ދިވެހި ސަރުކާރުން އަދާކުރަންޖެހޭ 500 މިލިއަން ޑޮލަރުގެ ސުކޫކް ކާމިޔާބުކަމާއެކު ދައްކައި ޚަލާޞްކުރުމާ ގުޅިގެން، ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު ޤާސިމް އިބްރާހީމް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށާއި އެމަނިކުފާނުގެ ސަރުކާރަށް މަރުޙަބާ ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ގާސިމް ވިދާޅުވީ، މިއީ ރާއްޖޭގެ މާލީ ނިޒާމު ހަރުދަނާކުރުމަށާއި، އިޤްތިޞާދީ މެނޭޖްމަންޓް ހަރުދަނާކުރުމަށް ސަރުކާރުން ކުރާ މަސައްކަތުގެ ތެރެއިން ލިބުނު ވަރަށް ބޮޑު ކާމިޔާބީއެއް ކަމަށެވެ. އަދި ދައުލަތުން އަދާކުރަންޖެހޭ ދަރަނިތައް އަދާކުރުމުގައި މި ސަރުކާރުން ގެންގުޅޭ އިޚްލާޞްތެރިކަން މިކަމުން ހާމަވާކަމަށް ގާސިމް ފާހަގަކުރެއްވިއެވެ.
ދުނިޔޭގެ އިޤްތިޞާދީ ހާލަތު މިވަގުތު ހުރި ގޮތުން، މިފަދަ ބޮޑު އަދަދެއްގެ ފައިސާ ދެއްކުމަކީ ރާއްޖޭގެ މާލީ ޤާބިލުކަމާއި، ސަރުކާރުގެ ޒިންމާދާރު ލީޑަޝިޕް ރަމްޒުކޮށްދޭ ކަމެއްކަމަށް ޤާސިމް ވިދާޅުވިއެވެ.
މީގެ ސަބަބުން ބައިނަލްއަޤްވާމީ މާލީ އިދާރާތަކާއި އިންވެސްޓަރުންގެ މެދުގައި ރާއްޖެއަށް އޮތް އިތުބާރު ބޮޑުވެގެންދާނެކަމަށް ގާސިމް ވިދާޅުވިއެވެ.
މި ކާމިޔާބީއާ މެދު އުފާކުރައްވާކަން ހާމަކުރައްވަމުން ޤާސިމް އިތުރަށް ވިދާޅުވީ، މިއަހަރުގެ ތެރޭގައި ދައްކަންޖެހޭ އިތުރު ލޯނުތައްވެސް ސަރުކާރުން ދައްކައި ޚަލާޞްކުރާނެ ކަމުގެ ފުރިހަމަ އިތުބާރު އެބައޮތް ކަމަށެވެ. އަދި މާޒީގައި ނަގާފައިވާ ބޮޑެތި ދަރަނިތަކުން ޤައުމު ސަލާމަތްކުރުމަކީ ޤައުމުގެ މިނިވަންކަމާއި ސިޔާދަތު ރައްކާތެރިކުރުން ފަދަ މުހިންމު ކަމެއްގެ ގޮތުގައި ސިފަކުރެއްވިއެވެ.
މިފަދަ މުހިންމު ލަނޑުދަނޑިތައް ހާސިލުކުރުމުގައި ރައީސް ޑރ. މުޢިއްޒުގެ ސަރުކާރަށް ދެއްވަމުން ގެންދަވާ އެއްބާރުލުމާއި ތާއީދު ދެމިއޮންނާނެ ކަމުގެ ޔަޤީންކަން ވެސް ޤާސިމް ވަނީ ދެއްވާފައެވެ.
