މާފުށީ ޖަލަށް ގެނައި ބޮޑީ ސްކޭނަރު އިންސްޓޯލްކޮށް އެކަމަށް ބޭނުންވާ މީހުން ތަމްރީނު ކުރުމުގެ މަސައްކަތް މިހާރު ދަނީ ކުރިއަށްކަމަށް ހޯމް މިނިސްޓަރ އަލީ އިޙްސާން ވިދާޅުވެއްޖެއެވެ.
ޖަލުތަކުގެ ތެރެއަށް ވެއްދުން މަނާތަކެތި ވައްދައި، ކުށްކުރަމުން ދިޔަ ދިޔުން ހުއްޓުވުމަށް، އެންމެ ޒަމާނީ ބޮޑީ ސްކޭނަރެއް މިހާރު ވާނީ މާފުށީ ޖަލަށް ގެންދެވިފައިކަން ރައީސުލްޖުމްހޫރިއްޔާ ވަނީ ދާދި ފަހުން އިޢުލާން ކުރައްވާފައެވެ.
މިކަމާ ގުޅޭގޮތުން ދައުލަތުގެ މީޑިއާގައި ވާހަކަ ދައްކަވަމުން މިނިސްޓަރ ވިދާޅުވީ ބޮޑީ ސްކޭނަރު އިންސްޓޯލްކޮށް އެކަމަށް ބޭނުންވާ މީހުން ތަމްރީނު ކުރުމުގެ މަސައްކަތް މިހާރު ދަނީ ކުރިއަށް ކަމަށާއި މި އަހަރުގެ އެޕްރީލް މަހުގެ ތެރޭގައި ބޮޑީ ސްކޭނަރު ބޭނުންކުރަން ފަށާނެ ކަމަށެވެ.
މި ސްކޭނަރުގެ ބޭނުންކުރަން ފެށުމާއެކު ޖަލަށް ވައްދަން ނުޖެހޭ އެއްވެސް ބާވަތެއްގެ އެއްޗެއް ނުވެއްދޭނެ ކަމުގެ ޔަގީންކަން އިހުސާން ވަނީ ދެއްވާފައެވެ.
ޖަލަށް ދިމާވެފައިވާ މައްސަލަކަށް އަލިއަޅުއްވާލައްވާ ވާހަކަ ދައްކަވަމުން މިނިސްޓަރ ވިދާޅުވީ ޖަލު ތޮއްޖެހުމާއި ގައިދީންނަށް ރީހެބިލިޓޭޝަން ފަރުވާ ރަނގަޅަށް ހިންގުމުގައި ދަތިތަކެއް އެބަހުރި ކަމަށެވެ.
މިއޮތް ހާލަތަކީ ވަރަށް ކޮންޑިއުސިވް މާހައުލެއް އޭގެ ތެރެއިން އިތުރު ކްރައިމް އައުމަށް. އެ ހާލަތު އެގޮތަށް ދެމިއޮންނާތީ ކަމަށް ބޮޑަށް އަޅުގަނޑަށް ލަފާވަނީ ސްކޭމް ކުރުމުގެ ފުރުސަތުވެސް މި ލިބިގެން މިއައީ. ހަމައެއާއެކު ޖަލުގެ ސަލާމަތާއި ރައްކާތެރިކަން، ޖަލަށް ވަދެ ނިކުމެ ހަދާ ހެދުމުގަ ބެލެހެއްޓެން ޖެހޭ ވަރަށް ނުބެލެހެއްޓުން. ނުބެލެހެއްޓިގެން އުޅޭ އެންމެ ބޮޑު ސަބަބަކީ އެންމެ އެކަށޭނަ ވަސީލަތްތައް ނެތުން. ޖަލުތަކުގަ ތިބި އޮފިސަރުންނަކީވެސް ހަމަ އިންސާނުން. ބައެއް ކުދިން އަތުން ގޯސްތައްވެސް ހެދިފަ އެބަހުރި. ސްކޭމް މައްސަލަތައްވެސް އިތުރުވާތީ ކުރި ދިރާސާއެއްގަ ނަތީޖާއަކަށްވީ ބޮޑީ ސްކޭނަރެއް ހުރެގެން ޖަލަށް އެއްވެސް އެއްޗެއް ނުވެއްދޭނެ ކަމުގެ ޔަގީންކަން ނިޒާމެއްގެ ތެރެއިން އައުމާއެކީގަ ކަންކަން ރަނގަޅުވާނެ.
ކުށްކޮށްގެން ޖަލަށް ޙުކުމްކުރާ ފަރާތްތައް ޖަލުގައި ބަންދުކޮށްފައި ތިބޭއިރު، އިންސާނީ ކަރާމާތާއި، ބައިނަލްއަޤްވާމީ މިންގަނޑުތަކަށް ފެތޭގޮތަށް އިންތިޒާމުތައް ހުރިކަން ކަށަވަރު ކުރުމަކީ ވަރަށް މުހިންމު ކަމެކެވެ.
މިގޮތުން ބަލާއިރު، 17 ނޮވެންބަރު 2023ގައި ދިވެހިރާއްޖޭގައި ހުރި ޖަލުތަކުގެ ގިނަ ގޮޅިތަކުގައި ކުށްވެރިން އުޅެމުންދިޔައީ ކަރަންޓުގެ ޚިދުމަތްނެތިކަން އިހުސާން ފާހަގަކުރެއްވިއެވެ. އަދި ގައިދީންގެ ހާލަތު ރަނގަޅުކުރުމަށް ކުރެވުނު މަސައްކަތުގެ ތެރެއިން، ހުރިހާ ޖަލުތަކެއްގެ ގޮޅިތަކަށް މިހާރު ވާނީ ކަރަންޓް ފޯރުކޮށްދީފައި ކަމަށް އިހުސާން ވިދާޅުވިއެވެ.
ޖަލަކީ ހަމައެކަނި އަދަބު ދިނުމަށް ގެންދެވޭ ތަނަކަށް ވުމުގެ ބަދަލުގައި، އެ ތަނަކީ، ޙުކުމް ތަންފީޒު ކުރަމުންދާ ގައިދީންނަށް ދިރިއުޅުމުގައި ކާމިޔާބު މީހަކަށް ހެދުމަށް އިސްލާޙީ ރީހެބިލިޓޭޝަންގެ ފުރުސަތު ދެވޭ ތަނަކަށް ބަދަލުކުރުމަކީ ރައީސުލްޖުމްހޫރިއްޔާގެ ސިޔާސަތެކެވެ. މިގޮތުން، ރީހެބިލިޓޭޝަން ޕްރޮގްރާމްތަކުގައި ގަވާއިދުން ބައިވެރިވެ، ވަކި މިންގަނޑެއްގައި އަޚްލާޤު ހިފެހެއްޓުމުން، ޕްރޮގްރާމްގައި ހޭދަކުރާ ކޮންމެ ދުވަހަކަށް ޖަލު ޙުކުމުން އިތުރު ދުވަހެއް ކެނޑޭގޮތަށް މިހާރު ވަނީ ސިޔާސަތު ބަދަލުކޮށްފައެވެ.
އަދި ރާއްޖޭގެ ތާރީޚުގައި ފުރަތަމަ ފަހަރަށް، އޯޕަން ޕްރިޒަން އައިލެންޑް ކޮންސެޕްޓްގައި، މުޅި ރަށަކީ ޖަލެއްގެ ގޮތުގައި ކަނޑައަޅައި، އެ ރަށުގައި ގައިދީންނަށް ދިރިއުޅެވި، މަސައްކަތްތައް ކުރެވޭގޮތަށް، ރީހެބިލިޓޭޝަނަށް ފޯކަސްކޮށްގެން ރަށެއް ތަރައްޤީކުރުމަށް ނިންމައި، މޯލްޑިވްސް ކަރެކްޝަނަލް ސަރވިސްއާ މިހާރު ވަނީ ހަވާލުކޮށްފައެވެ.
މިޖަލު ޤާއިމުކުރުމަށް ކުރަންޖެހޭ އުމްރާނީ މަސައްކަތް، މި އަހަރުގެ މެދުތެރޭގައި ފަށައި، މި އަހަރުގެ ނިޔަލަށް އެ ތަނަށް ގައިދީން ލުމަށްވެސް ސަރުކާރުން ވަނީ ޕްލޭންކޮށްފައެވެ.
