަތަ 17.8 ބިލިއަން ރުފިޔާ އެވެ. މީގެ އިތުރުން އާމްދަނީގެ ތެރޭގައި ހިމެނެނީ ޓެކްސް ނޫން އެހެން ގޮތްގޮތުން ލިބޭ 6.8 ބިލިއަން ރުފިޔާ އާއި ހިލޭ އެހީ އާއި އެހެނިހެން ގޮތްގޮތުން ލިބޭ 5.2 ބިލިއަން ރުފިޔާ އެވެ.

އަންނަ އަހަރަށް ލަފާކޮށް ސަރުކާރުން ހުށަހެޅި ބަޖެޓުގައި ބުނެފައިވާ ގޮތުގައި ބަޖެޓުންް އަންނަ އަހަރު ވެސް އެންމެ ބޮޑު ހަރަދެއް ކުރާނީ ރިކަރެންޓް ހަރަދުތަކަށެވެ. އެއީ 22.2 ބިލިއަން ރުފިޔާ ނުވަތަ ޖުމްލަ ޚަރަދުގެ 59 ޕަސެންޓެވެ. މީގެ އިތުރުން ޕީއެސްއައިޕީ އަށް 10 ބިލިއަން ރުފިޔާ ކަނޑައަޅާފައިވާ އިރު އެހެނިހެން ކެޕިޓަލް ހަރަދުތަކަށް 5 ބިލިއަން ރުފިޔާ ކަނޑައަޅާފައި ވެ އެވެ.

2020 ވަނަ އަހަރު ގައުމުގެ އުފެއްދުންތެރިކަން ކުރިއަރާނެ ކަމަށް ބެލެވެނީ 7.5 ޕަސެންޓްގައި ކަމަށް ބަޖެޓުގައި ވަނީ ބުނެފައެވެ. މި އަހަރު ޖީޑީޕީގެ ކުރިއެރުން ހުރީ 5.2 ޕަސެންޓްގަ އެވެ. ފިނޭންސް މިނިސްޓަރ ވިދާޅުވި  ގޮތުގައި ރާއްޖޭގެ ޓޫރިޒަމް އޮތީ ދުޅަހެޔޮކަން މަތީގައި ކަމަށްވާތީ އެ ދާއިރާގެ ކުރިއެރުން 2.6 ޕަސެންޓްގައި ބެހެއްޓޭނެ އެވެ. އަދި މި އަހަރު ކުޑަ ހުއްޓުމެއް އައި ނަމަވެސް، ކޮންސްޓްރަކްޝަން އިންޑަސްޓްރީ ވެސް 1.1 ޕަސެންޓްގައި ކުރިއަރާނެ  ކަމަށް ވަނީ ބުނެފައެވެ.

މީގެއިތުރުން ދައުލަތުގެ ރަސްމީ ރިޒާވް އަންނަ އަހަރު 819 މިލިއަން ޑޮލަރަށް އިތުރު ކުރެވޭނެ ކަމަށް ބަޖެޓްކޮށްފައި ވެ އެވެ. އަދި ޖީޑީޕީގެ ނިސްބަތުން 19 ޕަސެންޓް ނުވަތަ 1.2 ބިލިއަން ޑޮލަރުން ކަރަންޓް އެކައުންޓް ޑެފިސިޓް ވާނެ ކަމަށް ބެލެވޭއިރު، ނޮމިނަލް ޖީޑީޕީ 97.5 ބިލިއަން ރުފިޔާ އަށް އަރާނެ ކަމަށް ވަނީ ލަފާކޮށްފަ އެވެ.