ބޭންކް އޮފް މޯލްޑިވްސް (ބީއެމްއެލް) އަކީ ރާއްޖޭގެ އެންމެ ބޮޑު މާލީ އިދާރާއަށް ވާއިރު، އެ ބޭންކުން ކުރާ އިންވެސްޓްމަންޓްތަކާ ގުޅޭގޮތުން އާންމުންގެ މެދުގައި ތަފާތު ޚިޔާލުތަކެއް އުފެދިފައިވެއެވެ.
ޚާއްޞަކޮށް ސަރުކާރުގެ ޓްރެޜަރީ ބިލް (ޓީބިލް) ތަކުގައި ބޭންކުން އިންވެސްޓްކުރަނީ ކަނޑައެޅިފައިވާ އުސޫލުތަކުގެ ބޭރުން ކަމަށް ބުނެ ދެކެވޭ ވާހަކަތަކަށް ބޭންކުގެ ސީއީއޯ މުޙައްމަދު ޝަރީފް ވަނީ ވަރަށް ސާފު ޖަވާބެއް ދެއްވާފައެވެ. ބޭންކުގެ ބޯޑުން ކަނޑައަޅާފައިވާ ރިސްކް އެޕަޓައިޓް މިންގަނޑުތަކާ ޚިލާފުވެފައި ނުވާނެ ކަމުގެ ޔަގީންކަން އޭނާ ވަނީ ދެއްވާފައެވެ.
ދުނިޔޭގެ ހުރިހާ ބޭންކުތަކަކީވެސް އެ ބޭންކެއްގެ އަތުގައި ހުންނަ އިތުރު ފައިސާ ނުވަތަ އެކްސެސް ފަންޑު، ރިސްކު ކުޑަ މާލީ ހަރަކާތްތަކުގައި އިންވެސްޓްކުރާ ބައެކެވެ. ބީއެމްއެލުންވެސް ސަރުކާރުގެ ޓީބިލްގައި އިންވެސްޓްކުރަނީ މި އުސޫލުގެ ދަށުންނެވެ. 2015 ވަނަ އަހަރުން ފެށިގެން 2025 ވަނަ އަހަރާ ހަމައަށް ބޭންކުގެ ކެޕިޓަލްގެ ނިސްބަތުން ޓީބިލާއި ޓީބޮންޑަށް ކުރާ އިންވެސްޓްމަންޓްތައް ހުރީ އެއް މިންވަރެއްގައި ހިފެހެއްޓިފައެވެ. މިއީ ބޭންކުގެ މާލީ ދުޅަހެޔޮކަން ދެމެހެއްޓުމަށްޓަކައި ބޯޑުން ކަނޑައަޅާފައިވާ ހަރުދަނާ މިންގަނޑުތަކުގެ ތެރެއިން ކުރެވޭ ކަމެކެވެ.
ބޭންކުން ޓީބިލްގައި އިންވެސްޓްކުރަނީ އާންމުކޮށް އެއް އަހަރު ނުވަތަ އެއަށްވުރެ ކުރު މުއްދަތަކަށެވެ. މީގެ މާނައަކީ ކޮންމެ އަހަރަކުވެސް ކުރިން އިންވެސްޓްކޮށްފައި ހުންނަ ފައިސާ އަނބުރާ ލިބުމުން، އެ ފައިސާ އަލުން އިންވެސްޓްކުރެވެނީއެވެ. މިއަށް ކިޔަނީ ’ރޯލްއޯވާރ‘ ކުރުމެވެ. 2025 ވަނަ އަހަރުގެ ތަފާސްހިސާބުތަކަށް ބަލާއިރު، 10.8 ބިލިއަން ރުފިޔާގެ ޓީބިލަކީ މިގޮތަށް ރޯލްއޯވާރ ކުރެވިފައިވާ ބިލްތަކެވެ. އެހެންކަމުން، މިއީ މުޅިން އަލަށް ކުރެވުނު އިންވެސްޓްމަންޓްތަކެއް ނޫންކަން ސީއީއޯ ވަނީ ފާހަގަކުރައްވާފައެވެ.
ބޭންކަށް ދިމާވާ އެންމެ ބޮޑު އެއް ގޮންޖެހުމަކީ ނެޓް އޯޕަން ޕޮޒިޝަން (އެންއޯފީ) ގެ ޝޯޓްފޯލް ރަނގަޅު ކުރުމެވެ. މިކަން ހައްލުކުރުމަށްޓަކައި 192.8 މިލިއަން ޑޮލަރަށްވާ ދިވެހި ރުފިޔާގެ ޓީބިލްތައް ޔޫއެސް ޑޮލަރުގެ ޓީބޮންޑަށް ބަދަލުކުރުމަކީ ސަރުކާރާ މަޝްވަރާކޮށްގެން އެޅުނު މުހިންމު ފިޔަވަޅެކެވެ. މީގެ އިތުރުން، ދައުލަތުން ބޭންކުގައި ބަހައްޓާފައިވާ ފިކްސް ޑިޕޮސިޓާ އަޅުވައި، ސެކުއާޑްކޮށް 653 މިލިއަން ރުފިޔާގެ ޓީބިލަށް އިންވެސްޓްކޮށްފައިވަނީ ބޭންކުގެ ރައްކާތެރިކަން ކަށަވަރުކުރުމުގެ ގޮތުންނެވެ.
ބީއެމްއެލުން ސަރުކާރުގެ ޓީބިލްތަކުގައި އިންވެސްޓްކުރަމުންދަނީ ބޭންކުގެ ދާޚިލީ އުސޫލުތަކާއި ބައިނަލްއަގުވާމީ ބޭންކިންގް މިންގަނޑުތަކާ އެއްގޮތްވާ ގޮތުގެ މަތިންނެވެ. އާދަޔާ ޚިލާފު އިތުރުވުމެއް ނެތި، ހަމަޖެހިފައިވާ އުސޫލުގެ ތެރެއިން ކުރެވޭ މި އިންވެސްޓްމަންޓްތަކަކީ ބޭންކުގެ މާލީ ހަމަޖެހުމާއި ރާއްޖޭގެ އިގްތިސާދީ ދުވެއްޔަށް އެހީތެރިވެދޭ މުހިންމު މަސައްކަތެކެވެ. ސީއީއޯގެ ވާހަކަފުޅުން އެނގިގެންދަނީ ބޭންކުގެ ހިންގުން ހުރީ ހާމަކަން ބޮޑު އަދި ޒިންމާދާރު ގޮތެއްގައި ކަމެވެ.
